Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 JOHAN 2 - PATHIEN LEKHABU THIENGTHO (BSI)


Krista ei uh ei Panpih

1 Ka naute, thil na sukkhelh lohna dinguh a zie thu hi na kawmuh a ka hun zik ahi. Chun kuo’n le thil a sukkhelh chun, Pa kawma ei nget sakpa, Isu Krista mi diktat chuh I nei ui.

2 Amah chuh I gitlohteu lutchamna a hii; eihaw gitlohna mai hilo in, mi chengcheng gitloh lutchamna le ahi.

3 Chun, Pathien thupiekte I zawp u chun, zie achun amah I heu hi tih I kiheu hi.

4 A thupiekte zawp sam lo in. “Amah ka hêi,” ti chuh mi lepchieh ahi a, amah achun thutak a um puoi.

5 Himahlele, kuole a thu zawp vang chuh. amah achun Pathien a hehpihna a bukim takzet ahi tai. Pathien tawh pumkhat in I um ui tih zie ahin I heu hi;

6 “Pathien tawh pumkhat in ka um hi,” ti pên chuh, Krista um bang bangin a um ding ahi.


Thupiek Thak

7 Deihtakte, thupiek thak vang na kawm u ah ka hun zik puoh a. Thupiek lui, atûng apat na neihsau khah ka hun zik zawk a hii. Zie thupiek lui chuh, atûng apat na thu zaksau khah ahi.

8 Amahvang chuh, thupiek thak hun zik le hita veng ka ti, a ziek chuh, thudik chuh Krista leh nangmau haw a muh a a um tâk ziekin. Thimna chuh a bei ta a, chun, vak tak chuh a hung vak tâk ziekin.

9 Amah suohpih haw ngâla, “Khawvak ah ka um hi,” ti pên chuh, tutieng hin le khuothim a um ahi zing hi.

10 Kuole, amah suohpih hehpih chuh, khawvak achun a um zing a, amah achun kisuihna him a um puoi.

11 Amah suohpih haw pa vang chuh, khawthim achun a um a, thim lak ah a vakviel a, khawthim in a mit a sukdûk tâk ziekin, a chiehna le a he sek puoi.

12 Ka naute, Krista min zieka na gitlohnateu ngaihdam a hih tâk ziekin, na kawmuh a ka hun zik ahi hi.

13 Pate, amah, atûng apat um zing khah na het ziekun na kawmuh a ka hun zik a hi hi. Tanglakte haw, migilo chuh na zawh tâk ziekun, na kawm u ah ka hun zik ahi hi.

14 Ka naute, Pa chuh na het ziekun na kawmuh a ka hun zik ahi hi. Pate, amah atûng apat umzingpa chuh na het ziekun, na kawmuh a ka hun zik a hi hi. Tanglakte, na hat uh a, Pathien thun nangmau ah a um zing a. Mi gilo chuh na zawh tâk ziekun, na kawmuh a ka hun zik ahi kha.

15 Khawvel hi hehpih kiu inla, khawvel a thil umte hile hehpih diek kiu un. Mi kuo’nle, khawvel a hehpih chun, Pa a hehpihna amah ah a um puoi.

16 Khaw- vela thil um chengcheng, taksa utchakna te, mit utna te, chaponate haw hi, Pa a pawt a hi puoh a, khawvel a pawt ahi zaw ngâl a.

17 Khawvel hi, a utchakna haw puma bei kawm zel ahi, himahleh Pathien deihlam hihte vang chuh kumkhuo’n um zing ina.


Krista Melmate

18 Naute, hun nunung pên chuh a nai tai! Krista dodilpa hung ina tih, na zak uh khah, tuhin le Krista dodilte tamtak a hung pawt tau hi; zieziekchun, hun nunung pên a nai tai tih I heu ie!

19 Amau haw chuh I lak uh apat in a pawt uh a, eihaw tawh I kitimatnau a um loh ziekin. Eihaw tawh kitimatna um hile chuh, I kawmuh a um zing ding a hi ngâl uh a. Himahlele, eihaw tawh I kitimatnau a um puoi tih suklatna dingin, ei taihsan sek uh ahi.

20 Krista apat in Thagau Thiengtho thau nuhna chuh na chang uh a, zieziekchun, na bawn un thudik chuh na he tau hi.

21 Thutak chuh na het loh ziekuh a ka hun zik a hi puoh a, na het ziekuh leh, Thutak achun lepchieh bangmah a pawt kha puoi tih na het ziekun ka hun zik zawk a hii.

22 Isu chuh Krista a hi puoi, tite khela lepchieh kuo a um? Krista dodilte chuh, Pa leh Chapa kilepsan nuomte hi ahiu hi.

23 Kuole, Chapa kilepsan chun Pa le a pawm diek puoi; Chapa awite vang chun, Pa le a pawm ahi.

24 Nanguh vangin, atûng apat na thu zak uh khah, na lunggil u ah vawp pha zing un. Zie atûng apat na zak uh khah na vawp zing uh chun, nanguh le, Chapa leh Pa achun um zing unlau.

25 Chun, ziehi ahi, Krista mawng in thu ei tiem khah, kumsawt a hinna hih.

26 Zie nangmau haw hun puih mang guote thu khah, na kawmuh a ka hun zik ahi.

27 Nanguh vangin, Krista kawm apat thau nuhna chang na hiu kha. Zie Thagau Thiengtho chuh nangmau a a um sung cheng, kuomah hun sinsak ngai puon lau. Thagau Thiengtho chun bang cheng a hun sinsak a, thu dik lo hilo in, thudik tak a hun sinsak sek ziekin. Khutichun, Thagau hun sinsaknate chuh zawp unla, amah tawh pumkhat a um hiding na hiu hi.

28 Khutichun, naute, amah ah um zing un; tichun, amah a hung kilak tieng leh, hangsan tak leh, zakcha lo a, a hungna Ni a chuh na um theihna dingun.

29 Amah chuh mi diktat a hii tih, na hetuh chun, kuole, thil dik hih chuh, Pathien cha a hii tih na het dinguh ahi.

Gangte Holy Bible - PATHIEN LEKHABU THIENGTHO

Copyright © Bible Society of India, 2010.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