Wasɨn̰a 21 - Gabri Maja

Gɨɗɨgɨ-Kumu dan̰ cay gɨsəŋ ga hɨrɨwa

¹ Kardi nee, ɨŋ sol gɨɗɨgɨ-Kumu dan̰ cay gɨsəŋ ga hɨrɨwa. Gɨɗɨgɨ-Kumu dan̰ cay gɨsəŋ ga tumɔ kaɗɨn̰ge coŋ bɨ, kuray gɨ gumu taa taa unɔ coŋ bɨ.

² Ɨni na, ɨŋ sol cay ƴaa-di-gumu di woy dan̰ cɨndo di na Jerusalɛm di hɨrɨwa le, sayga gɨɗɨgɨ-Kumu a gusi Kumu gɨsɨngɨ dugo. Hɨndi lee marna tɔgɨ hɨn̰ tɨmbali di n̰an guso kɨya gorɨn̰ ƴaa dan̰ kudurɔɔ wo̰.

³ Ɨni na, ɨŋ je noy ungo gɨ ye dan̰ togi sayga a cay kali-tɨrɨmbala dɨŋ ye hɨn̰: «Sɨlagɨŋ! Kɨɗɨn̰ sɔmɛ ga da Kumu kɨya wɔyɛ duroy kalaŋ ga ɨndəŋ! Ban kɨya sɔmɛ duroyge bɨ, kan kɨya bɨləŋ te kalaŋ kayi bɨ. Ho’o, Kumu gusi koyi kalɨn̰ ma kɨya sɔmɛ danage bɨ, ban kɨya wɔyɛ na Kumu koge bɨ.

⁴ Ban kɨya hane kaŋdi cɨndɨge a cɨndɨge pɨrɛd pɨrɛd coŋ bɨ, tɨma kɨya unɔ bɨ, ɨle tɨma kɨya unɔ bɨ, gɔsɛ kɨya unɔ bɨ, cɨn̰-n̰age kɨya unɔ bɨ, kɨya wa cay gɨsəŋ ga ɨlgi kaɗɨn̰ coŋ.»

⁵ Ɨni na, Kumu ba-sɔmɛ a cay kali-tɨrɨmbala dɨŋ le ye hɨn̰: «Sɨla, ɨŋ bɨle hɨnga nɔm leen̰ ga hɨrɨwa.» Bɨ ban yəŋ ɗaŋ hɨn̰: «Wala dugo, kɨya wa kɔl hɨnge nɔm na hɨnde bɨ, ban kɨya lɔɔ gusi leen̰ cɨndi bɨ.»

⁶ Bɨ ban jɨga yəŋ ɗaŋ hɨn̰: «Te kɔl ayaŋ ɨni. Ɨŋ na Alpa bɨ Omega bɨ, ɨŋ na ba se te hɨnga bɨ, ba-dɨɗe kɨbɨge bɨ. Waŋ waŋ gɨ gɨmase na daayi na, ɨŋ kɨya bii kaŋ ga ni sɔɔ kalɨn̰ a cɨn̰-kaŋ ga ni sɔmɛ-bɨra gaŋ.

⁷ Waŋ waŋ gɨ na aya banga na, tɔrɛ-kɨbɨ gɨ nee le nɔm na hɨnga kayi ga ni ban̰di-gulɔŋ. Ɨŋ kɨya bɨle Kumu koyi bɨ, ban kɨya bɨle kuronɨ bɨ.

⁸ Ama ka-hundɔrɔ bɨ, ka-ɨre a cay gasɨndɨge gaŋ naŋ bɨ, kalaŋ ga haldɨge ɨsɨn tɔgɨ bɨ, ka-dɨɗe kalaŋ bɨ, ka-lɔɔ gɨye yɔyɛ gɨ toyi kan̰dɨge kan̰dɨge bɨ, ka-lɔɔ tɨmba bɨ, ka-n̰ɨre kula bɨ, ka-poy nɔm bɨ le, kɨɗɨn̰ kage kɨya wɔyɛ na a duroy kuraydi tɨwa di ƴee hɨn̰ kɨrbaŋdi hɨnga ga ƴee hɨn̰ tɨwa wo̰. Hɨnga ga nee le, ma na tɨma di cay-sɔɔ.»

Jerusalɛm di hɨrɨwa

⁹ Kardi nee, ba-ƴɔbɛ gɨ daa nii pɨna, gɨ a duroy kan ga jurgum ga tumɔ ƴomge kobo ga jurgum ga hɨnga ga ɨsɨni ga ka-mɔndɛ kɨɗɨn̰ ga ni kagadɨge le, ɨrga gusɨnɨ yəŋ ye hɨn̰: «Ɨre aŋ gɨlɨn̰ ɗe kujɔ di kɨya bɨle tam Kurɨn̰-dɨmangɨ le.»

