Wasɨn̰a 2 - Gabri Maja

Magtubu di walge bɨn̰ Ka-Daye ga Epɛs

¹ Ungo gɨ ɨŋ ba solii le, ye ɗaŋ coŋ ye hɨn̰: «Wala magtubu gɨyɨn̰ bɨn̰ ba-ƴɔbɛ gɨ daa nii gɨ ba sɔlɛ kardi Ka-Daye ga a cay ƴaa-di-gumu di Epɛs dɨŋ. «Ban gɨ ba ƴɔmɛ dɛsɨɗɛŋ ga jurgum a kobi gɨ bara gɨŋ bɨ, gɨ ba gɔrɛ duroy lamban̰əŋ ga jurgum ga leege dan̰ nare gɨ ni lɔr le, ye hɨn̰:

² Ɨŋ sol hɨnga nɔm ga kɨŋ lee bɨ, ɨŋ sol leen̰ cɨndi gɨ kɨŋ gɨlal toy nee bɨ, kɨŋ ƴom kuduroygɨŋ osu bɨ. Ɨŋ sol kuɗa hɨn̰ gɨ kɨŋ kɨya ɓale bugoŋ a te ka-kuduroy-ɨndɨwa naŋ bɨ. Kɨŋ gɨwasɨ ka-lɔɔ poy ga yege gɨ ke naa ka-gɨre-gɨye bɨ, kɨŋ solge gɨ kan na ka-poy bɨ.

³ Ɨŋ sol gɨ gɨle-cɨn̰ andaŋ caygɨŋ kol gusoŋnɨ bɨ, kɨŋ ƴom kuduroygɨŋ osu duroy nee bɨ, ɨŋ sol gɨ kɨŋ gabaŋ naŋ bɨ.

⁴ «Ama hɨnga ga ɨŋ gey danagɨŋ cay nee naŋ na, na ɗɔɔ gɨ kɨŋ ɗe geye kogɨŋ gɨ cay wase coŋ.

⁵ Haw kɛ na, sɨlagɨŋ leen̰ cɨndi gɨ kɨŋ cangɨ daa ɗe gɨyəŋ hen̰ coŋ. Bɨlgɨŋ haldɨgɨŋ bɨ, jɨgegɨŋ a cay tɨbaygɨŋ di cay wase dɨŋ. Hɨn̰ gɨ kɨŋ na bɨl haldɨgɨŋ naŋ na, ɨŋ kɨya ɔrɛ dɔrɛ lamba togɨŋ cɔd coŋ a kɨɗɨn̰ ga kɨŋ soo nee gaŋ.

⁶ Ama hɨnga ga ɨŋ sol kuɗa a gusɨgɨŋ na, na kan̰e gɨ kɨŋ kan̰ gɨye-lɔɔ gɨ da Nigolayidn̰əŋ, hɨn̰ gɨ ɨŋ-bandi kalɨn̰ ma ɨŋ ba kan̰ɨn̰ gɨye-lɔɔdɨge ga nee le coŋ wo̰ bɨ.

⁷ «Waŋ waŋ gɨ sɨmayi na wɨya nee na, kuɗa gɨ ban dɨra sɨmayi jan̰ kɔl gɨ Turnɔ di da Kumu ba yen̰ Ka-Daye le. «Ungo gɨ na bɨya kɨmbɨl na, ɨŋ kɨya bii wɔɔdi hɨya gɨ ungo na da na kɨya sɔmɛ-bɨra. Hɨya gɨ nee le woy na a Paradɨs di da Kumu dɨŋ.»

Magtubu di walge bɨn̰ Ka-Daye ga Simirnɨ

⁸ Ungo gɨ ɨŋ ba solii le, ye ɗaŋ coŋ hɨn̰: «Wala magtubu gɨyɨn̰ bɨn̰ ba-ƴɔbɛ gɨ daa nii gɨ ba sɔlɛ kardi Ka-Daye ga a cay ƴaa-di-gumu di Simirnɨ dɨŋ. «Ban gɨ cay wase cɨg cɨg dan̰ ban gɨ karu gɛs gɛs bɨ, ban gɨ ma pa dɨm ma jɨga som-bɨra bɨ le, ye hɨn̰:

⁹ Ɨŋ sol hɨnga ga ni dɔsɛ-ɗugɔ ga leegɨŋ bɨ, ɨŋ sol gɨ kɨŋ ɨran̰ dan̰ kandi-wɔɔ naŋ bɨ. Ama naa hɨn̰ wo̰ kalɨn̰ ma kɨŋ na ka-kandi-wɔɔ. Ɨŋ sol kɔl gɨ ni yagɨde gɨ kan ga yege gɨ ke naa Jubɨn̰əŋ yedege kol caygɨŋ le. Kan olge Kumu duroy ƴaa-daye-di-da-Jubɨn̰əŋ hage, ama leen̰ cɨndi na, kan na ƴaa-daye di da Sidan.

