ዬ ማጻፋ 38 - ጋሞ ማጻፋ

ሃሳኢሶስ ዳዊቲ ዬጺዳ ማዛሙሬ

¹ ኣቤት ጎዳዉ! ኔ ሃንቆን ታና ሴሮፓ፤ ኔ ዪሎን ታና ሙሮፓ።

² ኔ ዎንዳፌ ዪሺ ታና ጫዲዴስ፤ ኔ ኩሼይካ ታና ናቂ ኦይኪዴስ።

³ ኔ ሃንቆፌ ዴንዲዳይሳን ታ ቦላይ ፓዬና፤ ታ ናጋራ ጋሶን ታ ኣሳቴይ ፓፓቲዴስ።

⁴ ታ ቆሆይ ታና ሚቲዴስ፤ ዴጾ ቶሆ ማላ ታና ናቂ ኦይኪዴስ።

⁵ ታኒ ኤያቴን ኦዳ ናጋራ ጋሶን ታ ማዱንይ ጺንቂዴስ።

⁶ ታኒ ሆካዲሲኔ ቁናዲስ። ጋላስ ኩሜ ዬካሼ ፔኣዲስ።

⁷ ታ ኣሾይ ታማ ሚሻ ማላ ጹጌስ፤ ታ ቦላይካ ፓዬና።

⁸ ታኒ ኢጼታዲሲኔ ኒፊፊ ጋዲስ፤ ታ ዎዚናይ ጬጪዳ ጊሻስ ዋሳይስ።

⁹ ኣቤት ጎዳዉ! ታ ኣሞ ኡባ ኔ ኤራሳ፤ ታኒ ጬጪዛይሲ ኔፔ ጌሚቤና።

¹⁰ ታስ ዎዚና ኣይፌን ጉፔስ፤ ታ ዎልቃይ ጪንጊዴስ፤ ታ ኣይፌፔ ፖኦይ ኪቺዴስ።

¹¹ ታ ማዱን ጋሶን ታ ሾሮቲኔ ታ ላጌቲካ ታፔ ባቃቲዳ፤ ታ ዳቦቲካ ታፔ ሃኪዳ።

¹² ታና ዎናዉ ኮይዛይቲ ባንታ ናርጻ ታና ኦይካና ዎዳ፤ ታና ቆሃናዉ ኮይዛይቲ፥ «ናጋሻ፤ ኑኒ ኔና ዴማና» ጊዲ ታ ቦላ ማንዲዳ፤ ጋላስ ኩሜ ታ ቦላ ጌኔን ዱላቲዳ።

¹³ ሄ ዎዴ ታኒ ሲዮንታ ቱሌ ኣሳ ማላ ጊዳዲስ፤ ዶናካ ፖጎንታ ዱዴ ኣሳ ማላ ጊዳዲስ።

¹⁴ ቱማፔ ታኒ ሃይ ሲዮንታ ኣሳ ማላኔ ዶናይ ሃሳዮንታ ኣሳ ማላ ጊዳዲስ።

¹⁵ ጊዶ ኣቲን ኣቤት ጎዳዉ! ታኒ ኔናን ሂዶታ ኦይስ፤ ኣቤት ታ ጎዳዉ! ኔኒ ታስ ዛሮ ኢማ።

¹⁶ ታኒ ጎዳ፥ «ታ ቶሆይ ሃንዳራሺን፥ ታ ሞርኬቲ፥ ‹ኢዛስ ሃሹ› ጋና ማላኔ ታ ቦላ ጬቄታና ማላ ኦፋ» ጋዳ ዎሳይስ።

¹⁷ ታኒ ኩንዳና ማታዲስ፤ ታ ሳኮይካ ፓጾንታ ኢጺዴስ።

¹⁸ ታ ናጋራይ ታና ሜቲዴስ፤ ሄሳ ጊሻስ ታ ቆሆ ታ ኔስ ፓጻይስ።

¹⁹ ታ ሞርኬቲ ጊታኔ ዎልቃማ፤ ታና ጮ ኢጺዛይቲ ጮራ።

²⁰ ታኒ ሎኦ ኦሶ ኦን ታስ ኢታ ዛሪዛይቲ ታኒ ሎኦ ካሊዛ ጊሻስ ታናራ ኤቄቴቴስ።

²¹ ኣቤት ጎዳዉ! ኔ ታና ዬጎፋ፤ ኣቤት ጾሳዉ ታፔ ኔኒ ሃኮፋ።

²² ኣቤት ታና ኣሺዛ ጎዳዉ! ታና ማዳናስ ኤሶታ።