Wasɨn̰a 8 - Gabri Maja

Haŋge tambo jurgumdo

¹ Kɨɗɨn̰ ga Kurɨn̰-dɨmangɨ le haŋgɨ tambo jurgumdo di ɓagɨmɨn̰ge kɨbɨ magtubu na, kɨɗɨn̰ ga a gɨɗɨgɨ-Kumu gaŋ sogii sɨndɨŋ ɓal hɨn̰ kɨway tɨwa pɨna wo̰.

² Kardi nee, ɨŋ sol ka-ƴɔbɛ ga daa nii jurgum ɨrege tumoy Kumu. Kan bɨgege burun̰ji jurgum kobɨge pɨna pɨna nɔm.

³ Kɨɗɨn̰di ga nee gaŋ le na, ba-ƴɔbɛ gɨ daa nii gɨ ɗaŋ ɨrga ɨre mɨnde dan̰ kɨɗɨn̰ ga kan gaɗɨge kɨya bogɨn̰ kɨbar nee, ga leege dan̰ lɔr ga woy a tumoy kali-tɨrɨmbala di da Kumu dɨŋ. Ban ƴom pɨray gɨ leege dan̰ lɔr a kobi. Kan ɨrgan̰ge dan̰ kɨrbaŋdi hɨnga ga ɗo̰ tɨna dan̰ kondiige bii ɗe ban na bɨn̰ Kumu, a kɨɗɨn̰ ga gaɗɨge ga ni bogɨn̰ kɨbar nee gaŋ pɨna dan̰ ɔlɛ gɨ da kalaŋ nɔm ga woyge dan̰ cɨndɨge le.

⁴ Kɨɗɨn̰ ga ba-ƴɔbɛ gɨ daa nii ul kɨrbaŋdi hɨnga ga ɗo̰ tɨna ga woy a kobi le na, gusadɨge say cul jɨn̰ daa tumoy Kumu pɨna dan̰ ɔlɛ gɨ da kalaŋ ga woyge dan̰ cɨndɨge le.

⁵ Kardi nee ɨni na, ba-ƴɔbɛ gɨ daa nii don kurji tɨwa di woy a cay kɨɗɨn̰ ga kan gaɗɨge kɨya bogɨn̰ kɨbar nee gaŋ le, walɨn̰ pɨray gɨ ni ulɨn̰ kɨrbaŋdi hɨnga ga ɗo̰ tɨna le tɨlɛj daa ɨni na, ban nogu bee a cay gɨsəŋ gaŋ. Kɨɗɨn̰di ga nee gaŋ le bɨ, kumu al bɨ, noy kalaŋ ye bɨ, kumu wɨlɨn̰ bɨ, cay gɨsəŋ yɨbagde yɨbag yɨbag bɨ.

Lɨme gɨ da burun̰jin̰əŋ ga jii

⁶ Ɨni na, ka-ƴɔbɛ ga daa nii ga jurgum ga ƴomge burun̰ji pɨna pɨna kobɨge le, ƴomge cay tɨbayge gɨ ni lɨmɨn̰ burun̰ji le.

⁷ Ba-ƴɔbɛ gɨ daa nii gɨ ba cay wase le lɨm burun̰ji. Kɨɗɨn̰di ga nee gaŋ le bɨ, gɨna gɨ da kaŋdi Kumu dan̰ tɨwa di polɨn̰i dan̰ kɨbar bugoŋge a cay gɨsəŋ gaŋ. Hɨn̰ gɨ kan na gusɨnage cay gɨsəŋ kɨɗɨn̰ sɨbɨ na, kɨbɨge ga pɨna uloŋ muɗɔgɨ muɗɔgɨ coŋ. Hɨn̰ gɨ kan na gusɨnage hayaŋ kɨɗɨn̰ sɨbɨ na, kɨbɨge ga pɨna uloŋ muɗɔgɨ muɗɔgɨ coŋ bɨ, ul hɛɗɨmɛ ga bɨra ɗəndəŋ coŋ bɨ.

⁸ Kardi nee ba-ƴɔbɛ gɨ daa nii gɨ cay sɔɔdɨge le lɨm burun̰ji. Ɨni na, ayge hɨnga ga pɨna wo̰ ga gɨlɨn̰ hɨn̰ garma gɨ gumu gɨ ƴee tɨwa wo̰ dɨbɨge ɗurɔm duroy kuray gɨ gumu taa taa gɨŋ. Hɨn̰ gɨ kan na gusɨnage kuray gɨ gumu kɨɗɨn̰ sɨbɨ na kɨbi gɨ pɨna bɨləŋ kɨbar.

⁹ Hɨn̰ gɨ kan na gusɨnage hɨnga se ga som-bɨra duroy kuray gɨ gumu taa taa gɨŋ bɨ koburon̰əŋ ga gɨmdəŋ taa taa hɨn̰ ƴaa wo̰ kɨɗɨn̰ sɨbɨ na, kɨbɨge ga pɨna mundoŋ muɗɔgɨ muɗɔgɨ coŋ bɨ.

¹⁰ Kardi nee ɨni na, ba-ƴɔbɛ gɨ daa nii gɨ cay sɨbɨdɨge le lɨm burun̰ji. Ɨni na, dɛsɨɗɛŋ di gumu di ƴee tɨwa hɨn̰ dɨngɛ wo̰ sayga gɨɗɨgɨ-Kumu gɨŋ ba dugo. Hɨn̰ gɨ kan na gusɨnage kurayn̰əŋ kɨɗɨn̰ sɨbɨ bɨ cɨn̰-kaŋ kɨɗɨn̰ sɨbɨ bɨ na hɨndi baa na kɨbɨge ga pɨna gaŋ.

¹¹ Guson̰ dɛsɨɗɛŋ le na guson̰ hɛɗɨmɛ ga pɨna wo̰ ga ɗan̰ kəjəj ga teegege na «Abɨsḛd.» Hɨn̰ gɨ kan na gusɨnage kaŋ kɨɗɨn̰ sɨbɨ na, kɨbɨge ga pɨna bɨləŋ ɗan̰ kəjəj. Lee gɨ kondɨwadi kalaŋ ga sige kaŋ ga nee le mage kɨya cay bɨle gɨ bɨle ɗan̰ kəjəj le.

¹² Ba-ƴɔbɛ gɨ daa nii gɨ cay poɗɨn̰dɨge le lɨm burun̰ji. Ɨni na, hɨn̰ gɨ kan na gusɨnage tɨwa bɨ kɨdɨrɛ bɨ dɛsɨɗɛŋn̰əŋ bɨ kɨɗɨn̰ sɨbɨ na, mundoŋ andaŋ cay kɨbɨge ga pɨna gaŋ lee gɨ dobɨ ɨndi. Hɨn̰ gɨ kan na gusɨnage asɨn̰a da kɨɗɨn̰ ga woli kɨɗɨn̰ sɨbɨ na, kɨbɨge ga pɨna dobɨ ɨndi tɨlɨm bɨ. Woy na hɨn̰ wo̰ kɨya cay son̰do bɨ.

¹³ Ɨni na, ɨŋ sol kɨde pɨna gɨ lar gɨɗɨgɨ-Kumu gɨŋ mɨrɨg. Kɨde gɨ nee le ye dan̰ te tumoyi di daa pəŋ ye hɨn̰: «Cɨn̰-n̰age! Cɨn̰-n̰age! Cɨn̰-n̰age na da kalaŋ ga a cay gɨsəŋ gaŋ, kɨɗɨn̰ ga te ka-ƴɔbɛ ga daa nii ga sɨbɨ ga baage le kɨya lɨmege burun̰ji kage le.»