ዬ ማጻፋ 144 - ጋሞ ማጻፋ

ዳዊቴ ማዛሙሬ

¹ ታ ኩሼታ ኦላስ፥ ታ ቢራታካ ጾንጌስ ሎሂሲዳ ጎዳይ ታ ዛላይ ጋላቴቶ!

² ኢዚ ታና ሲቂዛኔ ጌንዛ ጾሳ፤ ኢዚ ታስ ሚጻኔ ታና ኣሺዛይሳ፤ ኢዚ ታ ጎንዳሌኔ ታኒ ባቃታዳ ኣቲዛሶ፤ ካዎቴታካ ኢዚ ታስ ሃሪሲዛይሳ።

³ ኣቤት ጎዳዉ! ኔ ሃይሳ ሲሬ ቦንቻናስ ኣሲ ኣዜ? ኔ ሃይሳ ኣሳስ ቆፓናዉ ኣሳ ናይ ኣዜ?

⁴ ኣሲ ኢሲቶ ጫርኪ ኣዛ ጫርኮ ማላ፤ ኢዛ ላይቲካ ኤሶን ይዛ ኩዋ ማላ።

⁵ ኣቤት ጎዳዉ! ኔኒ ሳላ ዳካዳ ዱጌ ዎ! ዙማታ ቦቻዳ ጩዋሳ!

⁶ ዎልቃን ዬዳዳ ኔ ሞርኬታ ላላ! ኔ ዎንዳፌ ዪሻን ዱካዳ ዬዴ!

⁷ ቦላፌ ኔ ኩሼ ዬዳዳ፥ ታና ዎልቃማ ሃፌ ጎቻ ኬሳ፤ ኣላጋ ኣሳታ ኩሼፔ ኔ ታና ኣሻ።

⁸ ኢስታ ዶናይ ዎርዶ ሃሳዬስ፤ ኢስቲ ኡሻቻ ኩሼ ዴንዲ ዎርዶ ጫቄቴስ።

⁹ ኣቤት ጾሳዉ! ታኒ ኔስ ኦራ ማዛሙሬ ዬጻና፤ ታሙ ሻያን ዋጼቲዳ ዲን ኔስ ዬጻና።

¹⁰ ካዎታስ ጾኖ ኢማሳ፤ ኔ ኣይሌ ዳዊቴ ጊ ማሻፌ ኣሻሳ።

¹¹ ዎርዶ ሃሳይዛይታፔኔ ባ ኡሻቻ ኩሼ ዴንዲ ዎርዶ ጫቂዛይታፔኔ ኣላጋታፔ ታና ኣሻኔ ናጋ።

¹² ኑ ኣቱማ ናይቲ ባ ናቴቴን ዳልቂዳልቂዲ ዲጪዛ ሚ ማላ ጊዴቶ! ኑ ማጫ ናይቲካ ካዎ ኬ ጉላን ኣሌቆስ ኤሲዳ ቱቄ ማላ ጊዴቶ።

¹³ ኑ ጎታራታን ዱማ ዱማ ቆሞ ካ ኩሞ፤ ኑ ዶርሳቲ ሺ ላቃ ጋካናስ ዬሌቶ፤ ሄሜቲዛሶን ታሙ ሺ ጋካናዉ ዳሬቶ።

¹⁴ ኑ ሚዛቲ ዬሊዛይታ ጊዴቶ፤ ኢስቲ ኣዉጫዮንታ ዬሌቲዲ ጮራቴቶ። ኑና ኣሲ ዲኦፖ፤ ኑ ዛጎን ዋሶይ ሲዬቶፎ።

¹⁵ ሃ ኣንጆይ ኢዛ ጋኪዛ ዴሬይ ኣንጄቲዳ ዴሬ፤ ጾሲ ኢዛስ ጎዳ ጊዲዳ ዴሬይ ኣንጄቲዳ ዴሬ።