ሂዚቄላ ቲንቢቴ 31 - ጋሞ ማጻፋ

ሊባኖሴ ዚጋ ሌሚሶ

¹ ኑኒ ዲኤቲዳ ታማኔ ኢሲን ላይን፥ ሄን ኣጊናን፥ ኮይሮ ጋላሳን ጎዳ ቃላይ ታኮ ዪዲ፥

² «ሃይሶ ኣሳ ናዉ! ጊብጼ ካዎ ፓሮኔሲኔ ቆዳይ ባይንዳ ኢዛ ዴራስ፥ « ‹ጊታቴን ኔናራ ጊናታናይ ኦኔ?

³ ኢዛ ሃጋይ ዎራስ ኩዋ ጊዲዲ ዳሮ ሉሌ ጊዲዲ ኢዛ ጼራይ ሳሎ ጋኪ ዲቺዛ ሊባኖሴ ዚጋ ሚሳቲዛ ኣሶሬ ጼሊቴ።

⁴ ሃቲ ኢዛ ጫሪሲዳ፤ ጪማ ፑልቶቲካ ኢዛ ዲቺዳ፤ ኢስታ ካንቼ ሃቲ ጎጊዳ፤ ኢስታ ጻጶይ ዲዛሶ ኡባ ኢርጺሲዳ፤ ዴምባን ዲዛ ሚታ ኡባኮ ዛራ ሃ ዬዲዳ።

⁵ ሃ ካሊዳ ጊሻስ ዎራ ጊዶን ዲዛ ሚ ኡባፌ፥ ኬሂ ኣዱቂዴስ፤ ኢዛ ሃጋቲ ዳዪዳ፤ ኡንቁሎቲ ኣዱቂዳ።

⁶ ሳሎ ካፎቲ ኡባይ ኢዛ ሃጋታ ቦላ ባንታ ኬ ኬጺዳ፤ ዎራ ዶኣቲ ኡባይ ኢዛ ሃጋታ ጋርሳን ማራታ ዬሊዳ፤ ጊታ ካዎቴቲ ኡባይ ኢዛ ኩዋ ጋርሳን ዴኢዳ።

⁷ ዳዪዳ ኢዛ ሃጋታራ ኢዛስ ፑላዚ ኬሂ ሎኦ፤ ኢዛ ጻጶቲ ሃ ዳሪ ዲዛሶ ቢዳ።

⁸ ጾሳ ጋናቴን ዲዛ ዚጋቲካ ኢዛራ ጊናታና ዳንዳይቤቴና፤ ጺዳቲካ ኢዛ ሃጋታራ ጊናቴቴና፤ ዎላቲካ ኢዛ ሃጋራ ጊናቴቴና፤ ጾሳ ጋናቴን ዲዛ ኣይ ሚካ ሎኤቴን ኢዛ ጋኬና።

⁹ ታኒ ኢዛ ዳሮ ሃጋታራ ጋ ፑላሳ ሜዲስ፤ ጾሳ ጋናቴን ዲዛ ሚቲ ኡባይ ኢዛ ኣሞታና ማላ ኦዲስ› ጌስ ጋ።

¹⁰ «ሄሳ ጊሻስ ኡባ ሃሪዛ ጎዳይ፥ ‹ጩፑ ጊዳ ቦንጮታ ቦላ ጼራ ቁ ሂስቲዲ ባና ዛራሲዳ ጊሻስ፥ ባ ኣዱሳቴን ኢዚ ኦቶሬቲዳ ጊሻስ፥

¹¹ ታኒ ኢዛ ኢታቴ ኬና ኢዛ ኦሶ ጋቴ ኢማና ማላ ካዎቴታ ሃሪዛይሳስ ታ ኢዛ ኣ ኢማዲስ። ታ ኢዛ ኬሳ ዎራ ኦላዲስ።

¹² ካዎቴታ ጋርሳን ኬሂ ሜንጼ ኢታ ኣላጋቲ ኢዛ ቃንጼሬ ዬጊዳ፤ ኢዛ ኡንቁሎቲ ዙማታኒኔ ዙሌታን ኩንዲዳ፤ ኢዛ ሃጋቲካ ሜቄሬቲ ሃ ዛራታን ዎዳ፤ ቢታን ዲዛ ካዎቴቲ ኡባይ ኢዛ ኩዋ ጋርሳፌ ኬዚዲ ዬጊ ቢዳ።

¹³ ሳሎ ካፎቲ ዪዲ ኩንዲዳ ሚ ቦላ ኡቲዳ፤ ዎራ ዶኣቲካ ኡባይ ኩንዲዳ ሚ ሃጋታ ቦላ ኡቲዳ።

¹⁴ ሄሳ ጊሻስ ሃ ላንቄን ዲዛ ኣይ ሚካ ባ ጼራ ጩፑ ጊዳ ቦንጮታፔ ቦላራ ቁ ሂስቲዲ ሃይሳፌ ጉዬ ባና ኦቶሮን ዛራሴና፤ ቃሴካ ኣይ ሚካ ሎኤዲ ሃይሳ ኣዱቄና፤ ኡባይካ ሃይቂዲ ዱጌ ዱፎን ጌሊዛይታራ ኢሲፌ ሃይቃና ማላ ፒርዴቲዴስ› ጌስ።

¹⁵ «ኡባ ሃሪዛ ጎዳይ፥ ኢዚ ዱጌ ዱፎን ጌሊዳ ጋላስ ጪማ ፑልቶታ ኢዛ ጊሻስ ካዮን ካማዲስ፤ ሻፋታ ቴቃዲስ፤ ጎጊዛ ሃቲካ ኤቂዳ፤ ታ ኢዛ ጋሶን ሊባኖሴ ማ ማይዛዲስ፤ ዎራ ሚቲ ኡባይ ሜሊዳ።

¹⁶ ዱጌ ዱፎን ጌሊዛይታራ ታ ኢዛ ጌልዛ ዎዴ ኢዚ ኩንዲሺን ሲዬቲዳ ጊሪሳይ ካዎቴታ ዳጋንዴስ፤ ሄሳፌ ጉዬ ኤዴኔ ሚቲ፥ ዱማኔ ዶሬቲዳ ሊባኖሴ ሚቲ፥ ሃ ካሊዳ ሚቲ ኡባይ ቢታ ጋርሳን ዲሼ ሚኔቲዳ።

¹⁷ ካዎቴታ ጊዶፌ ኢዛራ ዙፔቲዳይቲ፥ ኢዛ ኩዋ ጋርሳን ዴኢዳይቲ፥ ማሻን ሲፌቲዳይታራ ጋይታናስ ዱጌ ዱፎን ዎዳ።

¹⁸ «ኤዴኔን ሚታፔ ፑላቴኒኔ ኣዱሳቴን ኔናራ ጊናታናይ ኦኔ? ጊዶ ኣቲን ኔኒካ ሄሳ ኤዴኔ ሚታራ ኢሲፌ ቢታ ጋርስ ጌላና፤ ማሻን ሃይቂዳይታራኔ ኣማኖንታይታራ ኢሲ ቦላ ኢቻና። «ፓሮኔኔ ቆዳይ ባይንዳ ኢዛ ዴራ ጋካናይሲ ሃይሳ፤ ታኒ ኡባ ሃሪዛ ጎዳይ ሃይሳ ዮታዲስ» ጊዴስ።