Wasɨn̰a 20 - Gabri Maja

Ɨlge gɨ dubu

¹ Kardi nee, ɨŋ sol ba-ƴɔbɛ gɨ daa nii gɨ pɨna wo̰ sayga gɨɗɨgɨ-Kumu gɨŋ gɨsɨngɨ dugo. Ban orɨn̰ dan̰ lakɨle ga ni lɨgɨn̰ kɨbɨ umboŋ gɨ ɗɨgi mɨrɨg gɨ kagadi unɔ bɨ, mɔrɨyɔŋ ga nɨn̰e tɔgɨ woy kobi bɨ.

² Ban ƴom dan̰ kɨmana gɨ teeyige dɨrago̰ gɨ na kumbulo gɨ jɨne bɨ, na Haban̰ bɨ, na Sidan bɨ le, saɗii dugo dan̰ mɔrɨyɔŋ gɨ ni ɨlge dubu.

³ Ɗaŋ coŋ, ban ƴomii dibii duroy umboŋ gɨ ɗɨgi mɨrɨg gɨ kagadi unɔ gɨŋ, lɨgɨn̰ kɨbi daa bɨ sɨlɨn̰ɨn̰ kɨrɛɗ kɨrɛɗ daa bɨ, ɗe kɨmana le na andaŋ nare cɨn̰ te wɔɔ gɨ da kalaŋ ɗaŋ coŋ naŋ, bɨrɨŋ gɨsɨn̰ gɨ ɨlge gɨ dubu na kagan̰. Kardi nee na, naa wa wa kalɨn̰ ma kan kɨya pɨndɨrii ɗoyi daa na gɨ ni tɨwa lam wo̰ ƴɔbɨ.

⁴ Kardi nee, ɨŋ sol kali-tɨrɨmbalan̰əŋ. Kalaŋ ga somge cay nee le, kan bɨgege gɨyəŋ gɨ kan na bɨyan̰ kɔl. Ɨni na, ɨŋ sol turnoy kalaŋ ga sɨdɨrdege cayge coŋ dan̰ tuguyu kol tɨmon̰ di kan lee kɨya cay Jesu bɨ, kol bɛrnɛ di da kɔl gɨ da Kumu bɨ. Kalaŋ ga nee le na kalaŋ ga n̰ɨrge kɨmana le naŋ bɨ, turnoyi naŋ bɨ, tɨnda hɨnga wɨya a jɨndɨge naŋ bɨ, kobɨge naŋ bɨ. Kan jɨgage som-bɨra bɨ, diige cay ƴaa pɨna dan̰ Kɨris ɓal ɨlge dubu-pɨna.

⁵ Te kalaŋ ga ɗaŋ ga mage le, bɨya lɨbɨ naŋ bɨrɨŋ, gɨsɨn̰ gɨ ɨlge gɨ dubu-pɨna le kagan̰. Gɨ nee le na, bɔyɛ lɨbe gɨ cay wase.

⁶ Tumoy wolwa kɨya wɔyɛ kol cay ungo gɨ na bɨya lɨbɨ a bɔyɛ lɨbe gɨ cay wase gɨŋ le, ban kɨya wɔyɛ na ungo gɨ woy dan̰ cɨndi bɨn̰ Kumu. Tɨma di cay sɔɔ kɨya dɔɔ-ƴaa a cay kalaŋ ga hɨn̰ wo̰ le naŋ. Ama kan kɨya bɨle wɔyɛ na ka-bɔgɛ kɨbar ga da Kumu bɨ, ga da Kɨris bɨ, kan kɨya dɔɔge ƴaa pɨna dan̰ Kɨris ɓale ɨlge dubu-pɨna bɨ.

Bon̰ge kɨmbɨl Sidan

⁷ Kɨɗɨn̰ ga ɨlge gɨ dubu-pɨna le na pɨdɨ coŋ ɨni na, kan kɨya pɨndɨrege Sidan a dangay tɔɔ dɨŋ ɗɔɔ daa.