¹⁰ Kɨŋ kɨya wɔɔ cɨn̰-gɨle-cɨn̰, ama ɗɔɔ gɨ kɨŋ hundɔrɔ naŋ. Haban̰ kɨya bɔgɛ kalaŋ ga pɨna duroygɨŋ dangay dɨŋ kɨya gɨwasɨn̰ togɨygɨŋ. Kɨŋ kɨya wɔɔ cɨn̰-gɨle-cɨn̰ ɓale wɔlɛ mɔjɨ. Ɨrgɨŋ a cay tɨbayi dɨŋ bɨrɨŋ maran̰gɨŋ ɨni na, ɨŋ kɨya bɨgɨŋ jagɨwa ga ni somɨn̰-bɨra.

¹¹ «Waŋ waŋ gɨ sɨmayi na wɨya nee na, kuɗa gɨ ban dɨra sɨmayi jan̰ kɔl gɨ Turnɔ di da Kumu yen̰ Ka-Daye le. «Ungo gɨ na bɨya kɨmbɨl na tɨma di cay sɔɔ kɨya tɔgɛ gusondi naŋ bɨrɨŋ ɨni.»

Magtubu di walge bɨn̰ Ka-Daye ga Pɛrgam

¹² Ungo gɨ ɨŋ ba soli le, jogɨ yɔ ɗaŋ hɨn̰: «Wala magtubu gɨyɨn̰ bɨn̰ ba-ƴɔbɛ gɨ daa nii gɨ ba sɔlɛ kardi Ka-Daye ga a cay ƴaa-di-gumu di Pɛrgam. «Ban gɨ orɨn̰ dan̰ pəlɨm di haɗɨge gasɨndo sɔɗɨmɔŋ le, ye hɨn̰:

¹³ Ɨŋ sol kɨɗɨn̰ ga kɨŋ ba somɨn̰ nee le, na kɨɗɨn̰ ga kali-tɨrɨmbala da Sidan woy a nee. Naa hɨn̰ wo̰ kalɨn̰ ma, bɨrɨŋ gɨsɨn̰ haw kɛ kɨŋ ƴom gusoŋnɨ osu nɨngan̰ aye kudurɔ kogɨŋ ɗa coŋ naŋ. Wɔlɛ gɨ dɨɗɨn̰ge Andipas a tagɨŋ kɨɗɨn̰ ga Sidan won̰ a nee kalɨn̰ ma, kɨŋ man̰a kɨbɨgɨŋ naŋ. Andipas le, na tɨmon̰ hɨnge gɨ ba ɨre a cay tɨbayi dɨŋ.

¹⁴ Ama hɨnga ga ɨŋ kan̰ɨn̰ kɔl kardɨgɨŋ dḛ na, na kɔl gɨ da kalaŋ ga pɨna wo̰ ga lun̰doŋge kardi hɨnga ga ni gɨle ga da Balam. Ban naa gosɨr kɨlma Balag ɗe na gɨybɨge te wɨn̰je gɨ da Ɨsɨrayɛl ɗe na dɨn̰ge kuyoŋ ga been̰ge kɨbar bɨn̰ kulan̰əŋ bɨ, ɗe na yoyɨn̰ge dan̰ gangɨ cayge bɨ.

¹⁵ Ɗaŋ nee coŋ, ka-lun̰doŋ kardi gɨle hɨnga ga da Nigolayidn̰əŋ woyge tagɨŋ nee coŋ.

¹⁶ Hɨn̰ wo̰ na, bɨlgɨŋ haldɨgɨŋ. Hɨn̰ gɨ kɨŋ na bɨl haldɨgɨŋ naŋ na, ɨŋ kɨya bugoŋ gusɨgɨŋ mɨnde gɨ ni wɔrɨn̰ɛ dan̰ kalaŋ ga nee le, dan̰ pəlɨm di andaŋ a kɨbɨnɨ.

¹⁷ «Waŋ waŋ gɨ sɨmayi na wɨya nee na, kuɗa gɨ ban dɨra sɨmayi jan̰ kɔl gɨ Turnɔ di da Kumu yen̰ Ka-Daye le. «Ungo gɨ na bɨya kɨmbɨl na, ɨŋ kɨya bii man gɨ na hɨnga ga ni dɔɔ ga woy a kɨɗɨn̰ wɔsɛdɨge gaŋ bɨ. Ɨŋ kɨya bii oru gɨ bɛrɛ gɨ walge gusoŋ gɨ hɨrɨwa nee bɨ. Na ungo gɨ ba-ƴɔɔ oru gɨ nee le ƴɔbɨ ba kɨya sɔlɛ gusoŋ le. Ama ungo gɨ ɗaŋ kɨya ɓale sɔlɛ naŋ.»

