Wasɨn̰a 16 - Gabri Maja

Kobon̰əŋ ga jurgum

¹ Kardi nee na, ɨŋ je noy ungo ye dan̰ togii sayga a duroy ƴaa-di-da-Kumu dɨŋ, yen̰ ka-ƴɔbɛ ga daa nii ga jurgum le hɨn̰: «Ɨragɨŋ ɓɨge kobo kuduroy hɔmɛ di da Kumu ga jurgum le a cay gɨsəŋ gaŋ.»

² Ba-ƴɔbɛ gɨ daa nii gɨ cay wase le, or ɓɨge kobo koyi a cay gɨsəŋ gaŋ. Kɨɗɨn̰di ga nee gaŋ le, ɨya-ba̰ra̰ di lee hundɔrɔ bɨ, wɨdɨlde kɨɗɨn̰ tɔgɨ bɨ, baa a cay kalaŋ ga tɨnda di da kɨmana woy gusɨge bɨ n̰ɨrege turnoyi bɨ.

³ Ba-ƴɔbɛ gɨ daa nii gɨ cay sɔɔdɨge ɓɨgɨ kobo koyi a cay kuray gɨ gumu taa taa gɨŋ, lee gɨ kaŋ bɨle woy hɨn̰ kɨbardi ungo gɨ ma wo̰. Kɨɗɨn̰di ga nee gaŋ le, hɨnga nɔm ga orɨn̰ge dan̰ habe ga woyge a duroy kuray gɨ gumu taa taa gɨŋ mage.

⁴ Ba-ƴɔbɛ gɨ daa nii gɨ cay sɨbɨdɨge ɓɨgɨ kobo koyi a cay kurayn̰əŋ gaŋ bɨ a cɨn̰-kaŋ ga andaŋ gɨre gaŋ bɨ, lee gɨ kaŋ le bɨle kɨbar.

⁵ Ɨni na, ɨŋ je noy ba-ƴɔbɛ gɨ daa nii gɨ orɨn̰ dan̰ dɔnɔ a cay kaŋ gaŋ le ye hɨn̰: «Ay ji-bandi Kumu ba-wɔyɛ dan̰ cɨndɨn̰, ji som nee a boy wɔlɛ gɨ haw kɛ gɨŋ bɨ, a boy wɔlɛ gɨ tumɔ gɨŋ bɨ. Ji gɨl gɨ ji naa ba bɔyɛ kɔl gɨ dan̰ durɔ ɗɨngar bɨ.

⁶ Na cɨndi, kalaŋ ga nee le, beege kɨbar gɨ da kan ga dorgege sige dan̰ cɨndɨge bɨ, gɨ da ka-yɔɔ-kɔl-gɨ-Kumu-ba-yɔɔ kan̰ bɨ dugo. Na kɨbar mɨn̰ bɨge kan siige bɨ. Ɓalɨn̰ dan̰ baŋdi kɨbɨge koge gɨŋ hɨn̰ wo̰ le kɔ.»

⁷ Ɨŋ je noy ungo sayga a cay kɨɗɨn̰ ga kan gaɗɨge kɨya bogɨn̰ kɨbar nee gaŋ ye hɨn̰: «Ho’o, Ba-gulɔŋ Kumu gɨ dɔnɔdɨn̰ ɗɨn̰ dɔnɔ nɔm, bɔyɛ kɔl kon̰ na bɔyɛ kɔl gɨ dan̰ cɨndi bɨ gɨ dan̰ durɔ ɗɨngar bɨ.»

⁸ Ba-ƴɔbɛ gɨ daa nii gɨ cay poɗɨn̰dɨge ɓɨgɨ kobo koyi a cay tɨwa di daa dɨŋ, lee gɨ dɔnɔ di da tɨwa ɓɨgɨ man̰edo a cay kalaŋ ɗe ulge.

⁹ Ɨni na, ɨlwa da tɨwa di daa di lee hundɔrɔ le, ul kalaŋ. Lee gɨ kalaŋ ga nee le yagɨdege guson̰ Kumu, kɨya wa kan solge gɨ Kumu orɨn̰ dan̰ dɔnɔ a cay hɨnga ga ɨsɨni ga ani ani ga ka-mɔndɛ kɨɗɨn̰. Ama kan bɨlge haldɨge kɨya dɨbɨn̰ gusoŋ-tɔgɛ a cay Kumu naŋ.

¹⁰ Ba-ƴɔbɛ gɨ daa nii gɨ cay baydɨge ɓɨgɨ kobo koyi a cay kali-tɨrɨmbala di da kɨmana dɨŋ le. Na toy di hɨn̰ wo̰ ma dɔɔ-ƴaa toyi dobɨ ɨndi tɨlɨm. Hɨnga ga ni gɨle-cɨn̰ lee kalaŋ, lee gɨ loydege gasɨndɨge.

¹¹ Kan yagɨdege Kumu ba-sɔmɛ gɨɗɨgɨ-Kumu gɨŋ kol wɨdɨle koge bɨ, ɨya ba̰ra̰ toge bɨ. Ama kan bɨl gɨye-lɔɔdɨge gɨ ɨsɨni le naŋ.

