Wasɨn̰a 6 - Gabri Maja

Haŋge gɨ da tambo ga jii

¹ Kardi nee ɨŋ sol Kurɨn̰-dɨmangɨ ƴom tambo di ɓagɨmɨn̰ge kɨbɨ magtubu pɨna duroy ga jurgum le haŋgɨ ɨni na, ɨŋ je noy kandi-se ga gɨɗɨgɨ-Kumu gaŋ pɨna duroy ga poɗɨn̰ ye dan̰ te tumoyi di ye hɨn̰ ale gɨ da Kumu wo̰ ye hɨn̰: «Ɨre.»

² Ɨni na ɨŋ sol hɨnda gɨ bɛrɛ. Ungo gɨ nay a cay hɨnda gɨ nee le ƴom dan̰ ɗɛsɛ a kobi. Ungo gɨ nee le biige jagɨwa ga ni tɨrɨmbala. Ban say hɨn̰ kɨlma ba bɔyɛ kɨmbɨl orɨn̰ kɨya bon̰-kɨmbɨl.

³ Kɨɗɨn̰ ga Kurɨn̰-dɨmangɨ le haŋgɨ tambo di ni sɔɔdo na, ɨŋ je noy kandi-se ga a gɨɗɨgɨ-Kumu gaŋ ga cay sɔɔdɨge ye hɨn̰: «Ɨre.»

⁴ Ɨni na, ɨŋ sol hɨnda gɨ ɗaŋ gɨ yɨle de andaŋ. Ungo gɨ ba nɔɔ cay nee le biige dɔnɔ ɗe na dorɨn̰ dan̰ gusi-dɔbɛ a cay gɨsəŋ gaŋ coŋ bɨrɨŋ gɨsɨn̰ gɨ kalaŋ nɔm na dɨɗɨn̰ gusɨge duroyge. Biige pəlɨm di gumu.

⁵ Kɨɗɨn̰ ga Kurɨn̰-dɨmangɨ haŋgɨ tambo di ni sɨbɨdo na, ɨŋ je noy kandi-se ga a gɨɗɨgɨ-Kumu gaŋ ga ni cay sɨbɨdɨge ye hɨn̰: «Ɨre.» Ɨni na ɨŋ sol hɨnda gɨ ɨndi. Ungo gɨ ba nɔɔ cay nee ƴom dan̰ hɨnga ga ni gɨsɨn̰ hɨnga a kobi.

⁶ Ɨni na, ɨŋ je noy hɨnga ye hɨn̰ noy ungo wo̰ a duroy kandi-se ga poɗɨn̰ le, yen̰ ba nɔɔ cay hɨnda gɨ ɨndi le ye hɨn̰: «Gursu di ɓal cay kobɨ ba-lɔɔ gɨye gɨ ni wɔlɛ pɨna ɓal kɨle kɨlodi gɛmɛ pɨna ƴɔbɨ bɨ, gursu di ɓal cay kobɨ ba-lɔɔ gɨye gɨ ni wɔlɛ pɨna ɓal kɨle kɨlodi gasa ga ni ɔrjɨ sɨbɨ ƴɔbɨ bɨ. Ama ojɨ cay sɔŋ bɨ cɛrɛ di suru bɨ na, ɨsɨbegɨŋ naŋ.»

⁷ Kɨɗɨn̰ ga Kurɨn̰-dɨmangɨ le haŋgɨ tambo di ni poɗɨn̰do na, ɨŋ je noy kandi-se ga a gɨɗɨgɨ-Kumu gaŋ ga cay poɗɨn̰dɨge ye hɨn̰: «Ɨre.»

⁸ Ɨni na, ɨŋ sol hɨnda gɨ gɨlɨn̰ hɨn̰ hɛɗɨmɛ ga bɨra wo̰. Ungo gɨ ba-sɔmɛ cay nee le gusondi na tɨma bɨ dɔɔ-ƴaa da tɨma kobɨ kardi pḛḛ pḛḛ bɨ. Hɨn̰ gɨ kan na gusɨnage cay gɨsəŋ kɨɗɨn̰ poɗɨn̰ na, kɨbɨge ga pɨna na biige dɔnɔ cay nee ɗe na dɨɗɨn̰ kalaŋ dan̰ gɨyəŋ gɨ da pəlɨm bɨ, badɨra bɨ tɨma di man̰i bɨ, kɨmɛnɛ ga man̰daŋ bɨ.

