ኢዮቤ ማጻፋ 7 - ጋሞ ማጻፋ

¹ «ኣሳስ ቢታ ዱሳይ ባጼ ዱስ ዴኔ? ኢስታስ ጋላሳይካ ኡኔ ኦዛ ኦሳንቻታ ጋላሳ ማላ ጊዴኔ?

² ኢስቲካ ኩዋ ጋርሳን ሼምፓናስ ኣሞቲዛ ኦሳንቻታኔ ባ ዳሞዛ ኤካናስ ናጊዛ ኡኔ ኣሳ ማላ ጊዴቴኔ?

³ ታ ዳቡርዳ ኣጊናቲ ታስ ጎኣይ ባይንዳይታ ጊዲዳ፤ ሜቶ ኦማርሳቲካ ታስ ቆፋ ኦማርስ ጊዲዳ።

⁴ ኢቺዛ ዎዴ ኣዉዴ ዴንዳንዲናሻ ጋዳ ቆፓይስ፤ ኦማርሳይካ ጊዲኮ ታስ ጌዴ ኣዱቄስ፤ ታኒካ ዎንታና ጋካናስ ሃ ሄ ሺሬታሼ ኣቃይስ።

⁵ ታስ ኩሜ ኣሳቴይ ጉጹኔን ኩሚዴስ፤ ታስ ኣሾይካ ማዱንጺ ጎጊዴስ፤ ታስ ማዱንይካ ቂዲ ኡዛዜስ።

⁶ ታ ላይታ ጋላሳቲ ዳ ሞቄ ጾንጌፌ ኤሶቴቴስ፤ ኢሲ ሂዶታይ ባይንዳ ዉርሴ ጋኬቴስ።

⁷ ታ ጎዳዉ! ታ ሼምፖያ ፔኖ ማላ ጊዲዳይሳ ቆፓ፤ ሃይሳፌ ጉዬ ኡባካ ሎኦ ሚሽ ዴሚኬ።

⁸ ሃኢ ታና ቤኢዛይሲ ናምኣን ዛሪዲ ቤዬና፤ ኢዚ ኮይዛ ጊዲኮካ ታና ዴማናዉ ዳንዳዬና።

⁹ ሻራይ ላሌቲ ይዛይሳ ማላ ሃይቂዲ ዱፎን ቢዛ ኣሲ ሃ ሲሚዲ ዬና።

¹⁰ ናምኣን ዛሪዲ ባሶ ሲሜና፤ ኢዛዴ ኤሪዛይቲ ኡባይ ኢዛ ባሌታና።

¹¹ «ሃይሳፌ ጉዬ ጮኡ ጊኬ! ታስ ኣያናይ ጬጪዳይሳፌ ዴንዲዳይሳን ታ ሃሳያይስ፤ ታ ሼምፖያ ኢራዬቲዳ ጊሻስ ዙዙማይስ።

¹² ሃይሳ ሊኬ ናጌቲዛዴ ኔ ታና ኦዳይ ታኒ ኣባዬ? ዎይኮ ኣባ ጊዶን ዲዛ ዶኣዬ?

¹³ ታ ሂጻይ ታና ሚንስ፤ ታ ኢቺዛሶይ ታ ሳኮዛ ባሌስ ጋዳ ታ ቆፓዲስ።

¹⁴ ኔኒ ጊዲኮ ታና ኣጉሞን ያሺሳሳ፤ ኣጁታንካ ዳጋንሳ።

¹⁵ ሃይሳ ሜቶይ ዳሪዳ ኣሳቴ ቶካዳ ዳናፔ ታ ጩሌታ ሃይቃናይሳ ዶራይስ።

¹⁶ ሂዶታ ቃንጻዲስ፤ ዳናስካ ታ ኮይኬ፤ ታስ ላይይካ ቃን ጊዲዳ ጊሻስ ታና ኣጋጋ።

¹⁷ «ኔ ሶሆ ኢማናሲኔ ቆፓናስ ኣሲ ኣዜ?

¹⁸ ዎንታን ዎንታን ፒልጋና ማላ፥ ዎዴን ዎዴንካ ኔ ፓጫና ማላ ኣሲ ኣዜ?

¹⁹ ጩች ሚቲዛ ጉ ዎዴካ ታስ ኢሚኪ?

²⁰ ኣሳ ካሌቲዛ ጎዳዉ! ታኒ ናጋራ ኦይሳን ኔኒ ኣይ ቆሄታዲ? ኣይስ ታ ቦላ ኔ ቶራ ዛራዲ? ኣይስ ሃይሳ ኬና ታ ኔና ዴጻዲና?

²¹ ኡባካ ታ ናጋራ ኣቶ ጊኪ? ታ ኦዛ ቆሆ ታፔ ዲጊኪ? ታ ዱፎን ጌላና ዎዴይ ጋኪዴስ፤ ሃይሳፌ ጉዬ ኔ ታና ኮዪዳኮካ ታ ቤቲኬ።»