Wasɨn̰a 22 - Gabri Maja

¹ Kardi nee, ba-ƴɔbɛ gɨ daa nii le gɨləŋ kaŋdi kuray gɨ ungo na saa na kɨya sɔmɛ-bɨra. Kaŋdi kuray gɨ kaŋdi ɨre arɨn̰ cərərə bɨrɨŋ gɨ toyge ga dugo kalɨn̰ ma ungo ɓal sɔlɛ, andaŋ na a te kali-tɨrɨmbala di da Kumu dɨŋ bɨ, da Kurɨn̰-dɨmangɨ dɨŋ bɨ.

² Kuray le gɨre na a gɨyəŋ gɨ a duroy cay ƴaa-di-gumu dɨŋ le bɔb. Ɗaŋ coŋ, hɨya gɨ ungo na daa wɔɔdi na kɨya sɔmɛ-bɨra woy a kɨbɨ kuray gɨ nee gɨŋ le. Na hɨya gɨ wɔɔ tɨba mɔjɨ-caa-sɔɔ duroy ɨlge pɨna bɨ. Dan̰ kɨdɨrɛ kɨdɨrɛ ban wɔɔ bɨ, kabɨn̰di kalɨn̰ ma na gasɨɗe ga bɨn̰ te wɔɔ gɨ da kalaŋ pɔɗɛ bɨ.

³ Ɓɨse kɨya unɔ bɨrɨŋ. Ɨni na, kali-tɨrɨmbala di da Kumu bɨ di da Kurɨn̰-dɨmangɨ bɨ, kɨya wɔyɛ a duroy cay ƴaa-di-gumu dɨŋ le. Kɨɗɨn̰di ga nee gaŋ le, marɨne ka-lɔɔ gɨye kayi kɨya n̰ɨriige.

⁴ Kan kɨya sɔlɛ cɨndi bɨ kɨya ɗɔge gusondi a jɨndɨge bɨ.

⁵ Son̰do kɨya unɔ bɨ, ungo kɨya orɨn̰ dan̰ n̰agedi asɨn̰a da dɨngɛ naŋ bɨ, da tɨwa di daa naŋ bɨ, kɨya wa Ba-gulɔŋ Kumu asɨn̰ asɨn̰a di cayge. Kan kɨya dɔɔ-ƴaa danayi ɨlge dan̰ ɨlge.

Caga gɨ da Jesu

⁶ Kardi nee, ba-ƴɔbɛ gɨ daa nii le yəŋ hɨn̰: «Kɔl nɔm gɨ kɛ le na hɨnde bɨ ban kɨya lɔɔ gusi leen̰ cɨndi bɨ. Ba-gulɔŋ Kumu gɨ gɨyɨn̰ dan̰ kɔl koyi a cay ka-yɔɔ-kɔl-gɨ-Kumu-ba-yɔɔ dan̰ gɨyəŋ gɨ da Turnɔ di da Kumu le, ban gɨy dan̰ ba-ƴɔbɛ koyi gɨ daa nii kɨya gɨlɨn̰ marɨne kayi ka-gɨye hɨnga ga naa wa wa kalɨn̰ ma kɨya ɨrga mɨnde.»

⁷ Jesu ye hɨn̰: «Sɨlagɨŋ, ɨŋ tɨlga mɨnde nee. Tumoy wolwa woy kol cay ungo gɨ ba game kɔl gɨ Kumu ba-yɔɔ gɨ woy a duroy magtubu di kɛ dɨŋ le.»

⁸ Ungo gɨ je kɔl gɨ nee le bɨ, sol hɨnga ga nee le bɨ le, na ɨŋ-bandi Ja̰. Kɨɗɨn̰ ga ɨŋ je bɨ, sol bɨ ɨni na, ɨŋ poy gɨbanɨ dugo tumoy ba-ƴɔbɛ gɨ daa nii gɨ ba gɨləŋ hɨnga ga nee le kɨya n̰ɨrii.

⁹ Ama ban yəŋ hɨn̰: «Ɨŋ’ɨ̰, pɔyɛ gɨban̰ dugo tumonɨ naŋ. N̰ɨr na Kumu. Ɨŋ na marɨna ba-gɨye hɨn̰ ji-bandi wo̰ bɨ, hɨn̰ karmɨn̰ ka-yɔɔ-kɔl-gɨ-Kumu-ba-yɔɔ wo̰ bɨ, hɨn̰ kalaŋ nɔm ga ka-game kɔl gɨ da magtubu di kɛ le wo̰ bɨ.»

¹⁰ Kardi nee, ba-ƴɔbɛ gɨ daa nii le yəŋ ɗaŋ hɨn̰: «Kɔl gɨ Kumu ba yɔ gɨ woy a duroy magtubu di kɛ dɨŋ le, ji ɗɔɔ ba wɔsɛ. Kɨya wa tɨwa di da hɨnga nɔm ga nee le, cayge woy mɨnde.

