Wasɨn̰a 9 - Gabri Maja

¹ Kardi nee ba-ƴɔbɛ gɨ daa nii gɨ cay baydɨge lɨm burun̰ji. Ɨni na, ɨŋ sol dɛsɨɗɛŋ sayga gɨɗɨgɨ-Kumu gɨŋ ba dugo. Bɨn̰ge dɛsɨɗɛŋ le lakɨle ga ni hangɨn̰ kɨbɨ umboŋ gɨ ɗɨgi mɨrɨg gɨ kagadi unɔ.

² Dɛsɨɗɛŋ le haŋgɨ kɨbɨ umboŋ gɨ ɗɨgi mɨrɨg gɨ kagadi unɔ le ɨni na, kɨɗɨn̰di ga nee gaŋ le bɨ, gusa gɨ ɨndi tɨlɨm andaŋ duroy nee hɨn̰ gusa gɨ da tɨwa di ƴee tɔgɨ wo̰. Gusa gɨ andaŋ le lɨgɨ cɨn̰ tɨwa di daa bɨ, lee gɨ kɨɗɨn̰ dobɨ ɨndi bɨ.

³ Kuun̰əŋ andaŋge a cɨn̰ gusa gɨ nee gɨŋ le bɨ ƴeege cay gɨsəŋ. Kan bɨgege dɔnɔ di gɨlɨn̰ hɨn̰ da ɗɨsɨnin̰əŋ wo̰.

⁴ Kuun̰əŋ le bɨgege gɨyəŋ gɨ kan na gɨ loon̰ hɛɗɨmɛ ga a cay gɨsəŋ gaŋ bɨ, kabɨn̰ hɛɗɨmɛ ga bɨra bɨ, hɨya bɨ, hɨnga ga ɨsɨni naŋ. Ama kan na laan̰ ɨsɨna naa kalaŋ ga dɨgage tambo da Kumu jɨndɨge naŋ ƴɔbɨ.

⁵ Bɨgege gɨyəŋ gɨ ni dɨɗɨge naŋ, ama gɨ kan na laage hɨnga ga ni mɨrɨn̰tɨn̰i bɨrɨŋ kɨdɨrɛ bay. Hɨnga ga ni mɨrɨn̰tɨn̰i ga ba kɨya lɔɔ kalaŋ le, woy gɨlɨn̰ na hɨn̰ ɗɨsɨni di de ungo ma leeyi tɔgɨ wo̰.

⁶ Boy wɔlɛdi gɨ nee gɨŋ le, kalaŋ kɨya malege tɨma ama kɨya wayooge naŋ bɨ, kɨya geyege tɨma ama tɨma kɨya gɨrge bɨ.

⁷ Kuun̰əŋ le woyge gɨlɨn̰ hɨn̰ hɨndɛrɛŋ ga tobɨge hɨnga ga ni loon̰ kɨmbɨl gusɨge ga ɨre cay tɨbayge dɨŋ gɨ ni kɨmbɨl wo̰. Hɨnga gɨlɨn̰ hɨn̰ jagɨwa-tɨrɨmbala di leege dan̰ lɔr wo̰ a cayge bɨ, cɨndɨge gɨlɨn̰dɨn̰ hɨn̰ ga da kalaŋ ga ɨndəŋ wo̰ bɨ.

⁸ Kuun̰əŋ le teɗi cayge woy gɨlɨn̰ hɨn̰ teɗi cay tama wo̰ bɨ, gasɨndɨge woy gɨlɨn̰ hɨn̰ gasɨn̰ gusugo wo̰ bɨ.

⁹ Badɨge ga kan dobɨ jorgiige le woy gɨlɨn̰ hɨn̰ gɨ kan na lee naa dan̰ nare wo̰ bɨ, noy majɨbiige ye hɨn̰ noy pusu gɨ da hɨndɛrɛŋ ga dan̰ kondiige ga gɨrege kɨya ɔrɛ kɨɗɨn̰ kɨmbɨl gaŋ wo̰ bɨ.

¹⁰ Cɨɗɨn̰dɨge woy gɨlɨn̰ hɨn̰ cɨɗɨn̰ ɗɨsɨni wo̰ bɨ, mɨnayge woy a kɨbɨ nee bɨ. Dɔnɔdɨge dɨ ni loon̰ kalaŋ ɨsɨna kɨdɨrɛ bay le, woy na mɨnayge dɨŋ bɨ.

¹¹ Kɨlma gɨ da kuun̰əŋ le, na ba-ƴɔbɛ gɨ som a duroy umboŋ gɨ ɗɨgi mɨrɨg gɨ kagadi unɔ gɨŋ. Kɨlma koge le, gusondi gɨ dan̰ kɨbɨ əbɨro na «Abado̰» bɨ, dan̰ kɨbɨ Gɨrɛg na «Apolɨyo̰» bɨ.

