Wasɨn̰a 18 - Gabri Maja

Babilɔn cay ƴaa-di-gumu baa

¹ Kardi nee na, ɨŋ sol ba-ƴɔbɛ gɨ daa nii gɨ ɗaŋ sayga gɨɗɨgɨ-Kumu gɨŋ gɨsɨngɨ dugo. Togii kondɨ bɨ asɨn̰adi lee gɨ kɨɗɨn̰ asɨn̰ a cay gɨsəŋ gaŋ bɨ.

² Ban wɨlal dan̰ te tumoyi di daa pəŋ ye hɨn̰: «Babilɔn cay ƴaa-di-gumu le ba ɨni, ba ɨni! Lee gɨ hɨndi bɨle na kɨɗɨn̰ sɔmɛ, Ga da turnɔ ga ɨsɨndəŋ bɨ, Kɨɗɨn̰ wɔsɛ ga da turnɔ ga lee kɨni nɔm bɨ, Ga da cɨɗəŋ ga lee kɨni nɔm bɨ, Ga da kɨmana ga lee kɨni nɔm, Ga kuɗage naŋ cɨn̰ kalaŋ bɨ.

³ Ho’o, hɨnga ga nee le lee gusɨge, Kɨya gɨ te wɔɔ gɨ da kalaŋ nɔm Siige cɛrɛ di suru gɨ hɨndi bɨge, Cɛrɛ di suru le gɨl na tabɨlaŋ, Da yɔyɛ kɔɔ gɨ dan̰ gɨyəŋdi naŋ. Kɛrɨmbɛlɛŋ ga cay gɨsəŋ gaŋ, Yoyge yɔyɛ gɨ dan̰ gangɨ cayge danaa bɨ, Ka-lɔɔ gɨyaw ga cay gɨsəŋ gaŋ, Leege gɨyaw danaa, Ɗe age na wan̰ kandi-wɔɔ tɔgɨ, Kol kandi-wɔɔ kaa ga kondi tɔgɨ bɨ.»

⁴ Ɨni na, ɨŋ je te tumoy ungo gɨ ɗaŋ gɨɗɨgɨ-Kumu gɨŋ ye hɨn̰: «Kɨŋ-gandi te kalaŋ kange, Andaŋgɨŋ duroy cay ƴaa-di-gumu di nee le coŋ, Naŋ na kɨŋ da lɔɔ ɨsɨnan̰əŋ ga hɨndi ba lee bɨ, Hɨnga ga ɨsɨni ga ka-mɔndɛ kɨɗɨn̰, Ga sige ojɨ caa le da loogɨŋ bɨ.

⁵ Ho’o, ɨsɨnan̰əŋ kaa nay cay kamdɨge gaŋ, Bɨrɨŋ andaŋ gɨɗɨgɨ-Kumu gɨŋ, Lee gɨ Kumu hɨn a cay gɨye-lɔɔdo, Gɨ dan̰ durɔ ɗɨngar naŋ.

⁶ Hɨnga ga hɨndi leen̰ kamdo le, Kɨŋ jɨgan̰ boo bandi nee bɨ, Hɨnga ga hɨndi lee le, Kɨŋ jɨgan̰ boo ban̰di nee tɨba sɔɔ bɨ. Kobo gɨ hɨndi polɨn̰ cɛrɛ di suru kɔɔ nee bɨn̰ kalaŋ le, Kɨŋ pɨlɨn̰a nee tɨba sɔɔ jɨgan̰ boo ban̰di nee bɨ.

⁷ Laagɨŋ hɨnga ga ni mɨrɨn̰tɨn̰i bɨ, Laagɨŋ ɗe hɨndi som duroy n̰age tɨma dɨŋ bɨ, Ɗe ɓalɨn̰ dan̰ gɨle gɨ hɨndi gɨl guso bɨ, Ɗe ɓalɨn̰ dan̰ se gɨ hɨndi si kandi-wɔɔ kaa, Ga kuɗudaŋ kɨbɨ gusɨge gaŋ doŋ bɨ. Kɨya wa hɨndi ye kudurɔ hɨn̰: “Ɨŋ som cay kali tɨrɨmbali dɨŋ bɨ, Kuduronɨ mara naŋ bɨ, Ɨŋ sɨma duroy n̰age tɨma dɨŋ naŋ bɨrɨŋ bɨ.”

⁸ Na toy di hɨn̰ wo̰ ma, Hɨnga ga ɨsɨni ga ka-mɔndɛ kɨɗɨn̰ ga ɗege ojɨn̰ caa le, Kɨya andaŋ a caa wɔlɛ pɨna ƴɔbɨ. Kan na tɨma bɨ, ɨle tɨma bɨ, Badɨra bɨ, tɨwa kɨya uloo bɨ. Ho’o, Ba-gulɔŋ Kumu gɨ boy kɔl a caa le togii kondɨ.»