Magtubu di walge bɨn̰ Ka-Daye ga Tɨyatir

¹⁸ Ungo gɨ ɨŋ ba solii le, jogɨ yɔ ɗaŋ coŋ hɨn̰: «Wala magtubu gɨyɨn̰ bɨn̰ ba-ƴɔbɛ gɨ daa nii gɨ ba sɔlɛ kardi Ka-Daye ga a cay ƴaa-di-gumu di Tɨyatir. «Kurɨn̰-Kumu gɨ cɨndi ƴeede tɨwa hɨn̰ kɨlen̰ tɨwa wo̰ bɨ, gondii jɨran̰de hɨn̰ nare gɨ yɨle wo̰ bɨ le, ye hɨn̰:

¹⁹ Ɨŋ sol gɨye-lɔɔdɨgɨŋ bɨ, geye kogɨŋ bɨ, aye kudurɔ kogɨŋ bɨ, gɨye kogɨŋ gɨ kɨŋ lee bɨn̰ kalaŋ bɨ, haye-kudurɔ kogɨŋ bɨ. Ɨŋ sol gɨ gɨye-lɔɔdɨgɨŋ gɨ karu kɛ kuɗa ɗɨn̰ gɨye-lɔɔdɨgɨŋ gɨ cay wase bɨ.

²⁰ Ama hɨnga ga ɨŋ kan̰ kardɨgɨŋ nee na, na ɗɔɔ gɨ kɨŋ ɗe gɨyəŋ bɨn̰ tama di hɨn̰ Jijabɛl wo̰ duroygɨŋ. Hɨndi na tama di ye gɨ to naa tama di ɗe-yɔɔ-kɔl-gɨ-Kumu-ba-yɔɔ. Ama hɨndi na ɗe bɔgɛ marɨne ka-lɔɔ gɨye kange kayaŋ kɨya wa hɨndi gɨlge yɔyɛ gɨ dan̰ gangɨ ca bɨ, dɔɔ kuyoŋ ga been̰ge kɨbar bɨn̰ kulan̰əŋ bɨ.

²¹ Ɨŋ ɗe tɨwa boo ɗe na bɨlɨn̰ haldo. Ama hɨndi gey bɨle haldo ojɨn̰ cay yɔyɛ gɨ dan̰ gangɨ ca le naŋ.

²² Sɨlagɨŋ, ɨŋ kɨya nayoo dugo bɨ, hɨndi kɨya lɔɔ hɔmɨn̰ɛ won̰ a cay gasɨlaŋdo gaŋ bɨ. Kalaŋ nɔm ga ba yoyge yɔyɛ gɨ dan̰ gangɨ ca danaa le, hɨn̰ gɨ kan na bɨl haldɨge naŋ bɨ, ɗa kardi gɨye-lɔɔdo naŋ bɨ na, ɨŋ kɨya laydɨge dugo duroy hɨnga ga ni dɔsɛ-ɗugɔ ga dɨmbɨri gaŋ.

²³ Ɨŋ kɨya ɗɔɔ tɨma dɨɗe karɨndo. Na hɨn̰ wo̰ ma, Ka-Daye nɔm kɨya sɔlɛge gɨ ɨŋ naa ba kɔbɛ te ɨrɨme bɨ, tabɨlaŋdi hɨnga ga woy a kuduroy kalaŋ bɨ, kɨya sɔlɛge gɨ ɨŋ na bɨn̰ ungo gɨ ani ani naa hɨnga ga ojɨ cayi ɓalɨn̰ dan̰ gɨye-lɔɔdi.

²⁴ «Ama kɨŋ te kalaŋ ga Tɨyatir ga kɨŋ ƴa hɨnga ga ni gɨle ga nee le naŋ bɨ, kɨŋ mala gɨ ni kɔbɛ te hɨnga-sɔlɛ ga kan teegege ɗugoy hɨnga ga da Sidan naŋ bɨ le, aŋ yəgɨŋ daa waŋ, ɨŋ kɨya ɗɔɔ hɨnga ga nin̰i ɗaŋ caygɨŋ naŋ.

²⁵ Ama hɨnga ga kɨŋ ba orɨn̰ le, ƴɨmagɨŋ usa bɨrɨŋ gɨsɨn̰ gɨ ɨŋ kɨya cagan̰.

²⁶ «Ungo gɨ na bɨya-kɨmbɨl bɨ lun̰doŋ kardi gɨye hɨnge bɨrɨŋ andan̰ a kagadi wɔlɛ gɨŋ bɨ na, ɨŋ kɨya bɨn̰ ungo gɨ nee le, dɔnɔ di ni dɨn̰ cay te wɔɔ gɨ da kalaŋ.

²⁷ Ban kɨya dɔrɛ tumoyge dan̰ jor gɨ ni nare bɨ, kɨya dosɨdɨge hɨn̰ gɨ kan ba dosɨdɨn̰ge ɨmbɨlɨn̰ wo̰ bɨ.

²⁸ Ho’o ban kɨya wɔɔ dɔnɔ hɨn̰ dɔnɔ di ɨŋ ba way a gusi Banɨ wo̰ bɨ. Ɗaŋ coŋ ɨŋ kɨya bii turɨmbɔlɔ.

²⁹ «Waŋ waŋ gɨ sɨmayi na wɨya nee na, kuɗa gɨ ban dɨra sɨmayi jan̰ kɔl gɨ Turnɔ di da Kumu ba yen̰ Ka-Daye le.»