Titɨ 3 - Gabri Maja

Gɨye-lɔɔ gɨ da ka-aye kudurɔ

¹ Ji hɨn kuduroyge a cay kɔl gɨ ojɨ cay dɔbɛ ca dugo tumoy ka-dɔrɛ tumoy kalaŋ bɨ, ka-dɔɔ cay ƴaa bɨ, cay kɔl gɨ ni jɔɔ bɨ, ɗe na ƴomɨn̰ge cay tɨbayge cay lɔɔ hɨnga ga ɗari pɨna pɨna nɔm bɨ.

² Ji hɨn kuduroyge gɨ kan naa yagɨde ungo naŋ bɨ, wɔrɨn̰dɨdɛ dan̰ kalaŋ naŋ bɨ, ɗe kan na bɨlɨn̰ge ka-kuduroy-ɗarwa bɨ, gɨlɨn̰ge gɨye-lɔɔdɨge gɨ dan̰ kaledɨge ga jal tumoy kalaŋ nɔm.

³ Na-gandi kalɨn̰ ma, tumɔ le na na kalaŋ ga dɨngaldaŋ bɨ, na na ka-mɨn̰e daa bɨ, kalaŋ ga kayaŋ bɨ. Na na gɔyɔŋ ga da tabɨlaŋdi hɨnga ga toyge kan̰dɨge kan̰dɨge bɨ, ga bɨn̰ ungo gusi-mɔwa bɨ. Na leede gɨŋ na kuduroy-ɨndɨwa bɨ, na somgɨŋ na kɨya lɔɔ kurɔŋdi hɨnga ga toyge kan̰dɨge kandɨge bɨ. Na leegɨŋ terɨn̰ tɔgɨ bɨ, na ƴomgɨŋ gusɨnagɨŋ dan̰ kuduroyna bɨ.

⁴ Ama kɨɗɨn̰ ga ɗarwa di da Kumu ba-poɗɨnagɨŋ bɨ, geye koyi gɨ ojɨn̰ cay kalaŋ bɨ gɨl gusi doŋ ɨni na,

⁵ ban pɔɗɨnagɨŋ na kɨya gɨye-lɔɔ gɨ dan̰ durɔ ɗɨngar gɨ na leegɨŋ naŋ. Ama na kɨya sɔlɛ gɨ ban sol cɨn̰-n̰age tɔnagɨŋ. Ban pɔɗɨnagɨŋ na dan̰ gɨyəŋ gɨ da pɨle gɨ da wɔɔ gɨ hɨrɨwa bɨ, na dan̰ gɨyəŋ gɨ da Turnɔ ɗe-kuduroy-bɛrɛ bɨ.

⁶ Ban gɨygɨn̰ dan̰ Turnɔ ɗe-kuduroy-bɛrɛ cayna, dan̰ tɔrɛ-kɨbɨ nɔm dan̰ gɨyəŋ gɨ da ba-poɗɨnagɨŋ Jesu-Kɨris.

⁷ Na hɨn̰ wo̰ ma, na bɨlegɨŋ kalaŋ ga dan̰ durɔ ɗɨngar dan̰ gɨyəŋ gɨ da ɗarwa toyi bɨ, na beegɨŋ ɨrɨmedɨnagɨŋ na cay Ba-gulondɨnagɨŋ gɨ na na kɨya wɔɔ hɨnga ga ni ban̰di-gulɔŋ gɨ na sɔmɛ-bɨra gɨ dan̰ tumoyi.

⁸ Kɔl gɨ nee le na kɔl gɨ cɨndi. Lee gɨ ɨŋ gey gɨ ji na ɨr cay nee gɨɗaŋ, ɗe kalaŋ ga ayge kuduroyge bɨn̰ Kumu le sɨn̰ge cɨndɨge kardi hɨnga ga ɗari gaŋ leen̰ge gɨye gɨ ɗari. Hɨnga ga nee le, na hɨnga ga ɗari bɨ, kɨya lɔɔ ɗarwa dan̰ kalaŋ nɔm bɨ.

⁹ Ama male te hɨnga ga kalɨn̰ wo̰ bɨ, dɔrɛ te wɨn̰je bɨ, man̰e-kɔl bɨ, gaŋgɨde kɔl cay gasɨn̰-kɔl gaŋ bɨ le, hɨnga ga nee le nɔm na hɨnga ga kɨya andaŋ hɨnga naŋ bɨ, na hɨnga ga kalɨn̰ wo̰ dugo bɨ. Ji ɗɔɔ ba dɨbe kɨbɨn̰ boy nee naŋ.

¹⁰ Ungo gɨ ani ani gɨ ba gɨlɨn̰ kalaŋ hɨnga ga toyge kan̰dɨge kan̰dɨge bɨ poyɨn̰ karmii le, ji sɨga sɨmayi tɨbaa pɨna, tɨbaa sɔɔdi bɨ, kardi nee na puyoŋ wandɨ danayi.

¹¹ Ungo gɨ gɨlɨn̰ hɨn̰ wo̰ le, kuɗa gɨ ji sɨla gɨ ban curoŋ na te gɨyəŋ gɨ dan̰ durɔ gɨŋ coŋ bɨ, na ungo gɨ ba-lɔɔ ɨsɨna bɨ, ban dan̰ gusi koyi boy kɔl a cay gusi gɨŋ gaŋ bɨ.

Hale gɨ ni dɨɗɨn̰ kɨbɨ kɔl

¹² Kɨɗɨn̰ ga ɨŋ na gɨy Artemas naŋ le, Tisig gusɨn̰ na, bɨya gusɨn̰ cɛd ɨre wayaŋ a cay ƴaa di Nigopolis dɨŋ. Kɨya wa ɨŋ ojɨ gɨ ni dɨɗe kɨbɨ kal na nee.

¹³ Bɨya gusɨn̰ cɛd kɨya bɨn̰ Jenas ba-gɨlɨn̰ kalaŋ gasɨn̰-kɔl bɨ, Apolos bɨ, hɨnga ga ni orɨn̰ tɨrga ɗe hɨnga pɨna wɨyge te gɨyəŋ gɨŋ naŋ.

¹⁴ Kuɗa gɨ kalaŋ kana siige cɨndɨge kardi hɨnga ga ɗari gaŋ leen̰ge gɨye gɨ ɗari jɨbɨn̰ge te kalaŋ ga orɨn̰ge dan̰ n̰agedi hɨnga leen̰ cɨndi. Hɨn̰ gɨ kan na laa hɨn̰ wo̰ na, kan kɨya wɔyɛ na kalaŋ ga bɨlege hɨnga.

¹⁵ Kalaŋ nɔm ga woyge danaŋ le, leen̰ge lapɨya. Laan̰gɨŋ ka-aye kudurɔ ga geynige le, lapɨya nɔm bɨ. Kuɗa gɨ ɗarwa di da Kumu baa danagɨŋ nɔm.