ሆሴኤ ቲንቢቴ 3 - ጋሞ ማጻፋ

ሆሴኤይ ባ ማቼይራ ማቃይኒዴስ

¹ ጎዳይ ታና፥ «ኢስራኤሌ ኣሳይ ሃራ ጾሳታኮ ሲሚዲ ዛቢቤ ኡኬ ሺሻና ኮዪዴስ፤ ሄሳራካ ጎዳይ ኢስታ ሲቂዛይሳ ማላ ኔካ ባዳ ባ ላጌታ ሲቃዳ ላይማታሼ ዲዛ ካሴ ኔ ማቼዮ ዛራዳ ሲቃ» ጊዴስ።

² ሄሳ ጊሻስ ታ ኢዞ ታማኔ ኢቻሹ ሳቂሌ ቢራኒኔ 150 ኪሎ ባንጋን ሻማዲስ።

³ ታ ኢዞ፥ «ኔ ላይማቲዛይሳኔ ሃራ ኣስ ካሊዛይሳ ኣጋዳ ታናራ ዳሮ ዎዴ ጺሎቴን ዴኣ፤ ታኒካ ኔናራ ኣማኔቴን ዳና» ጋ ዞራዲስ።

⁴ ሄሳካ ኢስራኤሌ ኣሳይ ካዎይ ባይንዳ ዎይኮ ካሌዛዴይ ባይንዳ፥ ያርሾይ ባይንዳ ዎይኮ ኤቃ ጾሳታ ሃዉልቴይ ባይንዳ፥ ቄሴቴ ማይኦይ ባይንዳ ዎይኮ ኤቃ ጾሳታ ሚስሌይ ባይንዳ ዳሮ ዎዴ ዴኣና።

⁵ ሄሳፌ ጉዬ ኢስራኤሌ ዴሬይ ጎዳ ባ ጾሳኮኔ ባ ካዎ ዳዊቴኮ ሲማና። ዉርሴ ዎዴ ኢስቲ ያሻን ኮኮሪሼ ጎዳኮኔ ኢዛ ኣንጆኮ ያና።