ኢዮቤ ማጻፋ 23 - ጋሞ ማጻፋ

ኢዮቤ ሃሳያ

¹ ኢዮቢካ ሂዝጊ ዛሪዴስ፤

² «ሃኢካ ታ ዎዚናይ ጫሞ ቆፋኒኔ ዙዙንን ኩሚዴስ፤ ጌንጬጫን ታ ዎሲንካ ኢዛ ኩሼይ ታ ቦላ ዴጺዳ ማላ ዴስ።

³ ኢዚ ዲዛሶታ ኤሪዳኮ ኣይ ማላ ዶሳዚናሺን፤ ጌዴ ኢዚ ዲዛሶ ጋኪዳኮ ታ ኣይ ማላ ኡፋዬታኔሺን፤

⁴ ታ ማጋና ታ ኢዛስ ሺሻናኮሺን፤ ታ ሚሻዛ ማራራ ታ ኢዛስ ሺሻናኮሺን።

⁵ ታስ ኢሜቲዛ ዛሮዛካ ታ ኤራናኮሺን፤ ታና ኢዚ ኣይ ጋናኮ ታ ኤራናኮሺን።

⁶ ሂስቲን ጾሲ ባ ጊታ ዎልቃራ ታና ፒርዳንዴሻ? ኣካይ፤ ታ ጊዛይሳ ኢዚ ኤዝጋና።

⁷ ሄንካ ሱሬ ኣሲ ኢዛራ ማርሼታና፤ ታስ ፒርዲዛ ጾሳይ ሜርናስ ታና ናጻ ኬሳና።

⁸ «ጊዶ ኣቲን ታ ኣርሼይ ሞኪዛ ባጋ ቢኮ ሄን ኢዚ ዴና፤ ኣርሼይ ዉሊዛ ባጋካ ሲሚኮ ኢዛ ዴማናዉ ዳንዳይኬ።

⁹ ኢዚ ጊዲኮ ፑዴሃን ባ ኦሳ ኦስ፤ ታኒ ጊዲኮ ኢዛ ቤያናዉ ዳንዳያቤኬ፤ ዱጌ ባጋ ሲማዳካ ኢዛ ዴማናዉ ዳንዳያቤኬ።

¹⁰ ኢዚ ታ ታንጎ ኡባ ኤሬስ፤ ታና ኢዚ ፓጪኮካ ታኒ ዎርቃ ማላ ጌሽ ጊዳ ዲሺን ኢዚ ታና ዴማና።

¹¹ ታ ቶሆቲ ኢዚ ዶሲዛ ኦጌታራ ቤቴስ፤ ባሌን ሃዲርሲካ ኡሻቺካ ጊኬ።

¹² ታኒ ኢዛ ኣዛዞታፔ ኬኢኬ፤ ኢዛ ቃላካ ታ ሚዛ ቁማፔካ ኣዳ ታ ዎዚናን ናጋዲስ።

¹³ «ኢዚ ባርካ ባና ዳንዳይ ዴስ፤ ኢዛራ ኤቄታናይ ዴና፤ ኢዚ ባ ዶሲዳይሳ ኡባ ኦሶ ዳንዳዬስ።

¹⁴ ታ ቦላ ኢዚ ቆፒዳይሳ ኡባ ፖላና፤ ሃይሳ ሚሳቲዛ ዳሮ ቆፋቲ ዴቴስ።

¹⁵ ሄሳ ጊሻስ ኢዛ ሲንን ኤቆይ ኬሂ ያሼስ፤ ታ ሃይሳ ቆፓዳ ያያዲስ።

¹⁶ ጾሲ ታስ ዎዚናይ ዳቡራና ማላ ኦዴስ፤ ኡባ ዳንዳይዛ ጾሳይ ታና ዳጋንዴስ።

¹⁷ ጊርዲ ጊዳ ማይ ታ ኣይፌታ ጎዚኮካ፤ ሳካና ማይ ታ ሃሳዮንታ ማላ ታና ዲጊቤና።