¹⁰ Kardi nee, kɨɗɨn̰ ga Turnɔ di da Kumu ɨre lee gɨye a gusɨnɨ ƴee na, ba-ƴɔbɛ gɨ daa nii le ay turnonɨ orɨn̰ ɗɔɔ a gɨɗɨgɨ garma gɨ pɨna wo̰ gɨ sɨngɨɗɨ kɨvbɨj daa bɨ, gɨləŋ cay ƴaa-di-gumu di woy dan̰ cɨndo di na Jerusalɛm le. Cay ƴaa-di-gumu di nee le, sayga gɨɗɨgɨ-Kumu gusi Kumu gɨsɨn dugo.

¹¹ Hɨndi le, gusoŋ-tɔgɛ gɨ da Kumu asɨn̰ a gusoo bɨ, jɨran̰de na hɨn̰ garma gɨ kɨledi osu tɔgɨ gɨ teeyige jasɨpɨ wo̰ bɨ, hɨn̰ gaasa gɨ arɨn̰ yarara wo̰ bɨ.

¹² Bɨrɨm gɨ nɨwɨre cay ƴaa-di-gumu le, dɨmbɨre tɔgɨ bɨ, sɨngɨɗɨ bɨ, ƴee cay ƴaa cɨrɛɗ daa. Bɨrɨm le, orɨn̰ dan̰ kɨbɨ-ƴaa won̰ mɔjɨ-cayge-sɔɔ bɨ, ka-ƴɔbɛ ga daa nii mɔjɨ-cayge-sɔɔ ɨrege kɨbɨ nee pɨna pɨna nɔm bɨ. Walge guson̰ te wɨn̰je gɨ da karɨn̰ Ɨsɨrayɛl ga mɔjɨ-cayge-sɔɔ a kɨbɨ-ƴaa gɨŋ le pɨna pɨna nɔm bɨ.

¹³ A jɨn̰ kɨwa gɨ te kumu gɨŋ kɨbɨ-ƴaa won̰ sɨbɨ bɨ, a jɨn̰ kɨwa gɨ maw gɨŋ kɨbɨ-ƴaa won̰ sɨbɨ bɨ, a jɨn̰ kɨwa gɨ te golo gɨŋ kɨbɨ-ƴaa won̰ sɨbɨ bɨ, a jɨn̰ kɨwa gɨ manga gɨŋ kɨbɨ-ƴaa won̰ sɨbɨ bɨ.

¹⁴ Bɨrɨm gɨ da cay ƴaa-di-gumu le, orɨn̰ dan̰ tɨbayi mɔjɨ-cayge-sɔɔ. Walge guson̰ ka-gɨre-gɨye ga mɔjɨ-cayge-sɔɔ ga da Kurɨn̰-dɨmangɨ le cay nee pɨna pɨna nɔm.

¹⁵ Ba-ƴɔbɛ gɨ daa nii gɨ ɨre ye kɔl danaŋ le, orɨn̰ dan̰ kɨlɛŋ gɨ leege na dan̰ lɔr a kobi. Na kɨlɛŋ gɨ ni gɨsɨn̰ cay ƴaa-di-gumu dan̰ kɨbɨ-ƴaadon̰əŋ bɨ, bɨrɨmdon̰əŋ bɨ.

¹⁶ Cay ƴaa-di-gumu le tɨbɨn̰do won̰ poɗɨn̰. Sɨngɨɗɨwado bɨ wolwado bɨ ɓadɨldɨn̰ dɛj dɛj. Ba-ƴɔbɛ gɨ daa nii gɨsɨ cay ƴaa-di-gumu le dan̰ kɨlɛŋ le na, sɨngɨɗɨwado bɨ wolwado bɨ hɔgɨwado bɨ na, ɓal gangɨ dubu mɔjɨ cay sɔɔ tɨbɨn̰do gɨŋ pɨna pɨna.

¹⁷ Ɨni na, ba-ƴɔbɛ gɨ daa nii gɨsɨ bɨrɨm gɨ nɨwɨre cay ƴaa-di-gumu le sɨngɨɗɨwado gɨ jɨn̰ daa. Sɨngɨɗɨwado le, ɓal tɨba dubu aru dan̰ tɔɔ poɗɨn̰ cay poɗɨn̰. Gɨse gɨ kalaŋ ba leedɨn̰ge gɨye ɓɨrag le, na ban ma ba-ƴɔbɛ gɨ daa nii le gɨsɨn̰ gɨse.

