Wasɨn̰a 3 - Gabri Maja

Magtubu di walge bɨn̰ Ka-Daye ga Sardɨ

¹ Ungo gɨ ɨŋ ba solii le ye ɗaŋ coŋ ye hɨn̰: «Wala magtubu gɨyɨn̰ bɨn̰ ba-ƴɔbɛ gɨ daa nii gɨ ba sɔlɛ kardi Ka-Daye ga a cay ƴaa-di-gumu di Sardɨ. «Ban gɨ Turnɔ di da Kumu ga jurgum bɨ, dɛsɨɗɛŋ ga jurgum bɨ woyge kobi le ye hɨn̰: Ɨŋ sol gɨye-lɔɔdɨn̰. Gusoŋ gɨ ni sɔmɛ-bɨra ba yɔɔ can̰ kalɨn̰ wo̰, ama leen̰ cɨndi na ji woy gɨlɨn̰ na hɨn̰ ungo gɨ ma wo̰ ɨni.

² Sɨmagɨŋ-bɨra, lun̰doŋgɨŋ usa te aye kudurɔ kogɨŋ gɨŋ gɨ dḛ gɨ gey mare le. Kɨya wa gɨye-lɔɔdɨgɨŋ gɨ kɨŋ lee le duroŋ dan̰ durɔ cɨrɛɗ a cɨn̰ Kumu hɨnge naŋ.

³ Hɨngɨŋ a cay kɔl gɨ tumɔ kɨŋ ba je bɨ a cay gɨyəŋ gɨ kɨŋ ba ƴen̰ kɔl gɨ nee le bɨ. Gamagɨŋ kɔl gɨ nee le bɨ, bɨlgɨŋ haldɨgɨŋ bɨ. Hɨn̰ gɨ kɨŋ na sɨma-bɨra naŋ na, ɨŋ kɨya andaŋ caygɨŋ dus hɨn̰ ba hase wo̰ dan̰ tɨwa di kɨŋ kɨya sɔlɛ caa naŋ.

⁴ Ama na hɨn̰ wo̰ kalɨn̰ ma, kɨŋ orɨn̰ dan̰ kalaŋ ga pɨna a cay ƴaa-di-gumu di Sardɨ ga ɗage badɨge kage ƴɨma kɨni naŋ. Kalaŋ ga nee le kɨya tɔbɛge badɨge ga bɛdɨrdɛŋ bɔgɔŋge, kɨya gɨ kan ɓalge tɔbɛge hage.

⁵ Na hɨn̰ wo̰ ma, ungo gɨ na bɨya-kɨmbɨl na, ban kɨya dobii badɨge ga bɛrɛ tɨrɨjɨ gusi. Ɨŋ kɨya yɨde gusondi duroy magtubu sɔmɛ-bɨra gɨŋ coŋ naŋ, ama ɨŋ kɨya yɔ daa waŋ tumoy Banɨ dan̰ ka-ƴɔbɛ ga daa nii gɨ ungo gɨ nee le, naa hɨnge leen̰ cɨndi.

⁶ «Waŋ waŋ gɨ sɨmayi na wɨya nee na, kuɗa gɨ ban dɨra sɨmayi jan̰ kɔl gɨ Turnɔ di da Kumu yen̰ Ka-Daye le.»

Magtubu di walge bɨn̰ Ka-Daye ga Piladelpi

⁷ Ungo gɨ ɨŋ ba solii le jogɨ yɔ ɗaŋ coŋ hɨn̰: «Wala magtubu gɨyɨn̰ bɨn̰ ba-ƴɔbɛ gɨ daa nii gɨ ba sɔlɛ kardi Ka-Daye ga a cay ƴaa-di-gumu di Piladelpi. «Ban gɨ woy dan̰ cɨndi bɨ, ban gɨ na ungo gɨ hɨnde bɨ, ban gɨ ƴom lakɨle ga da kɨlma Dabid kobi bɨ. Ban gɨ na hanga kɨbɨ-ƴaa na, ungo pɨna wo̰ kalɨn̰ ma kɨya ɓale lɨge naŋ bɨ, ban gɨ na lɨgɨ kɨbɨ-ƴaa na, ungo pɨna wo̰ kalɨn̰ ma kɨya ɓale hange naŋ bɨ le, ye hɨn̰:

⁸ “Ɨŋ sol gɨye-lɔɔdɨgɨŋ nɔm. Sɨlagɨŋ, ɨŋ haŋgɨ kɨbɨ-ƴaa ɗe hangɨwa a tumoygɨŋ”. Ungo pɨna wo̰ kalɨn̰ ma kɨya ɓale lɨge naŋ. Ɨŋ sol gɨ togɨygɨŋ na dḛ wo̰ haa, ama na hɨn̰ wo̰ kalɨn̰ ma, kɨŋ gam dan̰ kɔl hɨnge bɨ kɨŋ man̰a kɨbɨgɨŋ kol canɨ naŋ bɨ.

⁹ Sɨlagɨŋ, kan ga yege gɨ ke naa Jubɨn̰əŋ ama kan na Jubɨn̰əŋ naŋ le, kan olge Kumu duroy ƴaa-daye-di-da-Jubɨn̰əŋ hage ama leen̰ cɨndi na, kan na ka-poy, kan na ƴaa-daye di da Sidan. Kan ga nee le na, ɨŋ kɨya lɔɔ gɨ kan kɨya ɨrga gusɨgɨŋ bɨ, pɔyɛ gɨbayge dugo tumoygɨŋ bɨ ɗe kan solɨn̰ge hɨn̰ gɨ ɨŋ na geygɨŋ wo̰ bɨ.

¹⁰ Kɨŋ gam kɔl hɨnge ƴomɨn̰ kuduroygɨŋ. Na toy di hɨn̰ wo̰ ma ɨŋ-bandi kalɨn̰ ma ɨŋ kɨya gamgɨŋ a tɨwa di hɨnga ga ni kuduroy-hɔmɛ kɨya andaŋ a cay kalaŋ ga cay gɨsəŋ gaŋ nɔm. Hɨnga ga ni kuduroy-hɔmɛ le, kɨya gɨwase kalaŋ ga somge cay gɨsəŋ gaŋ kɛ.

¹¹ Ɨŋ tɨlga nee mɨnde. Ƴɨmagɨŋ aye kudurɔ kogɨŋ gɨ kɨŋ orɨn̰ le usa, ɗe ungo wo̰ bɔɗɛ jagɨwa bɔyɛ kɨmbɨl kogɨŋ naŋ.

¹² «Ungo gɨ na bɨya-kɨmbɨl na, ɨŋ kɨya lɔɔ gɨ ban kɨya bɨle sɨya gɨ ni duroy ƴaa-di-da-Kumu hɨnge. Ban kɨya sɔmɛ nee bɨ andaŋ duroy nee coŋ naŋ bɨrɨŋ. Ɨŋ kɨya wale guson̰ Kumu hɨnge a cayi bɨ, ɨŋ kɨya wale guson̰ cay ƴaa-di-gumu da Kumu hɨnge di na Jerusalɛm di hɨrɨwa di sayga gusi Kumu gɨsɨn dugo cayi bɨ, ɨŋ kɨya wale gusoŋ gɨ hɨrɨwa a cayi bɨ.

¹³ «Waŋ waŋ gɨ sɨmayi na wɨya nee na, kuɗa gɨ ban dɨra sɨmayi jan̰ kɔl gɨ Turnɔ di da Kumu yen̰ Ka-Daye le.»

Magtubu di walge bɨn̰ Ka-Daye ga Lawdise

¹⁴ Ungo gɨ ɨŋ ba solii le jogɨ yɔ ɗaŋ coŋ hɨn̰: «Wala magtubu gɨyɨn̰ bɨn̰ ba-ƴɔbɛ gɨ daa nii gɨ ba sɔlɛ kardi Ka-Daye ga a cay ƴaa-di-gumu di Lawdise. «Ban gɨ na Amɛn bɨ, ban gɨ na tɨmon̰ gɨ ɨre a cay tɨbayidɨŋ bɨ, ban gɨ na ungo gɨ hɨnde bɨ, ban gɨ danayi le Kumu ɗen̰ hɨnga nɔm bɨ, ye hɨn̰:

¹⁵ Ɨŋ sol gɨye-lɔɔdɨgɨŋ. Ɨŋ sol gɨ kɨŋ ɨl naŋ bɨ jala naŋ bɨ. Kuɗadi na kɨŋ jala naŋ le, kɨŋ ɨl.