⁹ Kɨɗɨn̰ ga Kurɨn̰-dɨmangɨ le haŋgɨ tambo di ni baydo na, a te kɨɗɨn̰ ga kan gaɗɨge kɨya bogɨn̰ kɨbar nee le ɨŋ sol turnoy kalaŋ ga kan wadɨlde tumoyge kol cay Kɔl gɨ da Kumu bɨ kol cay tɨmon̰ di kan lee a cay Kumu bɨ.

¹⁰ Kan wɨlalge dan̰ te tumoyge di daa pəŋ pəŋ ye hɨn̰: «Ba-gulɔŋ, ji na ungo gɨ leen̰ hɨnde gɨ doriige siige dan̰ cɨndi. Kalaŋ ga a cay gɨsəŋ gaŋ le, kɛ ji gɨ aye can̰ bɨrɨŋ andɨn̰ na wɔlɛ gɨ ani gɨŋ kɨya bon̰ kɔl cayge ga? Kɛ na wɔlɛ gɨ ani ma mɨn̰ kɨya gɔjɛ ba da kɨbar di ni gɨ bugoŋ dugo le ga?»

¹¹ Kalaŋ pɨna pɨna nɔm ga kan naa dɨɗɨgege le, bɨgege badɨge ga bɛrɛ ga sɨngɨɗɨdəŋ. Ɗaŋ coŋ kan yegege gɨ kan na dɨbɨ ɗugoyge lam nee ƴee coŋ, bɨrɨŋ gɨsɨn̰ gɨ kamdɨge ka-lɔɔ gɨye bɨ karmɨge bɨ, gɨ kan kɨya dɨɗɨge hɨn̰ kan wo̰ bɨ le kondɨwayge na ɓala dɨm.

¹² Kardi nee, ɨŋ sol Kurɨn̰-dɨmangɨ le haŋgɨ tambo di ni jiido na, ɨŋ sol cay gɨsəŋ ay te yɨbagde dan̰ togɨyge jɨg jɨg. Kɨɗɨn̰di ga nee gaŋ le bɨ, tɨwa dobɨ ɨndi tɨlɨm hɨn̰ pir wo̰ bɨ, kɨdɨrɛ bɨle gɨlɨn̰ hɨn̰ kɨbar wo̰ bɨ.

¹³ Dɛsɨɗɛŋ ga gɨɗɨgɨ-Kumu gaŋ laydaŋge dugo cay gɨsəŋ gaŋ hɨn̰ wɔɔdi tuguyoŋ di bɨra di kal gɨ gumu dor ɗoo gunguloŋ dugo wo̰.

¹⁴ Gɨɗɨgɨ-Kumu ayaŋ coŋ hɨn̰ kuyo gɨ kan nongɨrge daa wo̰. Ɗaŋ coŋ garman̰əŋ dan̰ hɔgɨwan̰əŋ ga duroy kuray gɨŋ torgege bɔs bɔs a ban̰dɨge gaŋ coŋ.

¹⁵ Kɛrɨmbɛlɛŋ ga a cay gɨsəŋ gaŋ bɨ, kalaŋ ga gɨmdəŋ dan̰ ka-cay asɨgarn̰əŋ bɨ, kalaŋ ka-wɔɔ hɨnga dan̰ kalaŋ ka-dɔnɔ bɨ, kalaŋ nɔm ga ni gɔyɔŋ dan̰ kalaŋ ga cayge kalɨn̰ bɨ, wɔsɨdege gusɨge umboŋ garma gɨŋ bɨ duroy garma gaŋ bɨ.

¹⁶ Kan yen̰ge garman̰əŋ bɨ, karɨn̰ orun̰əŋ bɨ: «Laydangɨŋ cayni wɨsanigɨŋ hen̰ cɨn̰ ba-sɔmɛ a cay kali-tɨrɨmbala dɨŋ bɨ, cɨn̰ kuduroy-hɔmɛ da Kurɨn̰-dɨmangɨ bɨ.

¹⁷ Kɨya wa wɔlɛ gɨ gumu gɨ da kuduroy-hɔmɛ toge bugoŋ ɨni. Kɛ na waŋ ba kɨya ɓale ɨre tumoyge ga?»