1 KHANGTHUBU 11 - PATHIEN LEKHABU THIENGTHO (BSI)

Israel Leng dinga David Thaunuhna

¹ Khutichun, Israel te chengcheng chu, Hebron ah, David kawmah a kikhawm u a, “Nangmah mi leh sa, na thisan kizawppihte ka hiu hi.

² Tuma a Saul in vai a hawm lai khan, Israel te galdo a puidawk leh puilut kha na hi sek a; Lalpa na Pathien in na kawmah, ‘Ka mi Israel te chu vakin na tin, ka mi Israel te chungah lawiupa’n um inla,’ a hun ti a,” a tiu a.

³ Tichun, Israel upa chengcheng chu Hebron a leng kawm achun a chieh u a; chun, David in, Hebron a chun Lalpa masangah, a kawm u ah thu a gawlh a; tichun, Lalpa’n Samuel manga a gen bang khan, David chu Israel te leng dingin sathau a nuh tau a.

⁴ Leng David leh Israel te chengcheng chu Jerusalem ah a chieh u a, khawpi chu a va do tau a. Zie lai chun Jebus ti a het a hi a, a gam luoh masate, Jebus te chu a cheng zing u a.

⁵ Jebus-a umte chun David kawmah, “Zie taka hin hung lut hiel puo’n la,” a tiu a. Himahlele, David chun Zion kulh chu a la ta a, zie chu “David khawpi” tih a hi tai.

⁶ Tichun, David in, “Kuole, Jebus te vak do masa taphawt chu sepaih lawiupa’n pang ina,” a ti a. Tichun, Zeruiah chapa Joab kiti chu a va chieh to masa a, lawiupa dingin a siem tau a.

⁷ Chun, David chu kulh achun a um ta a; ziezieka chuh “David khawpi” a tih uh ahi.

⁸ Millo apat in khawpi kimvel kulh chu a siempha a; Joab chun khawpi sung cheng chu a siempha a.

⁹ Khutichun, Bangakai hihthei Lalpa chu a kawma a um ziekin David chuh a hung thupi deuh deuh ta a.

David Sepaih Hangsante

¹⁰ Ziehaw hi David sepaih hangsan, Israel te chengcheng tawh panga, Israel te chungchâng thu a Lalpa’n a gen banga, lenga siemna dinga a ainahphah pih, mi hangsan tak takte chu ahiu hi:

¹¹ A khatna chu Hakmon chapa laka Jeshobeam chuh sepaih hangsan thum laka lawiupa, (sawmthum laka lawiupa), zathumte chunga a tiengcha dawmsang a, tumkhata thatpa kha ahi.

¹² A bana chu, Ahoh mi, Dodo chapa Eleazar, sepaih hangsan thum te laka khatpa kha ahi.

¹³ Amah chu, buh leia, Philistia mite kido dinga a chieh khawmnau mun, Pas-dammim a, mipite Philistia te apat a a taihsiet lai u a, David lama pang kha ahi.

¹⁴ Chun, amah leh a mite chu lo a chun a ding u a, Philistia mite chu a do u a. Tichun, Lalpa’n hukdawk in, zawhna lopitak a pie ta a.

¹⁵ Ni khat chu, sepaih sawmthum laka hangsan thum te chu, suongpi a Adullam kawlpûk ah David kawmah a chieh suk u a; Philistia sepaihte chun Rephaim ah panmun a guonggalh u a.

¹⁶ Zielai chun David chu kulh sung ah a um a, Philistia te chu Bethlehem ah a um u a.

¹⁷ David chun, “Bethlehem a tui laihdawk tui, kulh kawtkhak kawma khah, ka duhcha na e! dâwn dinga ei vak pie um le chu aw!” a ti a.

¹⁸ Ziephet chun, a sepaih hangsan thum te chun, Philistia te umna chu hawhpai in, Bethlehem a kulh kawtkhak kawma tuisutdawk a tui chu a va khaih sak u a, David kawmah a hun chawi u a; himahleh, David chun a dâwn nuom puoh a, Lalpa kawma thillat in a sungbuo a.

