Wasɨn̰a 12 - Gabri Maja

Tama bɨ kɨmana gɨ teeyige dɨrago̰ bɨ

¹ Kardi nee na, hɨnga ga ɗɨn̰ cɨn̰-kɨɗɨn̰ ga gumu ga pɨna wo̰ andɨgaŋ a gɨɗɨgɨ-Kumu gɨŋ: Na tama di pɨna wo̰ di dobɨ tɨwa di daa guso hɨn̰ badɨge wo̰ bɨ, kɨdɨrɛ woy a te tɨbaa dɨŋ dugo bɨ, jagɨwa-tɨrɨmbala di caa na dɛsɨɗɛŋn̰əŋ mɔjɨ-cayge-sɔɔ bɨ.

² Tama di nee le ƴee kur. Wɔɔ san̰ dana guloo-cɨn̰ lee gɨ hɨndi ɨle guso tɔgɨ.

³ Ɨni na, hɨnga ga ni gɨle ga pɨna wo̰ ga ɗaŋ andɨgaŋ a gɨɗɨgɨ-Kumu gɨŋ: Na kɨmana gɨ pɨna wo̰ gɨ gumu gɨ teeyige dɨrago̰, yɨle pen̰ hɨn̰ tɨwa wo̰. Ban orɨn̰ dan̰ cayi won̰ jurgum bɨ kɨben̰di won̰ mɔjɨ bɨ. Cayi ga jurgum le, orɨn̰ dan̰ jagɨwa-tɨrɨmbala ga dḛ dḛ nee pɨna pɨna.

⁴ Hɨn̰ gɨ kan na gusɨnage dɛsɨɗɛŋ ga gɨɗɨgɨ-Kumu gaŋ kɨɗɨn̰ sɨbɨ na, cɨɗɨn̰ kɨmana le sar kɨbɨge ga pɨna beege a cay gɨsəŋ gaŋ. Kɨmana le ɨrga som kɨbɨ tama di gey wɔɔ le, ɗe kɨɗɨn̰ ga hɨndi na wɔɔ ƴɔbɨ na ay na soyin̰ kɨye le.

⁵ Tama le wɔɔ kɨye gɨ bara. Kɨye gɨ nee le, naa wa wa kalɨn̰ ma kɨya dɔrɛ tumoy te wɔɔ gɨ da kalaŋ nɔm dan̰ dɔnɔ di hɨn̰ nare wo̰. Ama kɨmana le daa kɨye le naŋ kɨya wa kɨyoo le boɗiige orɨn̰ge danayi gusi Kumu bɨ, kɨway kali-tɨrɨmbala toyi dɨŋ bɨ.

⁶ Ɨni na, tama le gɨre or a duroy dal dɨŋ a kɨɗɨn̰ ga Kumu ƴom cay tɨbayge nee kol caa. A kɨɗɨn̰ ga nee gaŋ le, kan kɨya amooge dan̰ hɨnga ga ni dɔɔ ɓale wɔlɛ dubu-pɨna dan̰ aru sɔɔ dan̰ toy jii.

⁷ Ɨni na, wɔrɨn̰ɛ baa a gɨɗɨgɨ-Kumu gɨŋ. Migayɛl dan̰ ka-ƴɔbɛ kayi worɨn̰ge dan̰ kɨmana gɨ teeyige dɨrago̰ le. Dɨrago̰ le kalɨn̰ ma say dan̰ ka-ƴɔbɛ kayi worɨn̰ɨn̰ danage bɨ.

⁸ Ama dɔnɔ di da dɨrago̰ le ɓala gɨ ni bon̰-kɨmbɨl naŋ. Lee gɨ waage kɨɗɨn̰ sɔmɛdɨge a gɨɗɨgɨ-Kumu gɨŋ naŋ.

⁹ Kɨmana gɨ gumu gɨ teeyige dɨrago̰ le nongɨliige dibiige dugo. Ban na kumbulo gɨ som jɨne hayi gɨ teeyige Haban̰ bɨ Sidan bɨ, gɨ na ba nare kalaŋ nɔm ga a cay gɨsəŋ gaŋ bɨ. Nongɨliige dibiige a cay gɨsəŋ gaŋ dan̰ ka-ƴɔbɛ kayi nɔm.

