ኢዩኤሌ ቲንቢቴ 1 - ጋሞ ማጻፋ

ቦሌይ ጋዳ ቆሆ

¹ ሲንፌ ሃናናይሳ ጾሲ ኢዩኤሌስ ዮቲዳ ቃላይ ሃይሳ፤

² ኢንቴ ጪማቲ ሃይሳ ሲዪቴ፤ ዩሁዳ ዴሬን ዲዛይቲ ዉሪካ ሃይሳ ኤዝጊ ሲዪቴ። ሃይሳ ማላ ሃኖይ ካሴ ኢንቴ ዎዴ ጊዲን ዎይኮ ካሴ ኢንቴ ኣዋታ ዎዴ ሃኒ ኤሪዜ?

³ ኢንቴ ሃይሳ ኢንቴ ናይታስ ዮቲቴ፤ ኢንቴ ናይቲ ቃሴ ባንታ ናይታስ ዮቴቶ፤ ናይታ ናይቲካ ካሊዛ ዬሌታስ ዮቴቶ።

⁴ ጎንዶይ ሚሺን ኣቲዳ ካ ቢታ ማቴ ቦሌይ ሚዴስ፤ ኢዛፔ ኣቲዳይሳ ኡሾ ጫርኮ ሾጪዛ ዲኦ ማላ ቦሌይ ይሲዴስ፤ ኢዛፔ ኣቲዳይሳ ቃሴ ጉምባሮይ ሚዴስ።

⁵ ሄሳፌ ጉዬ ዎይኔ ኡሹ ኢንቴ ዴሞንታ ጊሻስ ዬኪቴ፤ ኢንቴኖ ማቲዛይቶ! ኢንቴ ስኪዛሶፔ ቤጊዲ ዋሲቴ፤ ኢንቴኖ ዎንታን ዎንታን ዎይኔ ኡሹ ኡዪዛይቶ! ጫሞ ዬሆ ዬኪቴ።

⁶ ቆዳይ ባይንዳ ቦሌይ ኦላ ኣሳ ማላ ታ ዴሬዛ ቦላ ዪዴስ፤ ኢዛ ኣቻይ ጋሞ ኣቻ ማላ፤ ኢዛ ጋጊና ኣቻይ ማጫ ጋሞ ጋጊና ኣቻ ማላ።

⁷ ታ ዎይኔ ሚ ኣይፌዛ ሙሌራ ይሲዴስ፤ ባላሴ ጌቴቲዛ ሚ ኡባ ሜንሬዴስ፤ ሚ ሃጋቲ ሙሌራ ቦጻና ጋካናስ ፖቆዛ ሙሌራ ፖቂ ዴንቺዴስ።

⁸ ሄሳ ጊሻስ ኢዞ ኤካና ጊግሲዳይሲ ሃይቂን ማቃ ማይኣዳ ዬኪዛ ጌላኦይ ማላ ኢንቴካ ዬኪቴ።

⁹ ጎዳ ኬን ያርሾስ ሺቃና ካ ጊዲን ዎይኮ ዎይኔ ኡሻይ ባይንዳ ጊሻስ ጎዳስ ኦዛ ቄሴቲ ዬኬቴስ።

¹⁰ ጎዪዲ ዜሪዳ ካይ ሜሊ ዪን ዎይኔ ሚይ ቶኬቲዲ ሜሊዳ ጊሻስ ዛይቴይ ይዴስ፤ ሄሳ ጊሻስ ቢታያ ዬካዉስ።

¹¹ ጊስቴይኔ ባንጋይ ሃራይካ ቦኔ ካ ዉሪካ ይዳ ጊሻስ ኢንቴኖ ጎሻንቻቶ ጬጪቴ፤ ኢንቴኖ፥ ዎይኔ ሚታ ጎዳቲካ ዬኪቴ።

¹² ዎይኔ ሚቲኔ ባላሴ ሚቲ ሹሊዳ፤ ኦሮማኔኔ ቴሚሬ ሚቲ፥ ላዴይኔ ሃራ ኣይፌ ኣይፊዛ ሚቲ ዉሪካ ሜሊዳ፤ ሄሳ ጋሶን ኣዳፌ ኡፋይሲ ኣሳፔ ሃኪዴስ።

¹³ ኢንቴ ኢንቴ ጾሳ ያርሾ ሺሺዛ ካ ጊዲን ዎይኮ ዎይኔ ኡሺ ባይንዳ ጊሻስ ኢንቴኖ ታ ጎዳ ኦሳንቻታ ጊዲዳ ቄሴቶ! ኣኔ ሃ ዪዲ ማቃ ማይኢዲ ኩሜ ኦማርስ ዬኪቴ። ኢንቴኖ ያርሾ ያርሺዛሶን ኦዛይቶ! ኢንቴ፥ «ዉ! ዉይ!» ጊ ዋሲቴ።

¹⁴ ዱማ ጾማ ጋላስ ኣዋጂቴ፤ ኣያና ሺቆስ ኣሳ ጼይጊቴ፤ ዴሬን ዲዛ ጪማታኔ ኣሳ ኡባ ኑ ጎዳ ኬን ሺሺዲ ፑዴ ጎዳኮ ዋሲቴ።

¹⁵ ኣዬ ኣና! ጎዳ ጋላሲ ማቲዴስ። ኡባ ዳንዳይዛ ጾሳይ ይሲዛዝ ኤሂዛ ጋላሲ ጋኪዴስ። ሄ ጋላሳይስ ኣዬ ኣና!

¹⁶ ካ ኑ ሲንፌ ይዴስ፤ ኡፋይሲኔ ኢሊሲ ኑ ጾሳ ኬፌ ሙሌ ይዴስ።

¹⁷ ዜሬቲዳ ካይ ዉሪ ቢታ ጋርሳን ዎቂ ይዴስ፤ ካ ቢታፌ ይዳ ጊሻስ ካሴ ካ ዎዛ ሚሻቲ ዉሪካ ሜላ ዴቴስ። ጎታራቲካ ላሌቲዳ።

¹⁸ ሜሄይ ሚዛ ማታይ ጋዴን ባይንዳ ጊሻስ ሜሄቲ ኮሻቲዲ ዋሴቴስ፤ ዶርሳ ዉዴቲካ ማታይ ዪን ዳሮ ዋዬ ቦላ ዴቴስ።

¹⁹ ጎዳዉ! ዴምባ ማታ ኡባ ታማይ ሚዳ ጊሻስ ዎራ ሚካ ታማይ ሚዳ ጊሻስ ታ ኔኮ ዋሳይስ።

²⁰ ሻፋቲ ሜሊዳ ጊሻስ ዴምባን ዲዛ ማታይ ዉሪካ ጹጌቲዳ ጊሻስ ዎራ ዶኣቲካ ኔኮ ዋሴቴስ።