¹⁹ “Zie hi ka dâwn loh ding zie mai chu: Zie thih ngama kipiete thisan chu ka dâwn dinga ahim? Thih ngama kipie a a hun lâk uh ahi ngâl a,” a ti a. Khutichun, a dâwn nuom ta puoh a. Mi hangsan thum te thilhih chu khutibang chuh ahi.

²⁰ Chun, Joab suohpih, Abishai chu sawmthumte laka a lawiupa pên a hi a; mi zathumte chu, a tiengcha chun a do a, amau haw a thah ziek chun thum te laka chun minphat a lawh a.

²¹ Sawmthum te lak achun nih te sang chun amah chu limbawl tâk ahi, a lawiupau a siem in a um a; himahleh, a masa thum te lak achun vang a tel puoi.

²² Kabzeel mi hangsan, thil nasatak hihpa Jehoiada chapa Benai chun Moab mi, Ariel chapate nih chu a that a. Khatvei le, vuk kiek hun lai in, kawkhuka lut in sakeibaknei le a va that a.

²³ Aigupta mi, mi awmkhauh tak, tawng nga a sang hi a that a; zie Aigupta mi chun tiengcha lien tak, puon-gânte kawlka banga khauh hi a chawi a. Benai-ah chun chun tiengcha pum chun a vak zuon a, Aigupta mi tiengcha chu a zuk thak sak a, amah tiengcha chun a sun lum ta a.

²⁴ Ziehaw chu, mi hangsan, Jehoiada chapa Benai thilhihte chu ahi. Sepaih hangsan thum te bana chun minphat a lawh hi.

²⁵ Mi sawmthumte sang chun limbawl tâk a hi a, himahleh, a masa thum te laka chun vang a tel puoi; Chun, David chun amah vengte lawiupa’n a kawih ta a.

²⁶ Chun, sepaih laka mi hangsan dangte chu ziehaw hi ahiu ui: Joab suohpih Asahel te, Bethlehem khuo a Dodo chapa Elhanan te,

²⁷ Haror mi Shammoth te, Pelon Helez te,

²⁸ Tekoa mi Ikesh chapa Ir te, Anathoth mi Aiezer te;

²⁹ Hushat mi Sibbekai te, Aho mi Ilai te,

³⁰ Netophah mi Maharar te, Netophah mi mah Baanah chapa Heled te.

³¹ Benjamin suon, Gibeon khuo a Ribai chapa Ithai te, Pirathon mi Benai te;

³² Gaash luicha a Hurai te, Arbath mi Abiel te;

³³ Baharum mi Azmaveth te, Shalbon mi Eliab te;

³⁴ Gizon mi Hashem chapate, Harar mi Shaga chapa Jonathan te.

³⁵ Harar mi Sakar chapa Ahiam te, Ur chapa Eliphal te;

³⁶ Mekerat mi Hepher te, Pelon mi Ahija te;

³⁷ Karmel mi Hezro te, Ezbai chapa Naarai te;

³⁸ Nathan suohpihpa Joel te, Hagri chapa Mibhar te;

³⁹ Amon mi Zelek te, Zeruiah chapa Joab gâlvan puopa Berot mi Naharai te;

⁴⁰ Ithri mi Ira te, Ithri mi mah, Gareb te;

⁴¹ Hit-mi Una te, Ahlai chapa Zabad te;

⁴² Reuben mi Shiza chapa Adina, Reuben mite laka lawiupa, a kawma mi sawmthumte tawh;

⁴³ Maakah chapa Hanan te, Mithan mi Joshaphat te;

⁴⁴ Ashterat mi Uzzia te, Aroer mi Hotham chapa Shama leh Jeiel te;

⁴⁵ Shimri chapa Jediael te, a suohpihpa Tiz mi Joha te;

⁴⁶ Mahav mi Eliel te, Einaam chapa Jeribai leh Joshaviah te; Moab-mi Ithmah te;

⁴⁷ Mezob-mi Eliel te, Obed leh Jaasiel, Jobah mite hi ahiu.