Wasɨn̰a 11 - Gabri Maja

Tɨmon̰ ga sɔɔ

¹ Kardi nee na, bəŋge sɨya sɨngɨɗɨ hɨn̰ sɨya gɨ ni gɨsɨn̰ hɨnga wo̰ bɨ yəŋge hɨn̰: «Sa daa gɨsɨ ƴaa-di-da-Kumu bɨ, gɨsɨ kɨɗɨn̰ ga kan gaɗɨge kɨya bogɨn̰ kɨbar nee bɨ, ɗɨngɨsa kalaŋ ga n̰ɨrege Kumu boy ƴaa-di-da-Kumu dɨŋ bɨ.

² Ama duroy gulɔŋ gɨ doŋ le gɨse naŋ. Ji ɗa ɗe woy kɨya gɨ Kumu dɔbɔɔ a kobɨ kalaŋ ga toyge na Jubɨ naŋ. Kalaŋ ga toyge na Jubɨ naŋ kɨya ɗɔdɨrdɛge cay ƴaa-di-gumu di woy dan̰ cɨndo dan̰ tɨbayge ɓale kɨdɨrɛ toy-poɗɨn̰-cay-sɔɔ.

³ A duroy wɔlɛ gɨ nee le, ɨŋ kɨya bɨn̰ ka-lɔɔ tɨmon̰ kange ga sɔɔ dɔnɔ ɗe yege-kɔl-gɨ-Kumu-ba-yɔɔ ɓal wɔlɛ dubu-pɨna dan̰ wɔlɛ aru sɔɔ dan̰ toyi-jii. Kan tobɨge na badɨge ga ni n̰age gusɨge.»

⁴ Ka-lɔɔ tɨmon̰ ga sɔɔ na, na hɨyadi olibɨye ga sɔɔ bɨ lamban̰əŋ ga sɔɔ bɨ, ga ɨrege tumoy Kumu Ba-gulɔŋ a cay gɨsəŋ.

⁵ Hɨn̰ gɨ ungo na gey looge hɨnga ga ɨsɨni na, tɨwa andaŋ kɨbɨge ul ka-baadɨge muɗɔgɨ muɗɔgɨ. Waŋ waŋ gɨ na mala gɨ ni looge hɨnga ga ɨsɨni na, kɨya mare leen̰ cɨndi na hɨn̰ wo̰ le kɔ.

⁶ Tɨmon̰n̰əŋ ga nee le orɨn̰ge dan̰ dɔnɔ di ni lɨge cɨn̰ Kumu ɗe Kumu na ongɨn̰ naŋ kɨɗɨn̰ ga kan ɨre ye-kɔl gɨ Kumu ba yɔɔ. Kan orɨn̰ge dan̰ dɔnɔ di ni bɨle kaŋ leen̰ kɨbar bɨ, orɨn̰ge dan̰ dɔnɔ di ni dɨbe hɨnga ga ɨsɨni ga ka-mɔndɛ kɨɗɨn̰ ga toyge kan̰dɨge kan̰dɨge a cay gɨsəŋ gaŋ hɨn̰ gɨ kuduroyge gey wo̰ bɨ.

⁷ Ama kɨɗɨn̰ ga ka-lɔɔ tɨmon̰ ga sɔɔ le, na laage tɨmon̰ kage coŋ ɨni na, kɨmana gɨ sayga te umboŋ gɨ ɗɨgi mɨrɨg gɨ kagadi unɔ gɨŋ le, kɨya dɨbe kɨmbɨl danage bɨ, kɨya aye banga cayge bɨ, kɨya dɨɗɨge bɨ.

⁸ Gundɨge kɨya wɔyɛ a te gɨyəŋ gɨ woli gɨ da cay ƴaa-di-gumu di kan gagɨlɨn̰ge Ba-gulondɨge a cay sɨya-gɨ-dagɨli gɨŋ nee. Cay ƴaa-di-gumu di nee le, tooge dan̰ kɨradi na Sɔdɔm bɨ Ejɨpt bɨ.

⁹ Kalaŋ ga a te kɨbɨ wɔɔ gɨ toyi kan̰di kan̰di kɨya sɔge a duroy te labar nɔm bɨ, duroy te wɨn̰je nɔm bɨ, duroy te kalaŋ nɔm bɨ, ɨrgage sɔlɛ gundɨge ɓale wɔlɛ sɨbɨ dan̰ kɨway bɨ, kan kɨya narɨn̰ kalaŋ ɨmgɨge.

¹⁰ Kalaŋ ga cay gɨsəŋ gaŋ kɨya lɔɔge gusi-mɔwa kol cayge bɨ, lɔɔge kɨdɨrɛ togɨn̰ pɨre bɨ, gɨyɨn̰ge dan̰ hɨnga ga ni bee-kalɨn̰ bɨn̰ gusɨge bɨ, kɨya wa ka-yɔɔ-kɔl-gɨ-Kumu-ba-yɔɔ ga sɔɔ ga nee le, gɨlɨn̰ge kalaŋ ga a cay gɨsəŋ gaŋ, hɨnga ga ni mɨrɨn̰tɨn̰i gɨɗaŋ.

