ኤራንቻታ ማጻፋ 8 - ጋሞ ማጻፋ

¹ ዮኦታ ቢርሻና ዳንዳይዛ ኣ ኤራንቻ ማላ ኣሲ ኦኔ? ዮኦታ ኡባ ቢርሼ ኤሪዛይ ኦኔ? ኣ ኤራቴ ኣሳ ኣይፌሶ ፖኢሴስ፤ ጺርጶቲዳ ሲንካ ቢርሼስ።

ካዎስ ኣዛዜቴ

² ኔ ካሴ ጾሳ ሲንን ጫቂዳ ጊሻስ ካዎስ ኣዛዜታ።

³ ካዎ ሲንፌ ኤሶን ኬዞፓ፤ ኢዚ ባ ዶሲዳይሳ ኦናስ ዳንዳይዛ ጊሻስ ኢታ ኦሶስ ዙፔቶፓ።

⁴ ኡባ ሚሽ ኦናስ ካዎስ ማታይ ዲዛ ጊሻስ፥ «ሃይሳ ኣይስ ኦይ?» ጊዲ ኢዛ ኦይቻናስ ዳንዳይዛይ ኦኔ?

⁵ ኢዛስ ኣዛዜቲዛ ኣሲ ኡባይ ቆሄቴና፤ ኣ ኤራቴ ዲዛ ዎዚናይ ሊኬ ዎዴኔ ቤሲዛ ኦሶ ኦጌ ሻኪ ኤሬስ።

⁶ ኣስ ሜቶይ ኬሂ ኡንኤኮካ ኡባ ሚሻስካ ሊኬ ዎዴይኔ ቤሲዛ ኦሶ ኦጌይ ዴስ።

⁷ ሲንፌ ሃናናይሳ ኤሪዛይ ዴና፤ ሄሳ ጊሻስ ሲንፌ ሃናናይሳ ዮታናስ ዳንዳይዛይ ኦኔ?

⁸ ኣሲ ባ ሼምፖ ናጊ ኣሻናስ ዳንዳዬና፤ ዎይኮ ባ ሃይቃና ጋላሳ ቦላ ማታይ ዲዛ ኣሲ ዴና፤ ኦላ ጋላስ ኦኒካ ኦላ ዬጊዲ ጉዬ ሲሞንታይሳ ማላ ኢታ ኦሶይካ ባናራ ሜዜቲዳይታ ዬዴና።

ኢታ ኣሳታ ሃኖታኔ ኪያ ኣሳታ ሃኖታ

⁹ ሳሎ ጉፋንን ሃኒዛ ሚሽ ኡባ ታኒ ፒልጋ ቤኣዲስ፤ ኣሲ ኣስ ቆሃናስ ዳናቲዛ ዎዴይ ዴስ።

¹⁰ ቃሴ ኢታቲ ቦንቾን ሞጌቲሺኒኔ ጌሻ ካታማን ሳቤቲሺን፥ ጾሳ ኣሳቲ ጌሻ ካታማን ዶጌቲሺን ታ ቤኣዲስ፤ ሄሲ ኡባይካ ሃዳ።

¹¹ ኢታ ኦዳ ኣሳ ቦላ ኤሶን ፒርዶንታ ኣጊኮ ኣሳ ዎዚናይ ኢታ ኦና ሃልቾን ኩሜስ።

¹² ናጋራንቻይ ጼቱቶ ኢታ ሚሽ ኦሺን ኢዛ ላይይ ኣዱቂኮካ፥ ጾሳ ቦንቺዛይታሲኔ ጾሳ ያዪዛይታስ ሎኦይ ሃናናይሳ ታ ኤራይስ።

¹³ ጊዶ ኣቲን ኢታቲ ጾሳስ ያዮንታ ጊሻስ ሎኦ ሚሺ ኢስታስ ሃኔና፤ ኢስታ ላይ ኤሾ ማላ ኤሌ ኣና።

¹⁴ ሳኣ ቦላ ኦሴቲዛ ሃራይ ሃዳ ሚሺ ዴስ፤ ሄሲካ ጺሎቲ ኢታታስ ቤሲዛ ቂጻቴ፥ ኢታቲ ጺሎታስ ቤሲዛ ሎኦ ሚሽ ኤኬቴስ። ሄይቲ ኡባይካ ሃዳ።

¹⁵ ሳሎ ጉፋንን ኣሳስ ሙሳፌ፥ ኡሻፌኔ ኡፋዬቴፌ ኣዛ ሃራ ሚሺ ባይንዳ ጊሻስ ባ ዴኦ ላይን ኡፋዬቴ ሎኦ ጋዲስ፤ ሄሳ ጊሻስ ጾሲ ሳሎ ጉፋንን ኢዛስ ኢሚዳ ላይታን ኢዚ ባ ኦሶን ኡፋዬታና።

¹⁶ ታኒ ኣ ኤራቴ ኤራናሲኔ ኣሲ ሃ ሳኣ ቦላን ኦማርሲኔ ጋላስ ስኮይ ባይንዳ ዳቡርዛ ዳቡራ ኤራናስ ታ ዎዚናን ፒልጋዲስ።

¹⁷ ሄሳፌ ጉዬ ጾሲ ኦዳ ኡባ ቤኣዲስ፤ ሳሎ ጉፋንን ኦሴቲዛ ሚሽ ኦኒካ ኤሬና፤ ኣሲ ኬሂ ዳፌቲዲ ፒልጊ ጼሊኮካ ኢዛ ቢርሼ ዴማናስ ዳንዳዬና። ኣ ኤራንቻይ፥ «ታ ኤራይስ» ጊኮካ ኡባ ኤራናስ ዳንዳዬና።