ዬ ማጻፋ 115 - ጋሞ ማጻፋ

¹ ኣቤት ጎዳዉ! ኑ ጊሻስ ጊዶንታ ኔ ሲቆ ጊሻሲኔ ኔ ኣማኔቴ ጊሻስ ኔ ሱን ቦንቻ።

² ካዎቴቲ ኣይስ፥ «ኢስታ ጾሲ ኣዋን ዲዜ?» ጊዞ?

³ ኑ ጾሳይ ሳሎን ዴስ፤ ኢዚ ባ ዶሲዳይሳ ኡባ ኦስ።

⁴ ጊዶ ኣቲን ኢስታ ኤቃ ጾሳቲ ቢራፔኔ ዎርቃፌ ኣሳ ኩሼን ኦሴቲዳይታ።

⁵ ኢስታስ ዶናይ ዴስ ሺን ሃሳዬቴና፤ ኣይፌይካ ዴስ ሺን ዴሜቴና።

⁶ ኢስታስ ሃይ ዴስ ሺን ሲዬቴና፤ ሲይካ ዴስ ሺን ሲንጌቴና።

⁷ ኢስታስ ኩሼይ ዴስ ሺን ቦቼቴና፤ ቶሆይካ ዴስ ሺን ሄሜቴቴና፤ ኢስታ ፖራንዴይ ጬንጉርስ ኬሴና።

⁸ ኢስታ ሜዛይቲኔ ኢስታን ኣማኔቲዛይቲ ኡባይ ኢስታ ማላ ጊዴቶ።

⁹ ኢንቴኖ ኢስራኤሌ ኣሳቶ! ጎዳን ኣማኔቲቴ! ኢዚ ኢንቴስ ጎንዳሌኔ ኢንቴና ማዲዛዴ።

¹⁰ ኢንቴኖ ኣሮኔ ዜሬቶ! ጎዳን ኣማኔቲቴ! ኢዚ ኢንቴስ ጎንዳሌኔ ኢንቴና ማዲዛዴ።

¹¹ ኢንቴኖ ጎዳስ ያዪዛይቶ! ጎዳን ኣማኔቲቴ! ኢዚ ኢንቴስ ጎንዳሌኔ ኢንቴና ማዲዛዴ።

¹² ጎዳይ ኑስ ቆፔስ፤ ኢዚ ኑና ኣንጃና፤ ኢዚ ኢስራኤሌ ኣሳታኔ ኣሮኔ ዜሬታካ ኣንጃና።

¹³ ጎዳስ ያዪዛይታ ኡባ ጉ ጊዲን ጊታ ኢዚ ኣንጃና።

¹⁴ ጎዳይ ኢንቴናካ ኢንቴ ናይታካ ዳሪሶ!

¹⁵ ሳሎኔ ሳኣ ሜዳ ጎዳይ ኢንቴና ኣንጆ!

¹⁶ ሳሎቲ ጾሳሳ፤ ጊዶ ኣቲን ሳኣ ኣሳ ናይታስ ኢሚዴስ።

¹⁷ ሃይቂዲ ዱጌ ዱፎን ጌሊዳይቲ ጎዳ ጋላታናስ ዳንዳዬቴና።

¹⁸ ጊዶ ኣቲን ኑኒ ሼምፖራ ፓጻ ዲዛይቲ ሃቺፌ ዶሚዲ ሜርና ጋካናስ ጎዳ ጋላታና። ጎዳይ ጋላቴቶ!