¹¹ Kuɗa gɨ ungo gɨ ba lɔɔ hɨnga ga dan̰ durɔ ɗɨngar naŋ, laa ɨran̰ dan̰ cɨndi tumɔ bɨ, ungo gɨ ba lɔɔ kɨni laa ɨran̰ dan̰ cɨndi tumɔ bɨ, ungo gɨ ba lɔɔ hɨnga ga dan̰ durɔ ɗɨngar, laa ɨran̰ dan̰ cɨndi tumɔ bɨ, ungo gɨ ba wɔyɛ dan̰ cɨndi, wɨya dan̰ cɨndi jɨn̰ tumɔ bɨ.»

¹² Ɨni na, Jesu ye hɨn̰: «Sɨlagɨŋ, ɨŋ tɨlga mɨnde nee, kɨya bɨn̰ waŋ waŋ kalɨn̰ ma hɨnga ga ni cay-kɔbɔ ga ojɨ cay gɨye-lɔɔdi lɔɔdi.

¹³ Ɨŋ na Alpa bɨ Omega bɨ, gɨ tumɔ bɨ gɨ karu bɨ, ɨŋ na ba-se te hɨnga bɨ, ba-dɨɗe kɨbɨge bɨ.»

¹⁴ Tumoy wolwa kɨya wɔyɛ kol cay kalaŋ ga pɨlge badɨge kage ga sɨngɨɗɨdəŋ. Kɨya wa badɨge kage na arɨn̰a na, kan kɨya wɔɔ gɨyəŋ gɨ ni andɨn̰ duroy cay ƴaa-di-gumu dɨŋ bɨ, dɨn̰ge wɔɔdi hɨya gɨ ungo na daa na kɨya somɨn̰-bɨra bɨ.

¹⁵ Ama gaye bɨ, ka-lɔɔ tɨmba bɨ, ka-lɔɔ gɨye yɔyɛ gɨ toyi kan̰dɨge kan̰dɨge bɨ, ka-dɨɗe kɨɗɨn̰ bɨ, ka-n̰ɨre kula bɨ, ka-geye kɔl yɔ ga ni poy naŋ le, yɔɔdɔ kɔl ga ni poy dan̰ wɔlɛ pɨna pɨna bɨ le, kɨya bɔɔge doŋ.

¹⁶ Ɨŋ-bandi Jesu, ɨŋ gɨy dan̰ ba-ƴɔbɛ hɨnge gɨ daa nii kol caygɨŋ kɨŋ-gandi Ka-Daye ɗe agɨŋ na jen̰ tɨmon̰ di da hɨnga nɔm ga woy a duroy magtubu di kɛ dɨŋ le. Ɨŋ na kungay Dabid bɨ kɨlma gɨ a te wɨn̰je koyi gɨŋ bɨ. Ɨŋ na turɨmbɔlɔ di asɨn̰ dan̰ tɔgɔɔ bɨ.

¹⁷ Turnɔ di da Kumu bɨ, ɗe kujɔ bɨ, yege hɨn̰: «Ɨre!» Kuɗa gɨ waŋ waŋ gɨ na ja kɔl gɨ kɛ le ya hɨn̰: «Ɨre!» Waŋ waŋ gɨ gamase na daayi na, kuɗa gɨ ban ɨre. Waŋ waŋ gɨ na gey sɔɔ kaŋ ga ni sɔmɛ-bɨra na, kuɗa gɨ ban ɨre ƴa kalɨn̰.

Kɔl gɨ ni dɨɗɨn̰ kɨbi

¹⁸ Waŋ waŋ gɨ na ja kɔl nɔm gɨ Kumu ba yɔ gɨ walge a duroy magtubu di kɛ dɨŋ le, ɨŋ-bandi Ja̰ ɨŋ ye daa waŋ hɨn̰ gɨ ungo na dɨbɨ kɔl gɨ ɗaŋ cay kɔl nɔm gɨ kɛ le na, hɨnga ga ɨsɨni ga ka-mɔndɛ kɨɗɨn̰ ga walge a duroy magtubu di kɛ dɨŋ le, Kumu kɨya lɔɔ gɨ na andaŋ cayi.

¹⁹ Hɨn̰ gɨ ungo na dɨra kɔl pɨna duroy kɔl nɔm gɨ Kumu ba yɔ gɨ woy a duroy magtubu di kɛ dɨŋ le dɨbɨ coŋ na, Kumu kɨya narii dɨbe tɨbayi duroy cay ƴaa-di-gumu di woy dan̰ cɨndo di kan ye kɔldɔ duroy magtubu di kɛ dɨŋ le bɨ, narii dɔɔ wɔɔdi hɨya gɨ ni somɨn̰-bɨra coŋ bɨ.

²⁰ Jesu ba lɔɔ tɨmon̰ di da kɔl nɔm gɨ da hɨnga ga kɛ le ye hɨn̰: «Ho’o, ɨŋ tɨlga mɨnde nee.» Ɗa-ɗe-woy-hɨn̰-wo̰! Marana ta, Ba-gulɔŋ Jesu, ɨre.

²¹ Kuɗa gɨ Ba-gulɔŋ Jesu laa ɗarwa danagɨŋ nɔm.