¹⁶ Ama gɨ kɛ na ɨŋ kɨya budolgɨŋ dan̰ kɨbɨnɨ coŋ, kɨya wa kɨŋ woy hɨn̰ kaŋ ga ɨl gul gul wo̰, gɨlɨn̰ hɨn̰ kaŋ ga ɨli naŋ bɨ, jali naŋ bɨ.

¹⁷ Kɨya wa kɨŋ ye hɨn̰: “Ni na ka-wɔɔ hɨnga bɨ, kandi-wɔɔ walɨn̰ gusɨni tɛlɛlɛ tɛlɛlɛ bɨ, n̰agedi hɨnga pɨna wo̰ laani naŋ bɨ.” Ama kɨŋ sɨla gɨ leen̰ cɨndi toygɨŋ na bɛrɛ naŋ bɨ, kɨŋ sɨla gɨ cɨndɨgɨŋ na laa n̰age naŋ bɨ, wɔɔdɨgɨŋ na unɔ naŋ bɨ, kɨŋ naa ka-bɨbe naŋ bɨ, kɨŋ na ɨra toygɨŋ kalɨn̰ naŋ bɨ.

¹⁸ Na toy di hɨn̰ wo̰ ma, ɨŋ gɨlgɨŋ kɔl gɨ kɨŋ ɨre kɨl lɔr di woy kɔbɔŋ di uyge tɨwa dɨŋ agɨŋ bɨlɨn̰ ka-wɔɔ hɨnga. Kɨlgɨŋ badɨge ga bɛrɛ tɨrɨjɨ kɔbɔŋ tɨlan̰gɨŋ gusɨgɨŋ gɨ woy kalɨn̰ ɗe dasi dɨgɨŋ naŋ bɨ. Kɨlgɨŋ gasɨɗe ga ni dɨbe tɨdɨgɨŋ a kɔbɔŋ ɗe tɨdɨgɨŋ solɨn̰ kɨɗɨn̰ arɨn̰ yarara bɨ.

¹⁹ Ɨŋ-bandi na kalaŋ nɔm ga ɨŋ geyge le, ɨŋ halge bɨ ɨŋ ɗalge bɨ. Na toy di hɨn̰ wo̰ ma, laagɨŋ gusi-hɨmbalwa a te kɔl hɨnge gɨŋ bɨ, bɨlgɨŋ haldɨgɨŋ bɨ.

²⁰ Sɨlagɨŋ, ɨŋ ɨre kɨbɨ-ƴaa gɨŋ doŋ de kɨbɨ-ƴaa. Hɨn̰ gɨ ungo na ja dɔgɛ kɨbɨ-ƴaa bɨ hanga bəŋ na, ɨŋ kɨya andaŋ toyi ƴen̰ bɨ, ɨŋ kɨya dɔɔ hɨnga danayi bɨ, ban kalɨn̰ ma kɨya dɔɔ hɨnga danaŋ bɨ.

²¹ «Ungo gɨ na bɨya-kɨmbɨl na, ɨŋ kɨya aye nonɨ bii ɗe som danaŋ a cay kali-tɨrɨmbala tɨnge dɨŋ. Ho’o ban kɨya lɔɔ hɨnga hɨn̰ gɨ ɨŋ-bandi kalɨn̰ ma ɨŋ ba lee wo̰ bɨ. Ɨŋ-bandi ɨŋ boy-kɨmbɨl bɨ, ɨŋ or sɔmɛ dan̰ Banɨ Kumu a cay kali-tɨrɨmbala toyi dɨŋ.

²² «Waŋ waŋ gɨ sɨmayi na wɨya nee na, kuɗa gɨ ban dɨra sɨmayi jan̰ kɔl gɨ Turnɔ di da Kumu yen̰ Ka-Daye le.»