¹⁸ Bɨrɨm le gaɗɨge na dan̰ garma gɨ ni jasɨpɨ bɨ, gaɗɨge ƴaan̰əŋ ga a cay ƴaa-di-gumu le na dan̰ lɔr di arɨn̰ cərərə hɨn̰ gaasa wo̰ bɨ.

¹⁹ Garma ga gaɗɨn̰ge te bɨrɨm gɨ da cay ƴaa-di-gumu le, parge na dan̰ garma ga kɨledɨge osɨdoŋ ga toyge kan̰dɨge kan̰dɨge. Garma gɨ cay wase gɨ ni sɨn̰ te bɨrɨm le teeyige na jasɨpɨ, gɨ cay sɔɔdɨge le teeyige na sapir, gɨ cay sɨbɨdɨge le teeyige na kalsedɨwan, gɨ cay poɗɨn̰dɨge le teeyige na emerodɨ,

²⁰ gɨ cay baydɨge le teeyige na sardonig, gɨ cay jiidɨge le teeyige na sardɨwan, gɨ cay jurgumdɨge le teeyige na kirijolit, gɨ cay margɨmdɨge le teeyige na beril, gɨ cay dɨngɛsɨdɨge le teeyige na topaj, gɨ cay mɔjɨdɨge le teeyige na kɨrijopɨraj, gɨ cay mɔjɨ-cayge-pɨnadɨge le teeyige na yasɛ̰tɨ, gɨ cay mɔjɨ-cayge-sɔɔdɨge le teeyige na ametitɨ.

²¹ Leege babɨ ga mɔjɨ-cayge-sɔɔ le na dan̰ mon̰ mɔjɨ-cayge-sɔɔ. Leege babɨ pɨna na dan̰ mon̰ pɨna. Gɨyəŋ gɨ a duroy cay ƴaa-di-gumu dɨŋ le, leege na dan̰ lɔr di arɨn̰ cərərə hɨn̰ gaasa wo̰.

²² Ama, ɨŋ sɨla ƴaa-di-da-Kumu a cay ƴaa-di-gumu dɨŋ le naŋ, kɨya Ba-gulɔŋ Kumu gɨ dɔnɔdi ɗɨn̰ dɔnɔ nɔm bɨ, Kurɨn̰-dɨmangɨ bɨ, ɨrege nee dan̰ gusɨge koge. Na kan ma na ƴaa-di-da-Kumu.

²³ Cay ƴaa-di-gumu di nee le ɨran̰ dan̰ n̰age da asɨn̰a da tɨwa naŋ bɨ, asɨn̰a da kɨdɨrɛ naŋ bɨ, kɨya wa asɨn̰a da Kumu ba bɨle asɨn̰do bɨ, Kurɨn̰-dɨmangɨ gusi kalɨn̰ ma na dɨngɛdo bɨ.

²⁴ Te wɔɔ gɨ da kalaŋ orge na te asɨn̰a di nee dɨŋ le bɨ, kɛrɨmbɛlɛŋ ga a cay gɨsəŋ gaŋ kalɨn̰ ma ɨrgan̰ge dan̰ gɨmɨn̰awdɨge nee bɨ.

²⁵ Kɨbɨ-ƴaado kɨya lugudoŋ daa naŋ bɨrɨŋ kɨya wa a cay ƴaa di nee dɨŋ le, kɨɗɨn̰ kɨya ɨndɨwa naŋ bɨrɨŋ bɨ.

²⁶ Te wɔɔ gɨ da kalaŋ kɨya ɨrgan̰ge dan̰ gɨmɨn̰awdɨge bɨ, dan̰ hurɔmɔdɨge bɨ, a duroy cay ƴaa-di-gumu di nee dɨŋ le kɨya bɨn̰ Kumu.

²⁷ Hɨnga ga ni kɨni kɨya andaŋ a duroy cay ƴaa-di-gumu dɨŋ le naŋ bɨ, kalaŋ ga ka-lɔɔ bɨrane bɨ, ka-poy bɨ, kɨya andaŋge a duroy cay ƴaa-di-gumu dɨŋ le naŋ. Ama na kan ga walge gusondɨge a duroy magtubu sɔmɛ-bɨra da Kurɨn̰-dɨmangɨ dɨŋ le ƴɔbɨ, ba kɨya andaŋge a duroy cay ƴaa di nee dɨŋ le.