ሜቴ ማጻፋ 23 - ጋሞ ማጻፋ

ሳራ ሃይቆ

¹ ሳራይ 127 ላይ ዴኢዳፔ ጉዬ፥

² ኢዛ ካናኔ ቢታን ዲዛ (ኬብሮኔ ጌቴቲዛ) ቂሪያቴ-ኣርባኤ ካታማን ሃይቂን ኣብራሃሜይ ሳራስ ዬኪዴሲኔ ካዮቲዴስ።

³ ኣብራሃሜይ ባ ማቼይ ኣሃ ኣቻፌ ሂቴታኮ ቢዲ፥

⁴ «ታኒ ኢንቴ ጊዶን ኢማ፤ ታ ማቼዮ ሞጋናስ ታስ ኢንቴ ጋዴፔ ሞጎሶ ባይዜርኬቲ!» ጊዴስ።

^5-6 ሂቴቲ ኢዛስ፥ «ጎዶ! ኑኒ ኔና ዮቲዛይሳ ሲያ፤ ኔኒ ኑ ጊዶን ጊታ ኣሳ፤ ኔኒ ኔ ማቼይ ኣሃ ኑ ዱፎፔ ኔና ሎኢዳሶን ሞጋ፤ ኔኒ ኔ ማቼይ ኣሃ ሞጋናስ ባ ዱፎ ኦኒካ ኔና ዲጌና» ጊ ዛሪዳ።

⁷ ኣብራሃሜይ ዴንዲ ኤቂዲ ሂቴታ ሃላቃታ ሲንን ዚጊዴስ።

^8-9 ኢዚ ኢስታስ፥ «ኢንቴ ታና፥ ‹ኔ ማቼይ ኣሃ ሞጋ› ጊኮ ሲዪቴ፤ ጾሃሬ ና ኤፍሮኔስ ኢዛ ጋዴዛ ጋጻን ዲዛ ማኪጴሌ ጌቴቲዛ ጎንጎሎዛ ታስ ዱፎስ ባይዛና ማላ ኩሜ ዋጋን ኑና ዛልኢሴርኬቲ» ጊዴስ።

¹⁰ ሄ ዎዴ ኤፍሮኔይ ካታማ ፔንጌን ሺቂዳ ባ ኣሳ ሂቴታ ጊዶን ዴስ፤ ሄሳ ጊሻስ ሂቴቲ ዉሪ ሲዪሺን ኣብራሃሜስ፥

¹¹ «ሄሳ ማላ ጊዴና፤ ታ ጎዶ! ታ ዮቲዛይሳ ሲያ፤ ታኒ ጋዴዛካ ኢዛ ጊዶን ዲዛ ጎንጎሎዛካ ታ ኔስ ሃይሳ ኣሳ ሲንን ኢማዲስ፤ ኔካ ኔ ማቼይ ኣሃ ሞጋ» ጊዴስ።

¹² ኣብራሃሜይ ሃላቃታ ሲንን ቃሴካ ዚጊዲ፥

¹³ ኣሳይ ሲዪሺን ኤፍሮኔ፥ «ታ ዮቲዛይሳ ሲያርኪ! ታኒ ሄ ጋዴዛስ ዋጋ ቃንጻና፤ ኔ ታፔ ኤካርኪ! ሄን ታኒ ታ ማቼይ ኣሃ ሞጋና» ጊዴስ።

^14-15 ኤፍሮኔይ ኣብራሃሜስ ዛሪዲ፥ «ታ ጎዶ! ታኒ ዮቲዛይሳ ሲያ፤ ጋዴዚ 400 ሳቂሌ ቢራ ጻላ ኬሲዛ ጋዴ ጊዲዳ ጊሻስ ሃይሲ ኔ ጊዶኒኔ ታ ጊዶን ኣይኮካ ጊዴና፤ ኔ ማቼይ ኣሃ ኢዛን ሞጋ» ጊዴስ።

¹⁶ ኣብራሃሜይ ሂቴ ኣሳይ ሲዪሺን ኤፍሮኔይ ጊዳ ዋጋ 400 ሳቂሌ ቢራ ኤፍሮኔስ ኢሚዴስ።

¹⁷ ማሚሬ ካታማ ኣቻን ማኪጴሌን ዲዛ ኤፍሮኔ ጋዴን ዲዛ ጎንጎሎይኔ ሄ ጋዴን ዲዛ ሚይ ዉሪ፥

¹⁸ ካታማ ፔንጌን ሺቂዳ ሂቴ ኣሳ ኡባ ሲንን ዎጋን ኣብራሃሜ ጋዴ ጊዲዴስ።

¹⁹ ሄሳፌ ጉዬ ኣብራሃሜይ ባ ማቾ ሳራ ኣሃ ካናኔ ቢታን (ኬብሮኔ ጌቴቲዛ) ማሚሬ ካታማ ኣቻን ዲዛ ጎንጎሎን ሞጊዴስ።

²⁰ ሄሳ ጊሻስ ሄ ጋዴዚኔ ጋዴዛን ዲዛ ጎንጎሎዚ ሂቴታ ሲንን ዎጋን ኣብራሃሜስ ጊዲዴስ።