1 Korіnflіlerä 13 - Ени Бааланты

Севги

¹ Еер лафедӓрсейдим инсан дилиндӓ йада ангил дилиндӓ, ама севгим йоксайды, бир ӧтӓр бакырым еки бир уулдар кимвалым.

² Еер бендӓ варсайды пророклук беӂериклии, еер билирсейдим хепси саклы ишлери хем едендисейдим бӱтӱн билгичлии, еер варсайды бӱӱк инаным, байырлары да ериндӓн дииштирейим, ама йоксайды севгим, озаман бӓн бишей диилим.

³ Еер бӱтӱн варлыымы баашларсайдым, ки дойурайым фукааралары, еер гӱӱдеми атешӓ верирсейдим, ама севгим йоксайды, бана бундан хич бир файда олмаз.

⁴ Севги чок дайанар, иилик йапар, севги кысканмар, ӱӱнмӓр, кабармар.

⁵ Севги кӧтӱ кендини гӧтӱрмӓр, аарамар файда кендисинӓ, тез ӱфкеленмӓр, кӱсӱ тутмар,

⁶ кӧтӱлӓӓ севинмӓр, ама аслылаа севинир.

⁷ Севги хепсини ӧртер, хепсини инанэр, хепсинӓ умут едер, хепсинӓ дайанэр.

⁸ Севги хич дургунмар. Пророклук сона гелеӂек, диллӓр сусаӂэк, билгичлик кайбелеӂек,

⁹ зерӓ бизим билгичлик кедерли, бизим пророклук диил таман.

¹⁰ Ама ачан таманнык гелеӂек, озаман хепси, не кедерли, йок олаӂэк.

¹¹ Ушаккан, бӓн ушакчасына лафедӓрдим, ушакчасына дӱшӱнӓрдим. Ама олгуннандыйнан, ушак ишлериндӓн бракылдым.

¹² Шинди хепсини ниӂӓ бир думанны шишедӓн гӧрериз, ама озаман гӧрӱшеӂез ӱз-бе-ӱз. Шинди беним билгичлиим кедерли, ама озаман Аллахы таныйаӂам ӧлӓ, ниӂӓ бӓн танынмышым.

¹³ Шинди калэр буннар ӱчӱ: инан, умут хем севги, ама севги оннардан таа бӱӱк.