Wasɨn̰a 14 - Gabri Maja

Kɨra gɨ da kan ga boyge cayge

¹ Kardi nee ɨŋ sol kurɨn̰-dɨmangɨ ɨre a cay garma gɨ teeyige Sin̰o. Kalaŋ kayi dubu kɨɗɨn̰ aru-dan̰-toyge-poɗɨn̰-cayge-poɗɨn̰ danayi. Kan walge guson̰ kurɨn̰-dɨmangɨ bɨ, guson̰ bayi bɨ, a jɨndɨge.

² Ɨni na, ɨŋ je te tumɔ di sayga gɨɗɨgɨ-Kumu gɨŋ, te tumɔ le ye hɨn̰ noy kaŋdi kuray gɨ gumu taa taa gɨ ye dan̰ togɨyge wo̰ bɨ, hɨn̰ noy kumu gɨ al tɔgɨ wo̰ bɨ. Te tumɔ di ɨŋ ba je le kalɨn̰ ma, ye hɨn̰ noy jange ga ka-dɔgɛdɨge dege wo̰.

³ Kalaŋ ga ɨrege dan̰ kurɨn̰-dɨmangɨ le, kɨbɨge kɨra gɨ hɨrɨwa tumoy kali-tɨrɨmbala bɨ, tumoy kandi-se ga a gɨɗɨgɨ-Kumu gaŋ ga poɗɨn̰ bɨ tumoy ga muɗoldoŋ bɨ. Ungo pɨna wo̰ gɨ ba ɓale tɨrabe kɨra gɨ nee le unɔ, na kalaŋ ga dubu kɨɗɨn̰ aru dan̰ toyge poɗɨn̰ cayge poɗɨn̰ ga kurɨn̰-dɨmangɨ boy cayge duroy kalaŋ ga cay gɨsəŋ gaŋ ƴɔbɨ ba ɓalege.

⁴ Kan na kalaŋ ga dɨbage gusɨge duroy kɨni gɨŋ malan̰ge kandɨ naŋ, kɨya wa sɨlage kandɨ naŋ. Kan ga nee le na ka-kɔbɛ kurɨn̰-dɨmangɨ a kɨɗɨn̰ gaŋ nɔm ga ban orɨn̰ nee. Kan na kalaŋ ga ban boy cayge duroy kalaŋ ga ɨndəŋ bɨ, kan woy gɨlɨn̰ na hɨn̰ hɨnga ga cay wase ga walge duroy yage gɨŋ ɗege dan̰ cɨndɨge gɨ ni aye bɨn̰ Kumu bɨ, bɨn̰ kurɨn̰-dɨmangɨ bɨ.

⁵ Kɔl gɨ ni poy andaŋ kɨbɨge naŋ bɨrɨŋ bɨ, masadɨge unɔ bɨ.

Ka-ƴɔbɛ ga daa nii ga sɨbɨ

⁶ Kardi nee, ɨŋ sol ba-ƴɔbɛ gɨ daa nii gɨ ɗaŋ say dan̰ majɨbii or duroy gɨɗɨgɨ-Kumu gɨŋ bɔb. Ban orɨn̰ dan̰ Kɔl-gɨ-Ɗari gɨ woy dan̰ tumoyi kɨya tɔgɛ bɛrnɛdi bɨn̰ kalaŋ ga somge a cay gɨsəŋ gaŋ. Bɨn̰ na te kalaŋ nɔm bɨ, te wɨn̰je nɔm bɨ, kalaŋ ga a te kɨbɨ wɔɔ nɔm bɨ, labardi kalaŋ nɔm bɨ.

⁷ Ba-ƴɔbɛ gɨ daa gɨ nee le ye dan̰ te tumoyi di daa pəŋ ye hɨn̰: «Hɨndaragɨŋ Kumu bɨ, dɨbɨgɨŋ gusoŋ-tɔgɛ cayi bɨ, kɨya wa tɨwa toyi di ni bon̰ kɔl ɓal. N̰ɨrgɨŋ ba-lɔɔ gɨɗɨgɨ-Kumu bɨ, cay gɨsəŋ bɨ, kuray gɨ gumu taa taa bɨ, cɨn̰-kaŋ ga andaŋ gɨre bɨ.»

⁸ Ɨni na, ba-ƴɔbɛ gɨ daa nii gɨ ɗaŋ gɨ cay sɔɔdɨge kɨbɨga kardi ye hɨn̰: «Babilɔn cay ƴaa-di-gumu cay ƴaa-di-gumu le, baa ɨni, baa ɨni. Hɨndi bosɨn̰ te wɔɔ gɨ da kalaŋ nɔm cɛrɛ di suru gɨ da kuduroy-hɔmɛ. Cɛrɛ di suru le, na ajɨba tɔɔ.»

⁹ Ba-ƴɔbɛ gɨ daa nii gɨ ni sɨbɨdɨge kɨbɨga kardɨge yen̰ dan̰ te tumoyi di daa pəŋ hɨn̰: «Hɨn̰ gɨ ungo na n̰ɨr kɨmana le bɨ, turnoyi bɨ, lee gɨ tɨnda hɨnga na wɨya jɨndi naŋ le, a kobi bɨ na,

¹⁰ ba-gulondi kɨya sɔɔ cɛrɛ di suru kuduroy-hɔmɛ di da Kumu bɨ. Beege cɛrɛ di suru le boy kobo kuduroy-hɔmɛ di da Kumu dɨŋ dɨle pɔlɨn̰ɛ dan̰ hɨnga ga ɗaŋ nee. Lee gɨ hɨnga ga ni mɨrɨn̰tɨn̰i kɨya lɔɔ ba-gulondi duroy tɨwa dɨŋ bɨ, duroy kɨrbaŋdi hɨnga ga ƴee hɨn̰ tɨwa wo̰ bɨ, tumoy ka-ƴɔbɛ ga daa nii ga woyge dan̰ cɨndɨge bɨ, tumoy Kurɨn̰-dɨmangɨ bɨ.

