ኢሳያሳ ቲንቢቴ 2 - ጋሞ ማጻፋ

ሜርና ሳሮ (ሚኪ 4፡1-3)

¹ ኣሞጼ ና ኢሳያሲ ዩሁዳ ዴሬ ጊሻሲኔ ዬሩሳላሜ ካታማ ጊሻስ ቤኢዳ ኣጁታይ ሃይሳ።

² ዎዴ ዉርሴን ጾሳ ኬ ኢዛ ቦላ ኬጼቲዳ ዙማይ ሃራ ዙማ ኡባፌ ቂ ቤታና። ዙምቡላታ ኡባፌ ቁ ቁ ጋና፤ ኡባ ካዎቴቲ ሄ ጎቻና።

³ ዳሮ ኣሳይ ዪዲ፥ «ዎጋይ ጺዮኔፔ፥ ጎዳ ቃላይ ዬሩሳላሜፔ ኬዚዛ ጊሻስ ሃ ዪቴ! ጎዳ ዙማ፥ ያቆቤ ጾሳ ኬ ኣኔ ፑዴ ኬዞስ። ኢዚ ኮይዛይሳ ኑኒ ባና ማላ ኢዚ ኑና ባ ኦጌ ታማርሳና» ጋና።

⁴ ኢዚ ካዎቴታ ጊዶን ፒርዳና፤ ዳሮ ኣሳታ ጋርሳን ዲዛ ፓላማ ኢዚ ዲጋና። ኢስቲ ባንታ ጊ ማሻ ማራሻ፥ ባንታ ቶራካ ባጫ ቆጺ ኬሳና። ዴሬይ ዴሬ ቦላ ማሻ ዴንና፤ ሄሳፌ ጉዬ ኢስቲ ኦላ ታማሬቴና።

⁵ ኢንቴኖ ያቆቤ ዛሬቶ! ሃ ዪቴ! ኣኔ ጎዳ ፖኦን ሲሜሬቶስ።

ጎዳ ጋላስ

⁶ ጎዳዉ! ኔኒ ኔ ኣሳ ያቆቤ ዛሬታ ኣጋዳሳ። ኢስቲ ኣርሼይ ሞኪዛ ባጋራ ዲዛ ኣሳታ ማላ ቢታን ኩሚዳ፤ ፊሊስጼሜ ኣሳ ማላ ሙሬኔቴስ። ኢስቲ ኣላጋራ ኢሲፌ ዙፔቴቴስ።

⁷ ኢስታ ቢታን ቢራይኔ ዎርቃይ ኩሚዴስ፤ ኢስታ ዱሬቴስ ዛዋይ ባዋ፤ ኢስታ ቢታን ፓራይ ኩሚዴስ፤ ኢስታ ፓራ-ጋሬታስ ዛዋይ ዴና።

⁸ ኢስታ ቢታን ኤቃ ጾሳቲ ኩሚዳ፤ ባንታ ኩሼን ኦ ኬሲዳ ሚሻስ ጎይኔቴስ።

⁹ ሄሳ ጊሻስ ኣሲ ኡባይ ዚቂ ጋናኔ ካዉያና። ኢስታ ቆሆ ኣቶ ጎፓ።

¹⁰ ያሺሲዛ ጎዳ ሃንቆፌኔ ኢዛ ቴማፔ ኣታናስ ዛላታኮ ቢዲ ቢታ ጊዶን ቆቴቲቴ!

¹¹ ኦቶራንቻ ኣይፌይ ጉካና፤ ሞቲዛይቲ ካዉያና፤ ሄ ዎዴ ጎዳይ ጻላ ቁ ቁ ጋና።

¹² ኡባፌ ዎልቃማ ጎዳይ ኦቶራንቻታ፥ ሞቲዛይታኔ ጬቄቲዛይታ ካዉሻናስ ጋላስ ባሪ ዎዴስ።

¹³ ኣዱሲኔ ቃ ጊዲዳ ሊባኖሴ ዚጋታኔ ባሳኔ ዎላታ ኡባ፥

¹⁴ ጊታ ዙማታኔ ቃ ዙምቡላታ ኡባ፥

¹⁵ ካታማ ናጊዛ ኣዱሳ ሚጻታኔ ካታማ ዩሾን ዲዛ ሚኖ ጊምቤታ ኡባ፥

¹⁶ ታርሴሴ ማርካቤታኔ ቦንቾ ዎጎሎታ ኡባ ኢዚ ካዉሻና ዎዴይ ዴስ።

¹⁷ ሞቲዛዴይ ካዉያና፤ ኦቶራንቻይ ኩንዳና፤ ሄ ጋላስ ጎዳይ ጻላ ቁ ቁ ጋና፤

¹⁸ ኤቃ ጾሳቲ ኡባይ ሙሌራ ያና።

¹⁹ ጎዳይ ሃይሳ ቢታ ቃናስ ዴንዲዛ ዎዴ ያሺሲዛ ጎዳ ሃንቆፌኔ ኢዛ ቴማፔ ኣታናስ ኣሳይ ቆቴታናስ ሹቻ ጋርሲኔ ኦላይ ዲዛሶ ባቃታና።

²⁰ ሄ ጋላስ ኣሳይ ጎይናናስ ሜዳ ባንታ ቢራ፥ ዎርቃ ሚስሌታ ጊሮሲኔ ካፎታስ ኦላና።

²¹ ጎዳይ ሃ ቢታ ቃናስ ዴንዲዛ ዎዴ ኢዛ ያሺሴፌኔ ኢዛ ቴማፔ ዴንዲዳይሳን ሹቻ ጎንጎሎይኔ ዛላ ዛኣይ ዲዛሶ ባቃታና።

²² ሼምፖይ ሲራ ኬዚን ኣሃ ጊዲዛ ኣሳን ኣማኔቶፍቴ፤ ኣሲ ኣይ ማዳኔ?