ኢዮቤ ማጻፋ 21 - ጋሞ ማጻፋ

ኢዮቤ ሃሳያ

¹ ኢዮቢካ ሂዝጊ ዛሪዴስ፤

² «ኣኔ ታ ሃሳያ ዎዚናፔ ኤዝጊቴ፤ ሃይሲ ኢንቴ ታና ሚንዳ ማላ ኢንቴስ ቆዴታና።

³ ኢሲቶ ሃሳያና ማላ ታስ ጊሺ ኢሚቴ፤ ሄሳፌ ጉዬ ኢንቴ ኮዪዳ ማላ ታና ቂናዉ ዳንዳዬታ።

⁴ «ታኒ ኣሾ ማይኢዳ ኣሳ ቦላ ሚሼታዚና? ሂስቲን ታስ ዳንዳዮንታ ኣጊኮ ኢዛን ኣዚ ማላሊሲዜ?

⁵ ኣኔ ታኮ ሃ ጼሊቴ፤ ሃሳያይ ኢንቴና ጾናናሼ ጋካናስ ታ ሃኖዚ ኢንቴና ሻጴስ።

⁶ ታኒ ቆፒሺን ታናካ ዳጋንስ፤ ታ ኣሳቴካ ያሻን ኮኮሪሴስ።

⁷ «ኣይስ ኢታ ኣሳታ ላይይ ኣዱቂዲ ኢስታ ሃሮይካ ዳሪዲ ቢታ ቦላ ዲዜ?

⁸ ኣይስ ኢስታ ናይቲኔ ናይታ ናይቲ ዲጪዲ ሎኢ ዲሺን ቤዪዞ?

⁹ ኢስቲ ኣይኮ ሂርጋይ ባይንዳ ሳሮን ዴቴስ፤ ጾሳፌ ቦሻይ ኢስታ ቦላ ጋኪ ኤሬና።

¹⁰ ኢስታ ሜሄቲካ ኢሲ ሜቶይ ባይንዳ ዬሌቴቴስ፤ ኢስታስ ሚዛቲካ ኣዉጫዮንታ ዬሌቴስ።

¹¹ ባንታ ናይታ ዶርሳ ዉዴ ማላ ሄሜቴስ፤ ኢስታ ናይቲካ ጉፒ ጉፒ ካኤቴስ።

¹² ካራቤ ባቂሼ፥ ዲ ዲጺሼ፥ ዲንኬ ፑኒሼ ኡፋይሳን ዬጼቴስ።

¹³ ባንታ ላይ ዎጌቴኒኔ ኡፋይሳን ኣቴስ፤ ዋዬቶንታ ሃ ቢታፌ ሃይቆን ሻኬቴቴስ።

¹⁴ «ሄሲ ሄሳ ጊዲ ዲሺን ኢስቲ ጾሳ፥ ‹ኑፔ ሃካ፤ ኔ ኦጌ ኤራናስ ኑ ኮዮኮ› ጌቴስ።

¹⁵ ‹ኑ ኢዛስ ጎይናና ማላ ኡባ ዳንዳይዛ ጾሳይ ኢዚ ኦኔ? ኑ ኢዛ ዎሲን ኢዚ ኑና ኣይ ማዳኔ?› ጌቴስ።

¹⁶ ኢስቲ ሄሳ ጊዛይ ኢስታ ኩሼን ዲዛ ሃሮይ ዉሪ ኢስታ ዎልቃን ኢስታስ ሺቂዳ ሚሳቲዛ ጊሻሳ። ታኒ ጊዲኮ ኢታ ኣሳታ ቆፋ ኤኪኬ።

¹⁷ «ሂስቲን ኢታ ኣሳታስ ጾምፔይ ቶኢ ኤሪዜ? ቦሻይ ኢስታ ቦላ ጋኪ ኤሪዜ? ጾሲካ ኢስታ ቦላ ሃንቄቲ ኤሪዜ?

¹⁸ ኢስቲ ሃፓ ማላ ጫርኮን ቢዳሶይ ጉዱላ ማላ ጎቴ ጫርኮን ኢስቲ ፒቴቲ ይዳ ዎዴይ ዲዜ?

