Wasɨn̰a 4 - Gabri Maja

N̰ɨre gɨ a gɨɗɨgɨ-Kumu gɨŋ

¹ Kardi hɨnga ga nee le na, ɨŋ sol hɨnga ga ɗaŋ coŋ. Ɨŋ sol kɨbɨ-ƴaa di gɨɗɨgɨ-Kumu dɨŋ hangaŋ. Ɨŋ je noy ungo gɨ naa tumɔ ba ye kɔl danaŋ le ye hɨn̰ burun̰ji wo̰. Ungo gɨ nee le, ye hɨn̰: «Naya jɨn̰ gusɨnɨ kɛ aŋ gɨlɨn̰ hɨnga ga naa wa wa kalɨn̰ ma kɨya caga kardi nee le.»

² Kɔl gɨ kɨbɨna kɛ bɨ Turnɔ di da Kumu gɨsɨn canɨ bɨ, ɨŋ sol dan̰ kali-tɨrɨmbala di gɨɗɨgɨ-Kumu dɨŋ. A cay kali di nee le, ungo som cay nee.

³ Ungo gɨ som a cay kali-tɨrɨmbala di nee dɨŋ le jɨran̰de hɨn̰ oru gɨ teeyige naa jasɨpɨ wo̰ bɨ, hɨn̰ oru gɨ teeyige naa sardɨwan wo̰ bɨ. Dɛmbɨlɛ di jɨran̰de hɨn̰ oru gɨ teeyige naa emerodɨ wo̰ nɨwɨre cay kali-tɨrɨmbala le bɨ.

⁴ Ɨŋ sol kali toyge-sɔɔ cayge poɗɨn̰ nɨwɨre cay kali-tɨrɨmbala di nee le bɨ, kalaŋ ga muɗoldoŋ toyge-sɔɔ cayge poɗɨn̰ somge a cay nee, ga tobɨge badɨge ga bɛdɨrdɛŋ bɨ ga orɨn̰ge dan̰ jagɨwa-tɨrɨmbala ga leege dan̰ lɔr cayge bɨ.

⁵ Ɨŋ sol wɨlɨn̰e andaŋ a kali-tɨrɨmbala dɨŋ le bɨ, ɨŋ je noy kalaŋ ye boy nee bɨ, ale gɨ da Kumu nee bɨ. A tumoy kali-tɨrɨmbala le ɨŋ sol dɨngɛ jurgum ga ƴeede tɨwa man̰, kan na Turnɔ di da Kumu ga jurgum.

⁶ Ɗaŋ coŋ a tumoy kali-tɨrɨmbala le, ɨŋ sol kɨɗɨn̰ ga woli ga gɨlɨn̰ hɨn̰ kuray gɨ gumu taa taa gɨ kaŋdi ɨre arɨn̰ yarara bɨrɨŋ gɨ toyge dugo kalɨn̰ ma ungo ɓal sɔlɛ. Ɨŋ sol kandi-se ga gɨɗɨgɨ-Kumu gaŋ won̰ poɗɨn̰ ga gusɨge wandɨn̰ dan̰ ti, jɨn̰ tumɔ bɨ karu bɨ a duroy kali-tɨrɨmbala dɨŋ bɨ, a kardi nee nɨwɨre caa daa bɨ.

⁷ Kandi-se ga cay wase le gɨlɨn̰ hɨn̰ gusugo wo̰ bɨ, ga cay sɔɔdɨge gɨlɨn̰ hɨn̰ si ba jongɨrɛ gɨ marɨna wo̰ bɨ, ga cay sɨbɨdɨge cɨndi gɨlɨn̰ cɨn̰ ungo wo̰ bɨ, ga cay poɗɨn̰dɨge gɨlɨn̰ hɨn̰ kɨde gɨ ɨre say wo̰ bɨ.

⁸ Kandi-se ga gɨɗɨgɨ-Kumu gaŋ ga poɗɨn̰ ga nee le waŋ waŋ kalɨn̰ ma orɨn̰ dan̰ majɨbii won̰ jii jii bɨ, ti ƴee majɨbiige daa bɨ dugo bɨ ɗəndəŋ. Kan ɨre kɨbɨge kɨra son̰do dan̰ tɨwa di ɨni ɗan̰ge kɨbɨ kɨra daa naŋ bɨrɨŋ yen̰ge hɨn̰: «Ba-wɔyɛ dan̰ cɨndi, Ba-wɔyɛ dan̰ cɨndi, Ba-wɔyɛ dan̰ cɨndi, Na Ba-gulɔŋ Kumu gɨ dɔnɔdi ɗɨn̰ dɔnɔ nɔm, Ban som nee a boy wɔlɛ gɨ haw kɛ gɨŋ bɨ, A boy wɔlɛ gɨ tumɔ gɨŋ bɨ, A boy wɔlɛ gɨ kɨya tɨlga nee gɨŋ bɨ.»

⁹ Kɨɗɨn̰ ga kandi-se ga gɨɗɨgɨ-Kumu gaŋ ga poɗɨn̰ ga nee le, kɨbɨge kɨra dɨbɨn̰ge gusoŋ-tɔgɛ bɨ, dɨbɨn̰ge hurɔmɔ bɨ, leen̰ge ho’o bɨ a cay ban gɨ som a cay kali-tɨrɨmbala dɨŋ bɨ, a cay ban gɨ som-bɨra ɨlge dan̰ ɨlge bɨ na,

¹⁰ ga muɗoldoŋ ga toyge-sɔɔ-cayge-poɗɨn̰ le poyge gɨbayge dugo tumoy ban gɨ som a cay kali-tɨrɨmbala dɨŋ bɨ, yen̰ge ba-sɔmɛ-bɨra ɨlge dan̰ ɨlge, been̰ge jagɨwa tɨrɨmbala kage dugo tumoy kali-tɨrɨmbala dɨŋ yen̰ge hɨn̰:

¹¹ «Ay Ba-gulɔŋ Kumu koni, Ji ɓal gɨ kan kɨya dɨbɨn̰ gusoŋ-tɔgɛ can̰ bɨ, Dɨbɨn̰ hurɔmɔ can̰ bɨ, ɓal wɔɔ dɔnɔ bɨ, Kɨya wa na ji-bandi ba se hɨnga nɔm. Na dan̰ kuduroy geye kon̰ ƴɔbɨ ma Hɨnga nɔm lee gusɨge bɨ woy bɨ.»