¹⁰ Kardi nee na, ɨŋ je noy ungo ye dan̰ togii a gɨɗɨgɨ-Kumu gɨŋ hɨn̰: «Tɨwa di ni pɔɗɛ bugoŋ ɨni bɨ, Tɨwa di Kumu kɨya gɨlɨn̰ dɔnɔ bugoŋ ɨni bɨ, Tɨwa da dɔɔ-ƴaa toyi bugoŋ ɨni bɨ. Na tɨwa di dɔnɔ woy na kobɨ Kɨris. Na hɨn̰ wo̰ ma, ungo gɨ ba dɨbe kɔl A cay karmiinagɨŋ, Ga ban̰aŋ dan̰ ga kandɨ le Nongɨliige a gɨɗɨgɨ-Kumu gɨŋ, Dɨbiige dugo coŋ. Ban gɨ ba dɨbe kɔl a cayge, Duroy son̰do dan̰ tɨwa di ɨni, Tumoy Kumu konagɨŋ le.

¹¹ Ama karmiinagɨŋ, Ga ban̰aŋ dan̰ ga kandɨ le, Boyge kɨmbɨl na dan̰ gɨyəŋ, Gɨ da kɨbardi kurɨn̰-dɨmangɨ bɨ Na dan̰ gɨyəŋ gɨ da kɔl, Gɨ kan leen̰ge tɨmon̰ bɨ. Kan geyge Ba-gulondɨge tɔgɨ, Ɗɨn̰ kuyoŋdi-gusɨge Lee gɨ hɨndaran̰ge tɨma naŋ bɨrɨŋ.

¹² Na toy di hɨn̰ wo̰ ma, Gɨɗɨgɨ-Kumu ji laa gusi-mɔwa bɨ, Kɨŋ kalaŋ ga kɨŋ som boy nee, Kalɨn̰ ma kɨŋ laa gusi-mɔwa bɨ. Ama kɨŋ kalaŋ ga a cay gɨsəŋ gaŋ bɨ, Hɨnga nɔm ga duroy kuray, Gɨ gumu taa taa gɨŋ bɨ le, Cɨn̰-n̰age woy gamgɨŋ. Kɨya wa haban̰ gɨsɨn jɨn̰ gusɨgɨŋ. Kudurɔɔ hɔmɔɔ tɔgɨ, Kɨya gɨ hɨndi sol gɨ tɨwa tɔɔ ba lam wo̰ ƴɔbɨ.»

¹³ Kɨɗɨn̰ ga kɨmana gɨ teeyige dɨrago̰ le sol gɨ kan nongɨliige dɨbiige dugo ɨni na, ban codɨ kardi tama di wɔɔ kɨye gɨ bara le ay na ƴɔmɔɔ.

¹⁴ Ama kan bɨn̰ge tama le majuboo won̰ sɔɔ hɨn̰ majɨbii kɨde gɨ gumu ɗe na san̰ orɨn̰ a duroy dal dɨŋ, a kɨɗɨn̰ ga Kumu ƴom cay tɨbayge a nee kol caa. A kɨɗɨn̰ ga nee gaŋ le, kan kɨya abooge ɓale ɨlge sɨbɨ dan̰ kɨwayi.

¹⁵ Kɨɗɨn̰di ga nee gaŋ le, kumbulo le budol kaŋ a kardi tama le, hɨn̰ kaŋ ga ni kuray wo̰, ɗe kaŋdi kuray le na ƴɔmɔɔ.

¹⁶ Ama gɨsəŋ haŋgɨ kɨbɨge soyin̰ kuray gɨ andaŋ a kɨbɨ kɨmana gɨ ni dɨrago̰ kɨya ƴon̰ cay tama le.

¹⁷ A kɨɗɨn̰di ga nee gaŋ le, kɨmana gɨ ni dɨrago̰ le lee kuduroy-hɔmɛ gɨɗaŋ a cay tama le, lee gɨ say or wɔrɨn̰ɛ dan̰ te wɨn̰je kaa ga baage le. Kan na ka-game te tumɔ da Kumu bɨ, ka-game kɔl gɨ da Jesu bɨ.

¹⁸ Kardi nee kɨmana gɨ ni dɨrago̰ le, or ɨre a cay kɨlaydi kuray gɨ gumu taa taa gɨŋ.