⁹ Ɨni na, kɛrɨmbɛlɛŋ ga cay gɨsəŋ gaŋ ga won̰ge danaa kɨɗɨn̰ ajɨba dɨŋ bɨ, ɗege gusɨge a kobɨ kandi-wɔɔ kage ga kondi gaŋ bɨ le, kɨya sɔlɛge gusadi tɨwa di a caa na, kan kɨya ɨle bɨ, kɨya tɔgɛge kuduroyge rab rab kɨya caa bɨ.

¹⁰ Hundɔrɔ kɨya bɔɔ toyge kɨya cay mɨrɨn̰tɨn̰i di andaŋ a caa bɨ, kan kɨya dɔrɛ toyge sɛdɨ danaa yɔɔge hɨn̰: «Cɨn̰-n̰age, cɨn̰-n̰age! Me-hɨndi Babilɔn, cay ƴaa-di-gumu di dɔnɔdo kondɨ le, Boyge kɔl cɛɛ na duroy tɨwa pɨna ƴɔbɨ.»

¹¹ Ɨni na, ka-lɔɔ gɨyaw ga cay gɨsəŋ gaŋ ɨlege bɨ, somge duroy n̰age dɨŋ bɨ kol caa bɨ. Kɨya wa ungo pɨna kalɨn̰ ma kɨl hɨnga ga ni gɨyaw kage naŋ.

¹² Hɨnga ga ni loon̰ gɨyaw le na lɔr bɨ, nare gɨ ni arja̰ bɨ, garman̰əŋ ga kɨledɨge osɨdoŋ bɨ, mon̰n̰əŋ bɨ, badɨge ga jɨran̰de bɨ, badɨge ga yɨle pen̰ bɨ, kɨbɨ badɨge ga kɨledɨge osu tɔgɨ bɨ, sɨya ga gasɨmdɨge ɗo̰ kuɗa bɨ, hɨnga ga leege dan̰ gasɨn̰ junu bɨ, hɨnga ga leege dan̰ sɨya ga kɨledɨge osɨdoŋ bɨ, nare ga yɨle bɨ, nare bɨ, garma ga lee marɨna bɨ.

¹³ Hɨnga kage ga ni gɨyaw ga ɗaŋ ga ni urbu di sɨya gɨ ɗo̰ kuɗa gɨ teeyige kanɛl bɨ, hɨnga ga ni bɔgɛ kɨlɨn̰ gaŋ ga ɗo̰ kuɗa bɨ, ɨdɨr bɨ, ɨleledi mir bɨ, kɨrbaŋdi hɨnga ga ɗo̰ tɨna bɨ, cɛrɛ di suru bɨ, sɔŋ bɨ, kɨndɨre bɨ, cɨn̰ gɛmɛ bɨ, sɨn̰əŋ bɨ, gamge bɨ, hɨndɛrɛŋ bɨ, pusu ga ni kɨmbɨln̰əŋ bɨ, gɔyɔŋ bɨ, dangayn̰əŋ bɨ.

¹⁴ Ɨni na, ka-lɔɔ gɨyaw kɨya yɔɔge hɨn̰: «Wɔɔdi hayaŋ ga tabɨlaŋdɨge leene tɔgɨ le, Gɨrege hen̰ gusee coŋ bɨ, Hɨnga ga kuɗudaŋ tɔgɨ bɨ, Ga jɨran̰de tɔgɨ bɨ le, Bugoŋge kayaŋ hen̰ gusee coŋ bɨ, Kalaŋ kɨya jɨga wɔɔge karu naŋ bɨrɨŋ.»

¹⁵ Ka-lɔɔ gɨyaw ga wayge hɨnga kol caa le, hundɔrɔ kɨya bɔɔ toyge kɨya cay mɨrɨn̰tɨn̰i di andaŋ a caa le dorɨn̰ge toyge sɛdɨ coŋ danaa. Kan kɨya ɨle bɨ, kɨya sɔmɛ duroy n̰age dɨŋ bɨ,

¹⁶ yɔɔge hɨn̰: «Cɨn̰-n̰age, cɨn̰-n̰age! Kɨya wa cay ƴaa-di-gumu di tumɔ, Dobɨ badɨge ga kɨledɨge osu tɔgɨ bɨ, Ga yɨle pen̰ bɨ, jɨran̰de bɨ, Lɔr woy gusoo bɨ, Garma ga kɨledɨge osɨdoŋ, Woy gusoo bɨ, mon̰n̰əŋ woy gusoo bɨ le,

¹⁷ A duroy tɨwa pɨna ƴɔbɨ, Hɨnga wɔɔdo ga nee le mundoŋ coŋ.» Ka-aye kɨbɨ koburo gɨ gumu nɔm bɨ, ka-gɔrɛ cay kuray gɨ gumu taa taa gɨŋ nɔm bɨ, ka-lɔɔ gɨye duroy koburo gɨ gumu taa taa gɨŋ bɨ, ka-lɔɔ gɨyaw cay kuray gɨ gumu taa taa gɨŋ bɨ, dorge toyge sɛdɨ danaa.