¹¹ Ama kardi wɔlɛ ga sɨbɨ dan̰ kɨway ga nee le na, habe gɨ ni somɨn̰-bɨra sayga gusi Kumu andaŋ gusɨge lee gɨ kan boyge lɨbɨ. Kɨɗɨn̰di ga nee gaŋ le, kalaŋ ga ɨre solge le, hundɔrɔ boyge dɨɗɨge.

¹² Ɨni na, ka-yɔɔ-kɔl-gɨ-Kumu-ba-yɔɔ ga sɔɔ le, jege noy ungo gɨ sayga gɨɗɨgɨ-Kumu gɨŋ ye hɨn̰: «Nagɨŋ daa gusɨnɨ kɛ!» Kɨɗɨn̰di ga nee gaŋ le bɨ, kan nayge a cɨn̰ ka-baadɨge orɨn̰ gɨɗɨgɨ-Kumu gɨŋ, duroy gɨrɨmbale gaŋ.

¹³ Tɨwadi di nee dɨŋ bɨ, cay gɨsəŋ ay te yɨbagde dan̰ togɨyge yɨbag yɨbag. Hɨn̰ gɨ kan na gusɨnage cay ƴaa-di-gumu kɨɗɨn̰ mɔjɨ na, kɨbɨge ga pɨna laydaŋ dugo lee gɨ kalaŋ dubu-jurgum mage duroy nee. Kalaŋ ga andaŋge kɨbɨ nee le, hundɔrɔ boyge dɨɗɨge, lee gɨ dɨbɨge gusoŋ-tɔgɛ a cay Kumu ba-sɔmɛ gɨɗɨgɨ-Kumu gɨŋ.

¹⁴ Hɨnga ga ni cɨn̰-n̰age ga cay sɔɔdɨge pɨde ɨni. Sɨlagɨŋ! Hɨnga ga ni cɨn̰-n̰age ga cay sɨbɨdɨge tɨlga mɨnde nee.

Burun̰ji di cay jurgum

¹⁵ Kardi nee ba-ƴɔbɛ gɨ daa nii gɨ cay jurgumdɨge lɨm burun̰ji. Ɨni na, noy kalaŋ ye daa pəŋ a gɨɗɨgɨ-Kumu gɨŋ ye hɨn̰: «Haw kɛ na, na Ba-gulondɨna dan̰ Kɨris ban gɨ Kumu dorii ba dɔɔge-ƴaa a cay gɨsəŋ gaŋ. Kan kɨya dɔɔge-ƴaa ɨlge dan̰ ɨlge.»

¹⁶ Ɨni na, ka-muɗɔlɛ ga toyge-sɔɔ-cayge poɗɨn̰ ga somge a cay kali-tɨrɨmbala dɨŋ tumoy Kumu le, bugoŋge dugo ɨmdɨn̰ge cɨndɨge dugo bɨ n̰ɨrɨn̰ge Kumu,

¹⁷ yen̰ge hɨn̰: «Ji Ba-gulɔŋ Kumu gɨ dɔnɔdɨn̰ ɗɨn̰ dɔnɔ nɔm, Ji som nee boy wɔlɛ gɨ haw kɛ gɨŋ bɨ, A boy wɔlɛ gɨ tumɔ gɨŋ bɨ. Ni leen̰ ho’o kɨya gɨ ji ay te dɔɔ-ƴaa Dan̰ dɔnɔ ton̰ di gumu tɔgɨ.

¹⁸ Te wɔɔ gɨ da kalaŋ leege kuduroy-hɔmɛ gɨɗaŋ, Ama na kuduroy-hɔmɛ ton̰ ba ɨrga lɔɔ hɨnga. Tɨwa di ni bon̰ kɔl a cay kalaŋ ga mage ɓal bɨ, Tɨwa dɨ ni bɨn̰ hɨnga ga ni cay kɔbɔ, Gɨ da marɨne ka-lɔɔ gɨye kan̰, Ga na ka-yɔɔ-kɔl-gɨ-Kumu-ba-yɔɔ kan̰ bɨ, Kalaŋ ga ɗaŋ ga woyge dan̰ cɨndɨge bɨ, Ga beege kɔl can̰ bɨ, Ayɨn̰ toy a cay kalaŋ ga kalɨn̰, Bɨrɨŋ andɨn̰ a cay ga gɨmdəŋ le ɓal bɨ. Tɨwa di ni mondɨn̰ ka-mɔndɛ cay gɨsəŋ ɓal bɨ.»

¹⁹ Kardi nee na, kɨbɨ-ƴaa gɨ da ƴaa-di-da-Kumu gɨ a gɨɗɨgɨ-Kumu gɨŋ hangaŋ, lee gɨ sandugu di ni saɗe kɨbɨ pɨna ɓɨse gusu woy doŋ. Kɨɗɨn̰di ga nee gaŋ le, Kumu wɨlɨn̰de bɨ, adɨlde bɨ, noy ungo ye bɨ, cay gɨsəŋ sayde den̰ den̰ bɨ, gɨna gɨ da kaŋdi Kumu kondɨ laydaŋ bɨ.