¹² Ba-ƴɔbɛ gɨ daa nii gɨ cay jiidɨge ɓɨgɨ kobo koyi a cay kuray gɨ teeyige naa Epɨrat. Kɔl gɨ kɨbɨna kɛ bɨ, kaŋ le hayi ƴɛ̰ ƴɛ̰. Na hɨn̰ wo̰ ma, gɨyəŋ woy hangɨwa bɨn̰ kɨlma gɨ sayga a te kumu gɨŋ.

¹³ Kardi nee, ɨŋ sol turnɔn̰əŋ ga ɨsɨndəŋ ga gɨlɨn̰ge hɨn̰ gɨrna wo̰ won̰ge sɨbɨ andaŋge doŋ a kɨbɨ kɨmana gɨ teeyige dɨrago̰ le bɨ, a kɨbɨ kɨmana le bɨ, a kɨbɨ ba-yɔɔ-kɔl-gɨ-Kumu-ba-yɔɔ gɨ cɨndi naŋ le bɨ.

¹⁴ Kan na turnɔn̰əŋ ga ɨsɨndəŋ ga ka-lɔɔ hɨnga nɔm ga ɗɨn̰ cɨn̰-kɨɗɨn̰. Ɨni na, kan orge gusi kɛrɨmbɛlɛŋ ga a cay gɨsəŋ gaŋ nɔm, kɨya dayɨn̰ cayge amɨn̰ wɔlɛ gɨ ni kɨmbɨl gɨ gumu gɨ da Ba-gulɔŋ Kumu gɨ dɔnɔdi ɗɨn̰ dɔnɔ nɔm.

¹⁵ Ɨni na, Ba-gulɔŋ ye hɨn̰: «Sɨlagɨŋ, ɨŋ kɨya andaŋ caygɨŋ dus na hɨn̰ ba-hase wo̰. Tumoy wolwa woy na kɨya cay ungo gɨ som-bɨra bɨ, ƴom cay tɨbay badɨge kayi gam pḛḛ gusi. Na toy di hɨn̰ wo̰ ma, ban kɨya andaŋ toyi kalɨn̰ naŋ bɨ dasi kɨya doyi cɨn̰ kalaŋ naŋ bɨ.»

¹⁶ Turnɔn̰əŋ ga ɨsɨndəŋ le dayge cay kɛrɨmbɛlɛŋ ga nee le kɨɗɨn̰ pɨna. Kɨɗɨn̰ ga nee le gusondɨge dan̰ kɨbɨ əbɨro na Armagedo̰.

¹⁷ Ba-ƴɔbɛ gɨ daa nii gɨ cay jurgumdɨge ɓɨgɨ kobo koyi cɨn̰ kal gɨŋ. Ɨni na, noy ungo ye daa pəŋ a duroy ƴaa-di-da-Kumu dɨŋ bɨ, noy ungo le sayga na a cay kali-tɨrɨmbala dɨŋ ye hɨn̰: «Te kɔl ayaŋ ɨni.»

¹⁸ Kɨɗɨn̰di ga nee gaŋ le na, Kumu wɨlɨn̰de bɨ Kumu adɨlde toyi paraj paraj bɨ, noy kalaŋ ye bɨ, cay gɨsəŋ sayde den̰ den̰ lee hundɔrɔ bɨ. Ayɨn̰ toy gɨ Kumu ba sɨn̰ kalaŋ a cay gɨsəŋ gaŋ le, ungo sɨla cay gɨsəŋ ga yɨbagde hɨn̰ wo̰ naŋ ƴee.

¹⁹ Cay ƴaa-di-gumu le cudurdoŋ dugo kɨɗɨn̰ sɨbɨ bɨ, cay ƴaan̰əŋ ga gɨmdəŋ ga da te wɔɔ gɨ da kalaŋ ga cay gɨsəŋ gaŋ laydaŋ dugo nɔm bɨ. Kɨɗɨn̰di ga nee gaŋ le, Kumu hɨn a cay Babilɔn di na cay ƴaa-di-gumu le. Ban boo cɛrɛ di suru di a boy kobo gɨ da kuduroy-hɔmɛ koyi gɨ dɨmbɨre ɗe sii.

²⁰ Hɔgɨwan̰əŋ ga a duroy kuray gaŋ nɔm gɨdɨrdege ga̰ ga̰ coŋ bɨ, garman̰əŋ kaɗɨn̰ge coŋ bɨ.

²¹ Gɨna gɨ da kaŋdi Kumu ga nɨn̰dəŋ sayga gɨɗɨgɨ-Kumu gɨŋ laydaŋ a cay kalaŋ ga ɨndəŋ. Gɨna gɨ da kaŋdi Kumu le nɨn̰wadi ɓal kɨlo toyi-bay. Lee gɨ kalaŋ ga ɨndəŋ yagɨdege Kumu kol cay hɨnga ga ɨsɨni ga ka-mɔndɛ kɨɗɨn̰ gɨ na gɨna gɨ da kaŋdi Kumu, kɨya wa hɨnga ga ɨsɨni ga ka-mɔndɛ kɨɗɨn̰ ga nee le, lee hundɔrɔ ɗɨn̰ kamdɨge gɨɗaŋ nɔm.