⁸ Te wɔɔ gɨ da kalaŋ ga somge a cay gɨsəŋ gaŋ ga teege dan̰ kɨradi Gɔg bɨ Magɔg bɨ le, hɨndi kɨya andaŋ ɔrɛ lɔɔ gɨ ɗe kan na kayaŋge. Hɨndi kɨya daye cayge amɨn̰ wɔlɛ gɨ ni kɨmbɨl bɨ, asɨgarn̰əŋ le kondɨwadɨge ɓalɨn̰ na hɨn̰ kɨlay gɨ a kɨbɨ kuray gɨ gumu taa taa gɨŋ wo̰ bɨ.

⁹ Kan ƴeege kɨɗɨn̰ a cay gɨsəŋ gaŋ nɔm bɨ. Nɨwɨrege kardi cay ƴaa da kalaŋ ga woyge dan̰ cɨndɨge gɨ na cay ƴaa-di-gumu di Kumu geyoo le cɨɗɨg daa bɨ. Ama tɨwa di pɨna wo̰ sayga gɨɗɨgɨ-Kumu gɨŋ baa cayge ulge muɗɔg muɗɔg coŋ.

¹⁰ Haban̰ di lee gɨ kan kayaŋge le, ƴɔmɔɔge dubooge duroy kuraydi tɨwa da kɨrbaŋdi hɨnga ga ƴee hɨn̰ tɨwa wo̰ dɨŋ. Na kɨɗɨn̰ ga nee le ma, tumɔ dɨbɨge kɨmana bɨ, ba-yɔɔ-kɔl-gɨ-Kumu-ba-yɔɔ gɨ cɨndi naŋ bɨ nee le. Hɨnga ga ni mɨrɨn̰tɨn̰i kɨya looge duroy son̰do dan̰ tɨwa di ɨni, ɨlge dan̰ ɨlge.

Bɔyɛ kɔl gɨ ni kagadi

¹¹ Kardi nee, ɨŋ sol kali-tɨrɨmbala di gumu di bɛrɛ bɨ, ungo gɨ ba sɔmɛ cay nee bɨ. Cay gɨsəŋ bɨ gɨɗɨgɨ-Kumu bɨ gɨrege muɗɔg tumoyi coŋ bɨ, ungo waa cay tɨbayge naŋ.

¹² Ɨni na, ɨŋ sol kalaŋ nɔm ga mage ga kalɨn̰ bɨ, ga gɨmdəŋ bɨ, boyge lɨbɨ bɨ ɨrege dan̰ tɨbayge daa tumoy kali-tɨrɨmbala dɨŋ. Hangɨge duroy magtubun̰əŋ ga walge gɨye-lɔɔ gɨ da kalaŋ nee. Kumu boy kɔl cayge pɨna pɨna na dan̰ gɨyəŋ gɨ da hɨnga ga kan lee kɨɗɨn̰ ga kan ban̰ dan̰ cɨndɨge ƴee. Ɨni na, hangɨge magtubu di ɗaŋ di na magtubu sɔmɛ-bɨra.

¹³ Ho’o, kalaŋ nɔm ga mage bɨ, ga woyge duroy dɔɔ-ƴaa da tɨma dɨŋ bɨ, dan̰ kalaŋ ga mage duroy kuray gɨ gumu taa taa gɨŋ le boyge lɨbɨ ɨrege tumoy Kumu ɗe gɨ ban na boy kɔl cayge dan̰ gɨyəŋ gɨ da gɨye-lɔɔdɨge.

¹⁴ Ɨni na, ƴomge tɨma bɨ, dɔɔ-ƴaa da tɨma bɨ, beegege duroy kuraydi tɨwa dɨŋ. Kuraydi tɨwa le na tɨma di cay sɔɔ le.

¹⁵ Waŋ waŋ gɨ gusondi na unɔ a boy magtubu sɔmɛ-bɨra gɨŋ le, kan kɨya ƴomii dibii duroy kuraydi tɨwa dɨŋ coŋ.