Wasɨn̰a 5 - Gabri Maja

Magtubu bɨ Kurɨn̰-dɨmangɨ bɨ

¹ Ban gɨ som a cay kali-tɨrɨmbala dɨŋ le, ɨŋ sol magtubu di nongɨri di walge kɔl duroy nee bɨ kardi nee bɨ a kobi gɨ bara gɨŋ. Magtubu di nee le ɓagɨmge kubo dan̰ tambo kɨɗɨn̰ jurgum.

² Kardi nee na, ɨŋ sol ba-ƴɔbɛ gɨ daa nii gɨ ba dɔnɔ gɨ pɨna wo̰, ye dan̰ te tumoyi di daa pəŋ ye hɨn̰: «Kɛ na waŋ ba kɨya ɓale haŋge tambo di ɓagɨmɨn̰ge kɨbɨ magtubu le bɨ hangɨn̰ magtubu le bɨ ga?»

³ Ama ungo pɨna wo̰ gɨ a gɨɗɨgɨ-Kumu gɨŋ bɨ, a cay gɨsəŋ gaŋ bɨ, te gɨsəŋ gaŋ bɨ, gɨ ba ɓale haŋge magtubu le dɨbɨn̰ tɨdi duroy nee unɔ bɨrɨŋ.

⁴ Lee gɨ ɨŋ ɨle tɔgɨ kɨya gɨ waage ungo pɨna wo̰ gɨ ba ɓale haŋge kɨbɨ magtubu le dɨbɨn̰ tɨdi duroy nee naŋ bɨrɨŋ.

⁵ Ama ba muɗɔlɛ gɨ pɨna wo̰ a duroy kamdi yəŋ hɨn̰: «Ɨle naŋ. Sɨla! Gusugo gɨ a te wɨn̰je gɨ da Juda bɨ, te mon̰ gɨ da kɨlma Dabid bɨ le boy-kɨmbɨl. Ban ɓal gɨ ba pɨndɨre tambo di ɓagɨmɨn̰ge kɨbɨ magtubu kɨɗɨn̰ jurgum le bɨ hangɨn̰ magtubu le bɨ.»

⁶ Ɨni na, ɨŋ sol Kurɨn̰-dɨmangɨ a durdi kali-tɨrɨmbala a duroy kandi-se ga gɨɗɨgɨ-Kumu gaŋ bɔb duroy ka-muɗɔlɛ. Kurɨn̰-dɨmangɨ le gɨlɨn̰ hɨn̰ gɨ kan na walge tumoyi tumɔ wo̰. Kurɨn̰-dɨmangɨ le orɨn̰ dan̰ kɨben̰di jurgum bɨ tɨdi jurgum bɨ, kan na Turnɔ di da Kumu ga jurgum ga Kumu gɨyge a cay gɨsəŋ gaŋ nɔm.

⁷ Kurɨn̰-dɨmangɨ le ɨrga gusi ban gɨ som a cay kali-tɨrɨmbala dɨŋ le ƴen̰ magtubu di a kobi gɨ bara gɨŋ.

⁸ Kɨɗɨn̰ ga Kurɨn̰-dɨmangɨ ƴee magtubu le na, kandi-se ga gɨɗɨgɨ-Kumu gaŋ ga poɗɨn̰ bɨ, ka-muɗɔlɛ ga toyge-sɔɔ cayge poɗɨn̰ bɨ le, poyge gɨbayge dugo tumoy Kurɨn̰-dɨmangɨ le. Waŋ waŋ kalɨn̰ ma orɨn̰ dan̰ jange bɨ, ungo di leege dan̰ lɔr di kɨrbaŋdi hɨnga ga ɗo̰ tɨna wanɨn̰ nee. Kɨrbaŋdi hɨnga ga ɗo̰ tɨna le, na ɔlɛ gɨ da kalaŋ ga woyge dan̰ cɨndɨge.

⁹ Kɨmɛnɛ ga poɗɨn̰ dan̰ ka-muɗɔlɛ ga toyge-sɔɔ cayge poɗɨn̰ le kɨbɨge kɨra gɨ hɨrɨwa yen̰ge hɨn̰: «Ji ɓal ƴɔɔ magtubu le bɨ, Haŋge tambo di ɓagɨmɨn̰ge kubo le bɨ, Kɨya wa tumɔ walge tumon̰ Lee gɨ ji boy cay kalaŋ, Dan̰ gɨyəŋ gɨ da kɨbardɨn̰ bɨn̰ Kumu. Kan na kalaŋ ga a te wɨn̰je gɨ ani ani bɨ, Te kɨbɨ wɔɔ gɨ ani ani bɨ, Te labar gɨ ani ani bɨ, Te kalaŋ ga ani ani bɨ,

¹⁰ Ji bɨlge leen̰ dɔɔ-ƴaa bɨ, Leen̰ ka-bɔgɛ kɨbar, Ɗe na n̰ɨrɨn̰ge Kumu konagɨŋ bɨ, Kan kɨya dɔɔge cay ƴaan̰əŋ, A cay gɨsəŋ gaŋ kɛ.»

¹¹ Ɗaŋ coŋ ɨŋ sol kɨɗɨn̰ ɗɛr na, ɨŋ je noy ka-ƴɔbɛ ga daa nii dan̰ kondɨwayge nɨwɨrege cay kali-tɨrɨmbala daa cɨɗɨgɨ. Ɨŋ je noy kandi-se ga gɨɗɨgɨ-Kumu gaŋ bɨ, ɨŋ je noy ka-muɗɔlɛ bɨ. Kondɨwayge na dubu-kɨɗɨn̰-mɔjɨ dan̰ kardɨge bɨ mɨlɨn̰o̰ dan̰ kardɨge jɨn̰ daa bɨ.

¹² Kan ayge te tumoyge daa pəŋ yen̰ge hɨn̰: «Kurɨn̰-dɨmangɨ gɨ walge tumoyi le, Ɓal wɔɔ dɔnɔ bɨ, Kandi-wɔɔ bɨ, cɨn̰-muɗɔlɛ bɨ, tɔgɨ bɨ, Hurɔmɔ bɨ, gusoŋ-tɔgɛ bɨ, hɨrame bɨ!»

¹³ Kardi nee na hɨnga se nɔm ga a gɨɗɨgɨ-Kumu gaŋ bɨ, ga a cay gɨsəŋ gaŋ bɨ, ga a te gɨsəŋ gaŋ bɨ, ga a cay kuray gɨ gumu taa taa gaŋ bɨ, ɨŋ je noyge ye hɨn̰: «Hɨrame bɨ, hurɔmɔ bɨ, Gusoŋ-tɔgɛ bɨ, dɔnɔ bɨ, Na gɨ da ba-sɔmɛ cay kali-tɨrɨmbala dɨŋ bɨ, Na gɨ da Kurɨn̰-dɨmangɨ bɨ, ɨlge dan̰ ɨlge.»

¹⁴ Kandi-se ga gɨɗɨgɨ-Kumu gaŋ ga poɗɨn̰ le, dɨbɨge cay nee yen̰ge hɨn̰: «Ɗa-ɗe-woy-hɨn̰-wo̰!» Kɨɗɨn̰di ga nee gaŋ le bɨ ka-muɗɔlɛ le poyge gɨbayge dugo n̰ɨriige.