ኢዮቤ ማጻፋ 11 - ጋሞ ማጻፋ

ዞፋሬ ሃሳያ

¹ ናኢማኔ ዴሬ ኣስ ዞፋሬይ ሂዝጊዴስ፤

² «ሃይሳ ሃ ሃዳ ቃላታስ ኡባስ ዛሮ ኢሚዛይ ባዬ? ኣሲ ሃሳያ ዳሮን ጺሎ ጊዳና ዳንዳይዜ?

³ ኢዮቤ! ኔ ሃሳይዳ ሃዳ ሃሳያታስ ዛሮይ ኢሜቶንታ ሚሳቲዜ? ኔ ሃይሳ ማላ ቂልጪሺን ኔና ሴራና ኣሲ ባይንዳዝ ሚሳቲዜ?

⁴ ኔ ቆፋን፥ ‹ታኒ ጺሎ› ጋሳ፤ ጾሳስካ፥ ‹ኔ ሲንን ታኒ ጌሻ› ጋሳ።

⁵ ጾሲ ኔስ ሃሳይዳኮኔ ሊኬ ዛሮ ኢሚዳኮ ኣዜ ዲዛይ!

⁶ ኤራቴስ ኦጌይ ዳሮ ጊዲዳ ጊሻስ፥ ጾሳይ ኔስ ኤራቴ ጹራ ቆንጪሲዳኮ ኣዜ ዲዛይ! ሄሳ ጊሻስ ጾሲ ኔና ቃጻዪዛይ ኔስ ቤሲዛይሳፌ ጉራ ጊዲዳይሳ ኤራ።

⁷ «ኔኒ ጾሳስ ጪማ ጊዲዳ ጹራ ኤራናስ ዳንዳያይ? ኡባ ዳንዳይዛ ጾሳ ፒልጋዳ ጋካናዉ ዳንዳያይ?

⁸ ኢዛ ጊታቴይ ሳሎፔ ቦላ፤ ኔኒ ኣይ ኦናዉ ዳንዳያይ? ኢዛ ጪማቴይካ ሲኦሌፔካ ዚቃ፤ ኔኒ ኣይ ኤራይ?

⁹ ጾሳ ጊታቴይ ቢታፌ ዳሬስ፤ ኣባፌ ኣኬስ።

¹⁰ ጾሲ ዪዲ ቃቺኮ፥ ጌዴ ፒርዳ ኬ ሺሺዳኮ ኦኔ ኢዛ ዲጋናይ?

¹¹ ጾሲ ጎኦንታ ኣሳታ ኤሬስ፤ ኢዚ ቆሆ ቤዪሼ ጮኡ ጊዲ ጼሌና።

¹² ኤያ ኣሲ ኤራንቻ ጊዳናፔ ሃሬይ ኣስ ጊዲዲ ዬሌታናይሲ ካዉያና፤

¹³ ጊዲኮካ ኔኒ ኔ ዎዚና ሱሪሲኮ፥ ኔ ኩሼዛ ሚጫዳ ፑዴ ጾሳኮ ዎሲኮ፥

¹⁴ ኔኒ ናጋራፔ ሃኪኮ፥ ኢታ ሚሺካ ኔሶን ቤቶንታ ማላ ኔ ኦኮ፥

¹⁵ ሄ ዎዴ ቁ ጋዳ ዬላይ ባይንዳ ኡባ ሚሽ ኔ ቤያና፤ ዬላይ ባይንዳ ሚና ኤቃናዉ ዳንዳያሳ።

¹⁶ ኔ ሜቶዛ ኡባ ኔ ዶጋና፤ ኔ ኣኬኪዛይካ ኣ ቢቺዳ ሃሮ ሃ ማላ ጊዳና።

¹⁷ ኔ ሼምፖያ ሴታ ጋላሳ ኣዋፔ ኣዳ ፖኣና፤ ማይካ ዎንታ ፖኦ ማላ ጊዳና።

¹⁸ ኔስ ሂዶታይ ዲዛ ጊሻስ ኔኒካ ኣማኔታዳ ዳና፤ ጾሲ ኔና ናጊዛ ጊሻስ ኔኒ ሂርጋይ ባይንዳ ዎፑ ጋዳ ዳና።

¹⁹ ኔ ኦናስካ ባቦንታ ኢቻና፤ ዳሮ ኣሳቲካ ኔ ሲንን ቦንቾ ዴማናስ ኮያና።

²⁰ ኢታታ ኣይፌይ ቆቃና፤ ኢስቲ ኣታና ኦጌቲ ኡባይ ጎርዳ ጊዳና፤ ኢስታ ዉርሴይካ ሃይቆ።»