ሌዌታ ማጻፋ 12 - ጋሞ ማጻፋ

ማጫሳይ ዬሊዳፔ ጉዬ ጌሾ ዎጋ

¹ ጎዳይ ሙሴስ ሂዝጊዴስ፥

² «ኢስራኤሌ ኣሳስ፥ ‹ማጫሲ ሻራዳ ኣቱማ ና ዬሊኮ ካሴ ማጫሳ ዎጋይ ኢዚ ቦላ ቤቲዳ ዎዴ ሃኒዛይሳ ላፑን ጋላስ ጋካናስ ኢዛ ቱና ጊዳዉስ።

³ ዬሌቲዳ ናዚ ኦስፑን ጋላስ ቃጻሬታናስ ቤሴስ።

⁴ ሄሳፌ ጉዬ ጋጪኖ ሱይ ኢዚፔ ኤቃና ጋካናሲኔ ኢዛ ዬሎሶፌ 33 ጋላስ ጋካናስ ጾሳስ ዱማቲዳ ኣይ ሚሺካ ቦቻናስ ቤሴና፤ ሄሲካ ኢዛ ጌይዛ ዎዴይ ዉሮንታ ዲሺን ጋይቶቴ ዱንካኔ ጊዶ ጌሉፑ።

⁵ « ‹ሄሳካ ኢሲ ማጫሲ ማጫ ና ዬሊኮ ካሴ ቦላ ቂታይ ኢዚ ቦላ ቤቲዳ ዎዴ ሃኒዛይሳ 14 ጋላስ ጋካናስ ቱና ጊዳዉስ፤ ሄሳፌ ጉዬ ሱይ ኢዚፔ ሲሚን ኢዛ ዬሎሶፌ 66 ጋላስ ጋካናስ ጋምኡ።

⁶ « ‹ኢዛ ጌይዛ ጋላሳቲ ዉሪዛ ዎዴ ኣቱማ ና ጊሻስ ጊዲን ዎይኮ ማጫ ና ጊሻስ ጹጌቲዛ ያርሾስ ኢሲ ላይ ላቃኔ ናጋራፔ ጌያናስ ሺቂዛ ያርሾስ ሃራጴ ዎይኮ ሃራጴ ጪዬ ጋይቶቴ ዱንካኔ ፔንጌ ኤሃዳ ሄን ኦዛ ቄሴስ ኢሙ።

⁷ ቄሴዚካ ኢዛ ኢሚዛይሳ ኢዚፔ ኤኪዲ ጎዳስ ያርሾ ሺሾ፤ ማጫሳያካ ኢዛ ዬሊሺን ኢዚፔ ጉኪዳ ሱፌ ጌያዉስ፤ ሃይሲ ኣቱማ ና ዎይኮ ማጫ ና ዬሊዛ ማጫሳስ ዎዳ ዎጋ።

⁸ ዬሊዳ ማጫሳያ ዶርሳ ላቃ ኤሃናስ ዳንዳዮንታሮ ጊዲኮ ናምኡ ሃራጴታ ዎይኮ ናምኡ ዋኖሴታ ኤሁ፤ ናምኣታፔ ኢሶይ ጹጌቲዛ ያርሾስ፥ ሃንኮይሲ ናጋራ ጌሾስ ያርሾ ሺቆ፤ ቄሴዚካ ኢዞ ናጋራፔ ጌሾ፤ ሄሳፌ ጉዬ ኢዛ ጌሽ ጊዳና› ጌስ።»