Wasɨn̰a 15 - Gabri Maja

Hɨnga ga ɨsɨni ga ka-mɔndɛ kɨɗɨn̰ ga karu

¹ Kardi nee, ɨŋ sol hɨnga ga ni gɨle ga ɗaŋ gumu bɨ dor turnoy kɨɗɨn̰ bɨ, a gɨɗɨgɨ-Kumu gɨŋ. Ka-ƴɔbɛ ga daa nii jurgum ƴomge hɨnga ga ɨsɨni ga ka-mɔndɛ kɨɗɨn̰ jurgum kobɨge. Na hɨnga ga ɨsɨni ga ka-mɔndɛ kɨɗɨn̰ ga karu. Kɨya wa na dan̰ gɨyəŋ gɨ da hɨnga nɔm ga nee le ma, Kumu kɨya dɨɗɨn̰ kɨbɨ kuduroy-hɔmɛ toyi.

² Kardi nee, ɨŋ sol kɨɗɨn̰ ga woli ga gɨlɨn̰ hɨn̰ kuray gɨ gumu taa taa gɨ kaŋdi ɨre arɨn̰ yarara bɨrɨŋ gɨ te kaŋ kalɨn̰ ma ungo ɓal sɔlɛ, polɨn̰ dan̰ tɨwa. Ɨni na, a cay kuray gɨŋ le kalaŋ nɔm ga boyge kɨmbɨl a cay kɨmana bɨ, a cay turnoyi bɨ, a cay nombɨro gɨ gɨl gusondi bɨ le, ƴomdege jange ga da Kumu pɨna pɨna kobɨge.

³ Kan kɨbɨge kɨra hɨn̰ gɨ da Moyis, marɨna ba-gɨye gɨ da Kumu tumɔ ba kɨbɨn̰ wo̰. A duroy kɨra koge gɨŋ le, kan hɨramge Kumu kɨya gɨ na Kurɨn̰-dɨmangɨ le na ba poɗɨge yen̰ge hɨn̰: «Ji Ba-gulɔŋ gɨ dɔnɔdɨn̰ ɗɨn̰ dɔnɔ nɔm, Ji som a cay dɔnɔ nɔm, Gɨye-lɔɔdɨn̰ nɔm gɨmdəŋ tɔgɨ bɨ Dor turnoyi kɨɗɨn̰ bɨ. Ji dii-ƴaa a cay te kalaŋ nɔm, Ga a cay gɨsəŋ gaŋ bɨ, Ji lee hɨnga dan̰ cɨndi bɨ durɔ ɗɨngar bɨ.

⁴ Ay Ba-gulɔŋ, Kɛ na mɨna ma ungo gɨ hundɔrɔ gusondɨn̰ naŋ ga? Kɛ na mɨna ma ungo gɨ dɨbɨn̰ gusoŋ-tɔgɛ can̰ naŋ ga? Kɨya gɨ ji-bandi kan̰dɨn̰ han̰ ba wɔyɛ dan̰ cɨndɨn̰. Te kalaŋ nɔm kɨya ɨrgage bɔyɛ mɨregi tumon̰, Kɨya gɨ kan solge gɨye-lɔɔdɨn̰ nɔm Gɨ dan̰ durɔ ɗɨngar a duroy hɨnga ga ji lee.»

⁵ Kardi nee ɨni na, ɨŋ sol ƴaa-di-da-Kumu di a gɨɗɨgɨ-Kumu dɨŋ kɨbi hangaŋ. A duroy ƴaa di nee le, ɨŋ sol ƴaa-ɓala di da saɗe kɨbɨ pɨna ɓɨse gusu woy duroy nee.

⁶ Ka-ƴɔbɛ ga daa nii jurgum ƴomge hɨnga ga ɨsɨni ka-mɔndɛ kɨɗɨn̰ jurgum kobɨge. Kan saygage na duroy ƴaa-di-da-Kumu dɨŋ andɨgaŋge doŋ. Kan pɨna pɨna nɔm tobɨdege badɨge ga bɛdɨrdɛŋ tɨrɨjɨ tɨrɨjɨ bɨ jɨran̰de bɨ, saɗɨdege wɨrdɨge dan̰ sɔndurɔŋ gɨ ni lɔr bɨ.

⁷ Duroy kandi-se ga a gɨɗɨgɨ-Kumu gaŋ ga poɗɨn̰ le, pɨna duroyge bɨn̰ ka-ƴɔbɛ ga daa nii ga jurgum le kobo gɨ leege dan̰ lɔr won̰ jurgum. Kobo gɨ ni lɔr le walɨn̰ na dan̰ kuduroy hɔmɛ di da Kumu gɨ ba-sɔmɛ ɨlge dan̰ ɨlge.

⁸ Ɨni na, gusa gɨ gɨl dɔnɔ di da Kumu bɨ gusoŋ-tɔgɛ koyi bɨ ƴee duroy ƴaa da Kumu walɨn̰ cɨl daa. Lee gɨ ungo ɓala andaŋ a duroy ƴaa-di-da-Kumu dɨŋ naŋ bɨrɨŋ, gɨsɨn̰ gɨ hɨnga ga ɨsɨni ka-mɔndɛ kɨɗɨn̰ ga jurgum ga ka-ƴɔbɛ ga daa jurgum ƴomge kobɨge le, na ɨra kɨɗɨn̰dɨge gaŋ.