¹² Hɨnga ga ni cɨn̰-n̰age ga cay wase pɨde coŋ ɨni. Sɨlagɨŋ! Hɨnga ga ni cɨn̰-n̰age ga ɗaŋ sɔɔ kɨbɨga te gusɨge nee coŋ.

¹³ Ba-ƴɔbɛ gɨ daa nii gɨ cay jiidɨge lɨm burun̰ji. Ɨni na, ɨŋ sol kɨɗɨn̰ ga kan gaɗɨge kɨya bogɨn̰ kɨbar nee ga leege dan̰ lɔr ga woy a tumoy Kumu bɨ ɨŋ je noy ungo yaga a tɨben̰ ga poɗɨn̰ gaŋ.

¹⁴ Noy ungo gɨ ɨŋ ba je le, yen̰ ba-ƴɔbɛ gɨ daa nii gɨ cay jiidɨge gɨ ƴom burun̰ji kobi ye hɨn̰: «Ji pɨndɨr ka-ƴɔbɛ ga daa nii ga poɗɨn̰ ga saɗɨdɨgege dan̰ gangɨ ga ni nare a kɨbɨ kuray gɨ gumu gɨ teeyige Epɨrat le ɗage daa.»

¹⁵ Ka-ƴɔbɛ ga daa nii ga poɗɨn̰ ga nee le tumɔ kan saɗɨdɨgege dugo na kɨya amɨn̰ tɨwadi bɨ, wɔlɛdi bɨ, kɨdɨrɛdi bɨ, ɨlgedi bɨ, gɨ nee le ƴɔbɨ. Kan pɨndɨrdɨge ɗege daa kɨya dɨɗɨn̰ kalaŋ. Hɨn̰ gɨ kan na gusɨnage kalaŋ kɨɗɨn̰ sɨbɨ na, kan dɨɗɨge kɨbɨge ga pɨna.

¹⁶ Asɨgarn̰əŋ ga nayge a cay hɨndɛrɛŋ kage gaŋ na, ɨŋ sol kondɨwayge: Na dubu-toy-sɔɔ tɨba dubu-mɔjɨ.

¹⁷ Hɨndɛrɛŋ bɨ, ka-nɔɔ cay hɨndɛrɛŋ bɨ, ga ba buyoŋ cɨnɨ hɨn̰ dḛḛ wo̰ le, orɨn̰ge dan̰ hɨnga ga ba kɛ: Badɨge ga ni nare ga woy a jorgiige le yɨle hɨn̰ tɨwa wo̰ bɨ, ɨndi sɨlɨm hɨn̰ garma sapir wo̰ bɨ, ƴulolɨn̰ hɨn̰ kɨrbaŋdi hɨnga ga ƴee tɨwa wo̰ bɨ. Cay hɨndɛrɛŋ le woy gɨlɨn̰ hɨn̰ cay gusugo wo̰, ama tɨwa bɨ, gusa bɨ, kɨrbaŋdi hɨnga ga ƴee hɨn̰ tɨwa wo̰ bɨ andaŋ a kɨbɨge.

¹⁸ Hɨn̰ gɨ kan na gusɨnage kalaŋ kɨɗɨn̰ sɨbɨ na, kɨbɨge ga pɨna ma kol hɨnga ga ɨsɨn ka-mɔndɛ kɨɗɨn̰ ga sɨbɨ ga nee le. Mage na tɨman̰ tɨwa bɨ, gusa bɨ, kɨrbaŋdi hɨnga ga ƴee tɨwa bɨ.

¹⁹ Dɔnɔ da hɨndɛrɛŋ le woy na a kɨbɨge bɨ, cɨɗɨn̰dɨge bɨ. Kɨya wa cɨɗɨn̰dɨge woy gɨlɨn̰ na hɨn̰ kumbulo wo̰, dan̰ cayge a kɨbɨ nee kɨya loon̰ kalaŋ ɨsɨna.

²⁰ Te kalaŋ nɔm ga hɨnga ga ɨsɨni ga ka-mɔndɛ kɨɗɨn̰ dɨɗɨge naŋ le, bɨlge gɨye-lɔɔdɨge naŋ. Kan woyge te n̰ɨrege turnɔn̰əŋ ga ɨsɨndəŋ bɨ, kulan̰əŋ ga ɓalage sɔlɛ kɨɗɨn̰ naŋ bɨ, jɔɔ kɔl naŋ bɨ, ɔrɛ daa naŋ bɨ. Kulan̰əŋ ga nee le, na kalaŋ ba uyge dan̰ nare gɨ ni lɔr bɨ, dan̰ nare gɨ ni arja̰ bɨ, dan̰ nare gɨ yɨle naŋ le dan̰ garma wala sɨya bɨ.

²¹ Kalaŋ ga nee le, kan̰ge ɗɔɔ kardi dɨɗe kalaŋ koge coŋ bɨ, lɔɔ tɨmba toge coŋ bɨ, yɔyɛ gɨ dan̰ gangɨ ca koge coŋ bɨ, hase koge coŋ bɨ.