¹¹ Gusadi tɨwa di ba leege mɨrɨn̰tɨn̰i andaŋ cul cul daa, ɨlge dan̰ ɨlge. Kalaŋ nɔm ga n̰ɨrege kɨmana le bɨ turnoy bɨ ga wayge tɨnda da guson̰ kɨmana gusɨge bɨ le, kɨya dɔrɛge gɨlale duroy son̰do dɨŋ naŋ bɨ, kɨɗɨn̰ ga woli gaŋ naŋ bɨ.»

¹² Kalaŋ ga woyge dan̰ cɨndɨge ga ka-ame te tumɔ di da Kumu bɨ, ka-aye kuduroyge bɨn̰ Jesu bɨ le, tɨwa di haw kɛ le, na tɨwa di kan kɨya ƴomɨn̰ kuduroyge osɨwa.

¹³ Ɨŋ je noy ungo andɨgaŋ gɨɗɨgɨ-Kumu gɨŋ ye hɨn̰: «Wala kɔl gɨ ba kɛ: “Tumoy wolwa woy haw kɛ a cay kalaŋ ga mage a te gɨyəŋ gɨ da Ba-gulɔŋ gɨŋ, ayɨn̰ toy haw kɛ bɨrɨŋ andɨn̰ tumɔ.” Turnɔ di da Kumu dɨbii cay nee ye hɨn̰: “Ho’o, kan kɨya dɔrɛ gɨlale kɨbɨ gɨye koge gɨŋ ɨni bɨ hɨnga ga ni cay kobɨge kobɨ kardɨge bɨ.”»

Wɔlɛ wale cay gasa ga da cay gɨsəŋ

¹⁴ Kardi nee ɨŋ sol gɨrɨmbale ga bɛrɛ bɨ, ɨŋ sol ungo gɨlɨn̰ hɨn̰ kurɨn̰ ungo wo̰ som a cay nee. Ban dobɨ jagɨwa-tɨrɨmbala ga leege dan̰ lɔr a cayi bɨ ƴom marɨm gɨ ƴee a kobi bɨ.

¹⁵ Kardi nee ba-ƴɔbɛ gɨ daa nii gɨ ɗaŋ de kɨɗɨn̰ andaŋ doŋ a duroy ƴaa-di-da-Kumu dɨŋ. Ban wɨlal dan̰ te tumoyi di daa pəŋ yen̰ ban gɨ som a cay gɨrɨmbale gaŋ le hɨn̰: «Aya marɨm kon̰ walan̰ gasa bɨ, dɨnan̰ bɨ. Kɨya wa gasa ga a cay gɨsəŋ gaŋ naa ɨni bɨ, tɨwadɨge ɓal ɨni bɨ.»

¹⁶ Ɨni na, ban gɨ som a cay gɨrɨmbale gaŋ le, ay marɨm koyi walɨn̰ gasa ga a cay gɨsəŋ gaŋ.

¹⁷ Ɗaŋ coŋ, ba-ƴɔbɛ gɨ daa nii gɨ ɗaŋ andɨgaŋ a duroy ƴaa-di-da-Kumu di a gɨɗɨgɨ-Kumu gɨŋ. Ban kalɨn̰ ma ƴom dan̰ marɨm gɨ ƴee a kobi bɨ.

¹⁸ Ɨni na, ba-ƴɔbɛ gɨ daa nii gɨ ɗaŋ sayga a kɨɗɨn̰ ga kan gaɗɨge kɨya bogɨn̰ kɨbar nee gaŋ. Ban orɨn̰ dan̰ dɔnɔ a cay tɨwa. Ban wɨlal dan̰ tumoyi di daa pəŋ yen̰ mɨgayi gɨ ƴom marɨm gɨ ƴee kobi le ye hɨn̰: «Aya marɨm kon̰ gɨ ƴee walan̰ wɔɔdi suru di a cay gɨsəŋ gaŋ kɨya gɨ wɔɔdi suru le naa ɨni.»

¹⁹ Ba-ƴɔbɛ gɨ daa nii le ay marɨm koyi le walɨn̰ wɔɔdi suru di a cay gɨsəŋ gaŋ bee a boy umboŋ gɨ wongɨsɨn̰ge wɔɔdi suru nee. Na kɨɗɨn̰ ga ni kuduroy-hɔmɛ ga da Kumu.

²⁰ Wɔɔdi suru le kan ɗodɨrdege na a kardi cay ƴaa-di-gumu dɨŋ doŋ, bɨrɨŋ gɨsɨn̰ gɨ kaŋdo ga yɨle andaŋ. Kaŋdo le na kɨbar gɨ gɨre hɨn̰ kuray wo̰, sɨngɨɗɨ ɓal hɨn̰ kɨlomɛdɨr aru sɨbɨ wo̰ bɨ hɔgɨwayge hogɨ bɨrɨŋ ɨsɨbɨ kɨbɨ hɨnda.