¹⁸ Ɨni na, kɨɗɨn̰ ga kan solge gusa gɨ say a cay tɨwa di uloo na, wɨlalge yege hɨn̰: «Kɛ na cay ƴaa-di-gumu di ani ba wɔyɛ gɨlɨn̰a hɨn̰ cay ƴaa-di-gumu di kɛ le ga?»

¹⁹ Kan donge bundu bee cayge bɨ, kaydege gɔsɛ dan̰ ɨle bɨ, somge duroy n̰age dɨŋ bɨ, yege hɨn̰: «Cɨn̰-n̰age, cɨn̰-n̰age! Kɨya wa cay ƴaa-di-gumu, Di ka-gulɔŋ koburo ga gɨmdəŋ Ga cay kuray ga gɨmdəŋ nɔm, Wayige hɨnga kol caa le, Mundoŋ kurɔm kurɔm coŋ, Duroy tɨwa pɨna ƴɔbɨ.»

²⁰ Gɨɗɨgɨ-Kumu, laagɨŋ gusi-mɔwa kol mundoŋ gɨ hɨndi mundoŋ kurɔm kurɔm coŋ le! Kɨŋ kalaŋ ga woy dan̰ cɨndɨgɨŋ bɨ, ka-gɨre-gɨye bɨ, ka-yɔɔ-kɔl-gɨ-Kumu-ba-yɔɔ bɨ kalɨn̰ ma, laagɨŋ gusi-mɔwa bɨ. Kɨya wa Kumu boy kɔl caa na kol hɨnga ga ɨsɨni ga hɨndi lee danagɨŋ.

²¹ Ɨni na, ba-ƴɔbɛ gɨ daa nii gɨ pɨna gɨ ba dɔnɔ ay garma gɨ woy gɨlɨn̰ hɨn̰ garma gɨ ni hɨrɗɨn̰ gasa gɨ gumu wo̰ dɨbɨ ɗurɔm a duroy kuray gɨ gumu taa taa gɨŋ yen̰ hɨn̰: «Kɨya ayege Babilɔn di na cay ƴaa-di-gumu le, Dubooge pɨrɨŋ coŋ gɨlɨn̰a na hɨn̰ wo̰ le kɔ bɨ. Kɨya jɨgage wayooge ɗaŋ naŋ bɨrɨŋ.

²² Ungo kɨya jɔɔ noy ka-dɔgɛ jange bɨ, Ka-kɨbe kɨra bɨ, ka-lɨme tɛgɛ bɨ, Ka-lɨme burun̰ji bɨ a tɛɛ naŋ bɨrɨŋ. Ungo kɨya wɔɔ ba habɨle hɨnga wo̰, Ga toyge kan̰dɨge kan̰dɨge a tɛɛ naŋ bɨ, Kɨya jɔɔ noy garma gɨ ni hɨrɗɨn̰ hɨnga a tɛɛ naŋ bɨ.

²³ Ungo kɨya sɔlɛ asɨn̰a di lamba a tɛɛ naŋ bɨrɨŋ bɨ, Ungo kɨya jɔɔ noy ka-gɔrɛ ƴaa ga hɨrɨwa a tɛɛ naŋ bɨrɨŋ bɨ. Kɨya wa ka-lɔɔ gɨyaw kɛɛ na kalaŋ, Ga gɨmdəŋ ga a cay gɨsəŋ gaŋ kɛ bɨ. Dan̰ gɨyəŋ gɨ da lɔɔ tɨmba tɛɛ le, Me kay te wɔɔ gɨ da kalaŋ nɔm coŋ.»

²⁴ Ka-yɔɔ-kɔl-gɨ-Kumu-ba-yɔɔ bɨ, kalaŋ ga woyge dan̰ cɨndɨge bɨ, kalaŋ nɔm ga a cay gɨsəŋ gaŋ ga kan wadɨlde tumoyge bɨ le, kɨbardɨge gɨre dugo na a cay ƴaa di Babilɔn.