Siiqo Saba 1 - ጋሞ ማጻፋ

¹ ማዛሙሬ ኡባፌ ኣዛ ሶሎሞኔ ማዛሙሬ።

ጌላኦያ

² «ኔ ሲቆይ ዎይኔ ኡሻፌ ኣ ኡፋይሴስ፤ ኔ ሜቴርሻን ዛራ ዛራዳካ ታና ዬራ።

³ ኔ ቲዬቲዛ ሺቶይ ኣይ ማላ ሳዊዜ! ኔ ሱንይ ጼይጌቲዛ ዎዴካ ኣይ ማላ ኡፋይሲዜ! ጌላኦቲ ኔና ሄሳ ጊሻስ ሲቄቴስ።

⁴ ታና ኔናራ ኤካዳ ባ፤ ሃ ያ፥ ኣኔ ናምኣይ ኢሲፌ ዎጾስ! ታ ካዎ፥ ታና ኔ ቁሩጾ ጊዶ ጌል» ጋዱስ። «ኢዛን ኑኒ ኣይ ኬና ኡፋዬቲዶኒ! ኑኒ ኢዛ ሲቆ ዎይኔ ኡሻፌካ ኣዲ ናሾስ። ቱሙካ ማጫሳይ ኡባይ ኔና ሲቃናስ ቤሴስ» ጊዳ።

ላጌቲ ጌላኦያ

⁵ «ኢንቴኖ ዬሩሳላሜ ማጫሳቶ፥ ሲዪቴ! ታኒ ካሬ ጊዲኮካ ማላ ሎኦ። ታ ካሬቴይ ቄዳሬ ዱንካኔ ማላ፤ ጊዶ ኣቲን ታ ሜይ ካዎ ሶሎሞኔ ኬ ማጋላሻታ ማላ።

⁶ ታ ሜ ካሬዳይ ኣዋ ሴላ፤ ታኒ ካሬ ጊዲዳ ጊሻስ ታና ካፒቴ። ታ ኣዪ ና ኢሻቲ ታናራ ኦዬቲዲ ታና ዎይኔ ኣታኪልቴ ናጋናስ ዎዳ፤ ሄሳ ጊሻስ ታኒ ታይሳ ናጋቤኬ።

⁷ ታ ሲቆዞ! ኣኔ ታስ ዮታ፤ ኔ ዶርሳ ዉዴ ሄሚዛይ ኣዋኔ? ጋላስ ኣዋፔ ኔ ኢስታ ጉሪሲዛይ ኣዋኔ? ኔና ዴማናስ ኔ ላጌታ ዉዴ ካላሼ ኣይስ ጮ ቶይላቲዛ ማጫሳ ማላ ጊዶ?» ጋዱስ።

ፓንዚ

⁸ «ሃ ማጫ ኡባፌ ኣ ሎኢዛ ማላንቻዬ! ታ ዲዛሶ ኤሮንታ ኣጊኮ ዶርሳቲ ቢዳ ጌዶ ካላዳ ያ፤ ኔ ዴይሻ ላቃታካ ሄንንቻታ ዱንካኔ ማታን ሄማ።»

⁹ «ታ ጎዴ! ጊብጼ ካዎስ ፓራ-ጋሬ ጎቺዛ ፓራታ ጊዶን ዲዛ ማጫ ፓራይ ማላ ሎኣሳ።

¹⁰ ኔ ሻጋላሶይ ሎዡ ጊዴስ፤ ኔ ቆይ ኢንቁ ጌቴቲዛ ሴሎን ኣሌቄቲዴስ።

¹¹ ኑኒ ኔስ ቢራን ኣሌቄቲዳ ዎርቃ ጌጼ ኦሲሳና» ጊዴስ።

ጌላኦያ

¹² «ካዎይ ማዳን ኡቲ ዲሺን ታ ሺቶ ሳዎይ ኬ ጊዶ ኡባን ቱኑ ጊዴስ።

¹³ ታ ሲቆዚ ታ ንታ ጊዶን ዲዛ ሳዊዛ ካርቤ ጹንቴ ማላ።

¹⁴ ታ ሲቆዚ ኤን-ጋዴ ጌቴቲዛ ዎይኔ ቶኪዛ ጋዴን ሞኪዳ ባዞ ጪሻ ማላ» ጋዱስ።

ፓንዚ

¹⁵ «ታ ጎዴ! ኔኒ ኣይ ማላ ሎኣይ! ኔኒ ኣይ ማላ ሎኣይ! ኔ ኣይፌቲ ሃራጴ ማላ ሎኤቴስ» ጊዴስ።

ጌላኦያ

¹⁶ «ታ ሲቆዞ፥ ኔኒካ ኣይ ማላ ሎኣይ! ኔ ኬሃ ሎኣሳ፤ ኑ ሂይ ጪሊላ ማታ ማላ ኡፋይሴስ» ጋዱስ።

ፓንዚ

¹⁷ «ኑ ኬ ቱሲ ሊባኖሴ ዚጋ፤ ካራይካ ጺዳን ኦሴቲዴስ» ጊዴስ።