Siiqo Saba 5 - ጋሞ ማጻፋ

ፓንዚ

¹ «ታስ ሲቆ ሚቾ ጊዲዳ ታ ሚሺራዬ! ታኒ ታ ኣታኪልቴ ጊዶ ጌላዲስ። ታ ካርቤኔ ታ ሺቶ ጪሽ ማጻዲስ፤ ኤሳ ኡኬ ኢሊሎዛራ ጋ ማዲስ፤ ታ ዎይኔ ኡሻ፥ ታ ማ ኡያዲስ» ጊዴስ። «ኢንቴኖ ሲቄቲዛይቶ! ካላና ጋካናስ ሚቴ፤ ኣላና ጋካናስካ ኡዪቴ» ጊዳ።

ላጌቲ ጌላኦያ

² «ታኒ ኦማርስ ስካዲስ፤ ጊዶ ኣቲን ታ ዎዚናይ ቤጊዴስ፤ ታ ሲቆዚ ካሬ ቆጺሼ፥ ‹ታስ ሲቆ ሚቾ ጊዲዳ ሚሺራዬ! ኔናን ዎሶይ ባይንዳ ታ ሃራጴዬ! ኔና ሾባይስ ታስ ካሬዛ ዶያ፤ ታ ሁኤይ ኬንቾን ዎቂዴስ። ታ ቢናናይካ ኦማርሳ ፑሴን ሙሲዴስ› ጊሺን ሲያዲስ።

³ ታኒ ታ ማይኦ ኬሳዲስ፤ ሂስቲን ዛራ ማይኦ? ታ ቶሆካ ሜጬታዲስ፤ ቃሴ ዛራዳ ኡርቃሶ?

⁴ ታ ሲቆዚ ፔንጌ ጾኤራ ኩሼ ዬዲዴስ፤ ሂስቲን ታስ ማራጬን ፖልኡ ጊዴስ።

⁵ ሄሳፌ ጉዬ ታ ሲቆዛስ ካሬ ዶያናስ ዴንዳዲስ፤ ካሬዛ ዶያና ታ ኦይኪሺን ታ ኩሼፔ ካርቤይ ጾኬቲዴስ፤ ታ ቢራታፔካ ሺቶይ ጎጊዴስ።

⁶ ታ ካሬዛ ዶይሺን ታ ሲቆዚ ሲሚዲ ቢቺዴስ፤ ኢዛ ቃላ ጬንጉርሳ ሲያናስ ኬሃ ኣሞታዲስ። ሚንዳካ ኮያዲስ፤ ጊዶ ኣቲን ዴማናስ ዳንዳያቤኬ፤ ጼይጋዲስ ሺን ኢዚ ታስ ኮዪቤና።

⁷ ካታማ ናጊዛይቲ ታና ዴሚ ዋዲ ማዱንዳ፤ ካታማ ጊምቤ ናጊዛይቲ ታ ማይኢዳ ሴሎ ማይኦዛ ቃሪ ኤኪዳ።

⁸ ኢንቴኖ ዬሩሳላሜ ጌላኦቶ! ኢንቴ ታ ሲቆዛ ዴሚዳ ጊዲኮ ታኒ ኢዛ ሲቆፔ ዴንዲዳይሳን ሃርጊዳይሳ ሃዳራ ኢዛስ ዮቲቴ» ጋዱስ።

ላጌቲ

⁹ «ሃኔ ማጫሳ ኡባፌ ኣ ሎኦዬ! ቱሙ ኔ ሲቆ ላጌዚ ሃራታፔ ዱማቲዜ? ኔኒ ሃይሳ ማላ ኑና ሃዳራ ጊዛይ ኢዚ ሃራታፔ ዋኒኔ?» ጊዳ።

ጌላኦያ

¹⁰ «ታ ሲቆይ ዳሮ ሎኦኔ ሚኖ፤ 10,000 ኣቱማሳ ጋርሳን ኢዛ ማላይ ዴና።

¹¹ ኢዛ ሁኤይ ጌሻ ዎርቃ ሚሳቴስ፤ ኢዛ ቢናናይካ ኦሎሲኔ ዱምኣ ካሬ ሚሳቴስ።

¹² ኢዛ ኣይፌቲ ሻፋ ላንቄን ዲዛ ሃራጴታ ማላኔ ማን ሜጬቲዳ ኢንቁታ ማላ።

¹³ ኢዛ ሻጋላቲ ማልኢዛ ሳዎ ማታታ ማላ፤ ዱማ ዱማ ቂማሜቲ ቶኬቲዳ ኣታኪልቴሶ ሚሳቴቴስ፤ ኢዛ ሜቴርሻቲ ካርቤ ሺቶይ ጾኪዛ ሱፌ ጪሻ ማላ ሎኤቴስ።

¹⁴ ኢዛ ኩሼቲ ኢንቁን ኣሌቄቲዳ ዎርቃ ጉፌ ማላ ሎኤቴስ፤ ኢዛ ቦላይ ሲምፔሬ ጌቴቲዛ ኢንቁን ኣሌቄቲዳ ዳንጋርሳ ዛሌ ማላ ሎኤስ።

¹⁵ ኢዛ ቶሆቲ ዎርቃን ቶኬቲዳ፥ ዳልዳቻ ቱሳታ ሚሳቴቴስ፤ ኢዛ ሜይ ሊባኖሴ ዚጋን ኣሌቄቲዳ ሊባኖሴ ዙማ ሚሳቴስ።

¹⁶ ኢዛ ቃላይ ኤሳ ማላ ማልኤስ፤ ኢዛ ቦላይ ሙሌራ ካይሼስ፤ ኢንቴኖ ዬሩሳላሜ ጌላኦቶ፥ ታ ሲቆዚኔ ታ ላጌዚ ሃይሳ ሚሳቴስ» ጋዱስ።