1 JOHAN 3 - PATHIEN LEKHABU THIENGTHO (BSI)

Pathien Chate

¹ Ngaitiem u, Pa’n ei hehpihna a nasa na e! “Pathien chate,” ti a, ei minvawh tak uh hi; khutibang chuh I hi him ui. Zieziek hin khawvel in ei uh ei het loh uh ahi, amah chuh a het loh ziekun.

² Deihtakte, tuhin Pathien chate I hiu a, bangti’n a I um dinguh tih vang a kichien tadih puoi; amah a hung kilak tieng le vang, amah bangin ki-um ina tih vang I heu hi, amah chuh a um ngei bang banga mu ding I hi ngâl uh a.

³ Kuole, Krista chunga zie kinepna nei ta chuh, amah a thien guolin a kisuthiengtho sek hi.

⁴ Kuole, thil sukhiel ta’n, dân le a sukhiel sek hi; gitloh hi dân suksietna ahi ngâl a.

⁵ Krista chuh gitloh haw la mang dingin a hung lang tai tih na heu hi; amah achun gitloh bangmah a um puoh ngâl a.

⁶ Khutichun, kuole, amah a um zing chun gitlohna a hih zingzing ta puoi; kuole, gitloh hih zingzing sekte chun amah chuh a mu puoh a. het le a he puoi.

⁷ Naute, kuomah lepbawl in um kiu; diktatna hihpa chuh diktat ahi, amah a diktat bangin.

⁸ Kuole, thilhih gilo zingzing chuh Diabol a pawt ahi: Diabol chun atûng apat thil a sukhiel ngâl a. Pathien Chapa hung kiphuon lawh pên chuh, Diabol nasep a sukmangthai theihna ding ahi.

⁹ Kuole, Pathien hin chuh Pathien chi amah a a um ziekin gilo in a um zing zing puoi, Pathien a pieng, hih ziekin gitloh a hih zawm zing zing ta puoi.

¹⁰ Zie ahin Pathien chate leh Diabol chate a kihechien thei hi; kuole. diktatna hih lo chuh Pathien a pawt ei puoi; a suohpih hehpih lo pa chule Pathien a pawt ei diek puoi.

Kilungsiet Tuohna

¹¹ Ziehi atûng apat a thu na zak uh khah ahi; I kihehpih tuoh chiet dinguh ahi tih hi.

¹² Kain, migilo laka um, amah suohpih Abel thatpa guola khah um lo in. Bang zieka a thah ahi ta leh? Amah thil hihte a phatloh ziek leh, a suohpihpa thil hihte a phat ziek ahi.

¹³ Suohpihte, khawvel in a hun hawt uh leh, maksa ki’n.

¹⁴ Suohpihte I hehpih ziekun, thihna apat I suokchau a, hinna ah I lut tau hi, tih I heu ie. Kuole, hehpihna nei lo taphawt chuh thihna a um zing nalai ahi.

¹⁵ Kuole, a suohpih haw ta chuh, tuolthat ahi. Tuolthatte kuomah kumsawt a hinna chang a um puou hi tih na he ngâl uh a.

¹⁶ Zie ahin hehpihna chuh bang a hih I heu hi; Krista chun ei uh dinga a hinna a piek tâk ziekin: ei un le suohpihte dingin I hinnau I piek thuk dinguh ahi.

¹⁷ Kuole, mi hausa khatin, a suohpih tasam in mu hen la; a suohpih chuh lainat ta kileh, bangti’n Pathien ka hehpih hi a ti thei die?

¹⁸ Naute, thu mai in kihehpih puoi tiu khai, lei mai inle kihehpih diek puoi tiu; thilhih leh tihtakzet in hi zaw hen.

Pathien Masanga Hansanna

¹⁹ Zie achun thutak a um I hih uh kihei ting uh, zie mawng chuh a hii, Pathien masanga I hansanna dinguh chuh.

²⁰ I sielepha hetnau chun thiemmawh ei chan sak chun, Pathien chuh I sielepha hetnau sang chun a lopi zawi tih I heu a, amah chun thil chengcheng a he suok ngâl a.

²¹ Deihtakte, I sielephahetnau in mawh ei chansak loh chun, Pathien lam ah I hangsan uh ahi.

²² Khutichun, a thupiekte I zawp ziekuh leh, amah kipahlam tak I hih sek ziekun, I nget takphawt uh chuh a kawm apat I mu sek ui.

²³ Chun, a thupiek chuh ziehi ahi, a Chapa Isu Krista ginchak a, Krista thu ei piek banga kihehpih tuoh hih.

²⁴ Kuole, Pathien thupiek zawp chuh, Pathien tawh pumkhat in a um uh a, Pathien le amah tawh pumkhat in a um hi. Pathien in a Thagau ei piek a hin, Pathien tawh I kipumkhat ui tih I heu hi.