¹⁹ ኢንቴ፥ ‹ኣዋቲ ቆሂዳ ቆሆን ጾሲ ናይታ ሃንቄቴስ› ጌታ፤ ኣኔ ጾሲ ናጋራንቻታ ቃጻዮ፤ ሄሳ ሃንኮ ባንታ ቆሆ ኢስቲ ኣኬካናዉ ዳንዳዬቴስ።

²⁰ ናጋራንቻቲ ባንቲ ኦዳ ቆሆን ባንታ ቂጻቴ ኤኬቶ፤ ኡባ ዳንዳይዛ ጾሲ ባ ሃንቆዛ ኢስታ ቦላ ኤሆ።

²¹ ኣሲ ሃይቂዳፔ ጉዬ ባ ናይታስ ቆፒ ኤሪዜ?

²² «ጾሲ ጊታ ኣሳታ ቦላካ ፒርዳና፤ ሂስቲን ኣሲ ኢዛ ፒርዳ ታማርሳና ዳንዳይዜ?

²³ ኢሲ ኢሲ ኣሳቲ ባንታ ላይ ዉርሴ ጋካናስ ኣይኮ ሜቶይ ኢስታ ቦላ ጋኮንታ ሚኖታኔ ሃርጌይ ባይንዳይታ ጊዲዲ

²⁴ ኢስታ ቦላይ ኦርዲዲ ካይሺዳ ማላ፥ ኢስታ ሜቄይካ ሺጪዳ ማላ ሃይቄቴስ።

²⁵ ሃራቲ ጊዲኮ ዪሎኔ ጫሞን ኩሚዳ ማላ ሜቶን ኦይኬቲዳ ማላ ኣይኮ ሎኦ ሚሽ ቤኦንታ ሃይቄቴስ።

²⁶ ኡባይካ ዱጌ ዱፎን ጌሊዲ ቢታ ጊዴቴስ፤ ጉጹኔይካ ኢስታ ላታና።

²⁷ «ቤኢቴ! ታና ቆሃናስ ቆፒዲ ኢንቴ ቃቺዳ ጌኔዛ ታ ኤራይስ።

²⁸ ኢንቴ፥ ‹ሃይሳ ጊታ ኣዳሶይ ኣዋኔ? ናጋራንቻዛ ዱሳሶይ ኣዋኔ?› ጌታ።

²⁹ ማንዳራ ኣሳታ ኦይቺቤኬቲ? ኢስቲ ኢንቴስ ማርካቲዳ ማርካቴ ኢንቴ ኤኬኬቲ?

³⁰ ሄይቲ፥ ‹ኢታ ኣሳታ ቦላ ቦሻይ ዪዛ ዎዴ ቆሆይ ኢስታ ጋኬና፤ ጾሳ ሃንቆይ ቆንጪዛ ዎዴ ኢስቲ ኣቲ ባና› ጊዲ ሃሳይዳ።

³¹ ኢታ ኣስ ኢዛ ኢታቴ ጊሻስ ዋላሲዛይ ኦኔ? ኢታ ኦሶዛ ጊሻስ ኢዛ ቃጻያናይ ኦኔ?

³² ኢዚ ሃይቂዳፔ ጉዬ ኢዛ ኣሃ ቶኪ ኤኪዲ ዱፎን ኤፌቴስ፤ ኢዛ ዱፎይካ ናጌቴስ።

³³ ሾባን ዲዛ ቢታይ ኢዛስ ጊጋ ጊዴስ፤ ኣሳቲ ኡባይካ ኢዛ ካሌቴስ፤ ኣዳፌ ዳሮ ኣሳቲካ ኢዛፔ ሲንራ ቤቴስ።

³⁴ «ሂስቲን ኢንቴ ሃዳ ጊዲዳ ዮኦራ ታና ሚንናስ ኣይስ ቆፔቲ? ኢንቴ ታስ ኢሚዛ ዛሮቲ ኡባይ ዎርዶ።»