ሌሚሶ ማጻፋ 18 - ጋሞ ማጻፋ

¹ ላጌቴ ኮዮንታ ኣሲ ባ ኣሞ ካሌስ፤ ሱሬ ፒርዳካ ኡባ ፓልቄስ።

² ኤያይ ባ ቆፋ ቆንጪሳናሮ ጻላ ዶሴስ፤ ጊዶ ኣቲን ሃራ ኣሳፔ ኤራ ኤካናስ ዶሴና።

³ ኢታቴ ካ ካሌስ፤ ዬላቴ ዪሺን ካዉሻቴ ዬስ።

⁴ ኣሳ ዶናፔ ኬኢዛ ሃሳያይ ጪማ ሃ ማላ፤ ኣ ኤራቴ ፑልቶይካ ጾንጌቲዛ ፒሳ ሃ ማላ።

⁵ ኢታ ኣስ ማዲዲ፥ ጺሎዛ ፒርዳ ጌላሲዛይሲ ሎኦ ጊዴና።

⁶ ኤያ ኣሳ ዶናይ ኢዛ ቦላ ኦሽ ዴንስ፤ ኢዛ ዶናፔ ኬኢዛ ቃላይ ኢዛ ቦላ ዱርቃ ጼይጌስ።

⁷ ኤያ ኣሳ ሃሳያይ ኢዛ ይሴስ፤ ኢዛ ሜቴርሻቲ ኢዛስ ዎጺማዴ ጊዴቴስ።

⁸ ዚጊራንቻ ቃላይ ማልኦ ቁማ ማላ፤ ኣሳስ ዱጌ ማራጬ ጋኬስ።

⁹ ኣዛላ ኣሲ ይሲዛ ኣሳስ ኢሻ።

¹⁰ ጎዳ ሱን ሚኖ ጊምቤ ማላ፤ ጺሎ ኣሲ ሄ ዎጺዲ ኢታፔ ኣቴስ።

¹¹ ዱሬታ ዱሬቴ ኢስታስ ዩሾይ ጊምቤቲዳ ካታማ ማላ፤ ኢስቲ ባንታ ዱሬቴ ኬኤቶንታ ኣዱሳ ጊምቤ ማላ ቆዴቴስ።

¹² ኣሲ ኩንዳናፔ ካሴ ኢዛ ዎዚናይ ኦቶሬቴስ፤ ኣሽኬቴ ቦንቾፌ ሲንቴስ።

¹³ ሎኤ ሲዮንታ ዲሼ ዛሮይ፥ ኢዛዴስ ኤያቴኔ ዬላ ጊዴስ።

¹⁴ ኣሳ ኣያናይ ሃርጌ ዳንዳያና ማላ ማዴስ፤ ጊዶ ኣቲን ኣያናይ ሜቄሬቲቺኮ ኢዛ ኦኒ ዳንዳያኔ?

¹⁵ ኣኬካንቻ ዎዚናይ ኤራቴ ኮዬስ፤ ኣ ኤራንቻ ሃይ ሚን ኮዬስ።

¹⁶ ኢሞታይ ኢሚዛዴስ ኦጌ ዶዬስ፤ ኢዛ ጊታ ኣሳታራካ ኤሪሴስ።

¹⁷ ባልጋራይ ዪዲ ባ ቃላ ኢማና ጋካናስ ካሴቲዲ ዮኦ ሃሳይዳዴይ ጺሎ ሚሳቴስ።

¹⁸ ሳማ ዬሲ ፓላማ ቴቄስ፤ ናምኡ ዎልቃማ ባሊጋራታካ ሻኬስ።

¹⁹ ቆሄቲዳ ኢሻይ ጊምቤቲዳ ካታማፔ ኣ ሚኔስ፤ ኢዛ ፓላማይካ ጊምቤ ፔንጌ ጎርዲዛ ሚኖ ኮላታ ማላ።

²⁰ ባ ዶናን ሃሳይዳዛፔ ኣሲ ባ ኡሎ ኩንስ፤ ባ ኢንጻርሳፌ ኬኢዳ ዮኦን ካሌስ።

²¹ ኢንጻርሳ ቦላ ሃይቆይኔ ዴኦ ዎልቃይ ዴስ፤ ኢዞ ዶሲዛይቲ ኢዚ ኣይፌ ሜቴስ።

²² ማቾ ዴሚዳ ኣሲ ሎኦ ሚሽ ዴሜስ፤ ሄሳዴይ ጎዳፔ ቦንቾ ኤኬስ።

²³ ሂዬሳ ኣሲ ኣዳሺዲ ሃሳዬስ፤ ጊዶ ኣቲን ዱሬይ ቺዲ ዛሬስ።

²⁴ ላጌ ዳርሲዛ ኣሲ ባስ ሜቶ ዳሪሴስ፤ ጊዶ ኣቲን ኢሻፔ ኣዲ ኣማኔቲዛ ላጌይ ዴስ።