Wasɨn̰a 10 - Gabri Maja

Ba-ƴɔbɛ gɨ daa nii bɨ karɨn̰ magtubu bɨ

¹ Kardi nee na, ɨŋ sɨlga ba-ƴɔbɛ gɨ daa nii gɨ ɗaŋ gɨ ba-dɔnɔ sayga gɨɗɨgɨ-Kumu gɨŋ gɨsɨngɨ jɨn̰ dugo. Ban dobɨ gɨrɨmbale gusi hɨn̰ badɨge wo̰ bɨ, orɨn̰ dan̰ dɛmbɨlɛ a cayi bɨ, cɨndi woy gɨlɨn̰ hɨn̰ tɨwa di daa wo̰ bɨ, gondi woy gɨlɨn̰ hɨn̰ tɨwa di ɨre dan̰ sɨngɨɗɨwado tululu daa wo̰.

² Ban orɨn̰ dan̰ karɨn̰ magtubu di hangɨge duroyge a kobi bɨ, ban dɨbɨ tɨbayi di bara a cay kuray gɨ gumu taa taa gɨŋ bɨ, di masa a cay gɨsəŋ gaŋ bɨ.

³ Ban wɨlal dan̰ togii hɨn̰ gɨ naa gusugo na ba ɨle wo̰. Kɨɗɨn̰ ga ban wɨlal na, ale gɨ da Kumu ga jurgum adɨlde pan̰ pan̰.

⁴ Kɨɗɨn̰ ga ale gɨ da Kumu ga jurgum adɨlde hɨn̰ wo̰ ɨni na, ɨŋ gey wale kɔl koge le. Ama ɨŋ je noy ungo gɨ sayga gɨɗɨgɨ-Kumu gɨŋ ye hɨn̰: «Gama kɔl gɨ da ale ga da kumu ga jurgum le a kuduron̰, ji ɗɔɔ ba wale duroy magtubu dɨŋ.»

⁵ Ɨni na, ba-ƴɔbɛ gɨ daa nii gɨ tumɔ ɨŋ ba solii ɨre daa dan̰ tɨbayi a cay kuray gɨ gumu taa taa gɨŋ bɨ a cay gɨsəŋ gaŋ bɨ le, ay kobi gɨ bara jɨn̰ gɨɗɨgɨ-Kumu gɨŋ.

⁶ Bɨ ban ɓɨse gusi dan̰ guson̰ ban gɨ ba-sɔmɛ-bɨra ɨlge dan̰ ɨlge bɨ, dan̰ guson̰ ban gɨ ba ɗɔɔ gɨɗɨgɨ-Kumu dan̰ hɨnga nɔm ga a duroy nee bɨ, dan̰ guson̰ ba ɗɔɔ cay gɨsəŋ dan̰ hɨnga nɔm ga a duroy nee bɨ, dan̰ guson̰ ba ɗɔɔ kuray gɨ gumu taa taa dan̰ hɨnga nɔm ga a duroy nee bɨ. Ba-ƴɔbɛ gɨ daa nii le ye hɨn̰: «Tɨwa di ɗaŋ di ungo ɗe pɨde unɔ ɨni.

⁷ Ama wɔlɛ gɨ ba-ƴɔbɛ gɨ daa nii gɨ cay jurgumdɨge kɨya aye te lɨme burun̰ji na, Kumu kɨya dɨɗe kɨbɨ hɨnga ga kuduroyi ojɨ ga woy a kɨɗɨn̰ wɔsɛdɨge gaŋ, hɨn̰ gɨ tumɔ ban ba teen̰ bɛrnɛdi bɨn̰ marɨne ka-lɔɔ gɨye kayi ga na ka-yɔɔ-kɔl-gɨ-Kumu-ba-yɔɔ le!»

⁸ Ɨni na, ungo gɨ tumɔ ye kɔl danaŋ gɨ ɨŋ ba je te tumoyi a gɨɗɨgɨ-Kumu gɨŋ le, jɨga yəŋ ɗaŋ coŋ ye hɨn̰: «Ɨra, ƴɔɔ magtubu di hangɨge durɔɔ di woy a kobɨ ba-ƴɔbɛ gɨ daa nii gɨ ɨre daa a cay kuray gɨ gumu taa taa gɨŋ bɨ, a cay gɨsəŋ gaŋ bɨ.»

⁹ Ɨni na, ɨŋ or gusi ba-ƴɔbɛ gɨ daa nii le bɨ ɨŋ yeyi ban na bəŋ magtubu di dḛ le. Ban dɨbəŋ cay nee yəŋ hɨn̰: «Ƴa daa, kɨya ƴɔgɨwa a kɨbɨn̰ hɨn̰ sɔŋ di tumu wo̰ ama kɨya ɗan̰wa a budugudɨn̰ gɨŋ.»

¹⁰ Ɨni na, ɨŋ ƴee magtubu di dḛ le kobɨ ba-ƴɔbɛ gɨ daa nii dii. A kɨbɨnɨ na, mɔ hɨn̰ sɔŋ di tumu wo̰ ama kɨɗɨn̰ ga ɨŋ soy kuduronɨ na, bɨle ɗan̰ a budugunɨ gɨŋ.

¹¹ Ɨni na, kan jɨga yəŋ ɗaŋ coŋ hɨn̰: «Naa wa wa kalɨn̰ ma, ji jɨga ya-kɔl-gɨ-Kumu-ba-yɔɔ gɨ ojɨ cay hɨnga ga kɨya lɔɔ te wɔɔ gɨ da kalaŋ pɨna pɨna bɨ, labar gɨ da kalaŋ pɨna pɨna bɨ, kɨbɨ wɔɔ gɨ da kalaŋ pɨna pɨna bɨ, kɛrɨmbɛlɛŋ dan̰ kondiige bɨ le.»