Titɨ 2 - Gabri Maja

Gɨye-lɔɔ gɨ da kalaŋ ga esɨdəŋ bɨ marɨne bɨ gɔyɔŋ bɨ

¹ Ama ji-bandi na, kon̰ na gɨlɨn̰ kalaŋ hɨnga ga bugoŋ pɨna dan̰ hɨnga gɨle ga kuɗa.

² Yan̰ ban̰aŋ ga əsɨdəŋ gɨ kan naa ka-ƴɔmɛ gusɨge kɨbɨ hɨnga gaŋ bɨ, kalaŋ ga ɓalge gɨ kalaŋ bɨgage kɔl cayge bɨ, ka-sɔlɛ hɨnga ga ɗari dɨm ma kɨya lɔɔge bɨ. Yage gɨ kan na ƴɨma usa a te aye kudurɔ gɨŋ bɨ, te geye bɨ, te dɨbe-ɗugɔ dɨŋ bɨ.

³ Yan̰ kandɨ ga esɨdəŋ kalɨn̰ ma, kuɗa gɨ gɨye-lɔɔdɨge na bugoŋ pɨna dan̰ gɨye-lɔɔ gɨ da kandɨ ga woyge dan̰ cɨndɨge bɨ. Kuɗa gɨ kan yɨle kɨɗɨn̰ naŋ bɨ, bɨləŋ gɔyɔŋ ga da cɛrɛ di suru naŋ bɨ. Ama ɗe gɨ kan gɨlɨn̰ kalaŋ hɨnga ga ɗari.

⁴ Kuɗa gɨ kan gɨlɨn̰ kambɨle gɨyəŋ gɨ ni geyɨn̰ kodɨn̰ige bɨ, karɨndɨge bɨ,

⁵ gɨyəŋ gɨ ni solɨn̰ hɨnga ga ɗari dɨm ma lɔɔ bɨ, ɗe gɨ kan wɨyage na kandɨ ga duroŋge mɨra bɨ, gɨyəŋ gɨ ni ɗɔɔ gusɨge kɨbɨ gɨye gɨ a duroy ƴaa toge dɨŋ bɨ, ɗe won̰ge kalaŋ ga kuɗudaŋ bɨ, dobɨn̰ge cayge bɨn̰ kodɨn̰ige bɨ. Ɗe ungo wan̰ gɨyəŋ gɨ ni yagɨdɨn̰ kɔl gɨ da Kumu naŋ.

⁶ Dɨban̰ bandɨ kuduroy marɨne a duroy hɨnga nɔm ɗe kan sol hɨnga ga ɗari dɨm ma leege ƴee.

⁷ Ji Titɨ, kalɨn̰ ma ji laa hɨnga ga ɗari ɗe kan ƴolɨn̰ge bɨ. Kuɗa gɨ hɨnga ga ni gɨle kan̰ wɨya na hɨnga ga ni gɨle ga duroŋ mɨra bɨ, ga koldɨge homɨn̰ bɨ.

⁸ Kuɗa gɨ kɔl yɔdɨn̰ wɨya na kɔl gɨ ɗari bɨ, kɔl gɨ ungo gɨ ɓale ƴɔɔ daa dɔgɛ coŋ naŋ bɨ, ɗe ka-baadɨn̰ dasi diige kol cay kɔl gɨ ɨsɨni gɨ kan kɨya wɔɔ gɨ ni yɔ kol cayna naŋ.

⁹ Dɨban̰ bandɨ kuduroy gɔyɔŋ gɨ kan dɨba cayge dugo bɨn̰ ka-gulondɨge ujan̰ cay hɨnga nɔm bɨ man̰e-kɔl danage naŋ bɨ. Na hɨn̰ wo̰ ma kan kɨya ƴɔɔ cɨn̰ ka-gulondɨge.

¹⁰ Ɗɔɔ ba gɨ kan hasege hɨnga wo̰ naŋ bɨ, ama ɗe gɨ dan̰ wɔlɛ pɨna pɨna kan gɨlɨn̰ge ka-gulondɨge gɨ ke na ɨre a cay tɨbayge dɨŋ kuɗa bɨ. Hɨn̰ gɨ gɔyɔŋ na laage hɨn̰ wo̰ na, kan kɨya dɨbe gusoŋ-tɔgɛ a cay hɨnga ga ni gɨle ga da Kumu Ba-pɔɗɨna gaŋ.

¹¹ Na cɨndi, Kumu gɨl ɗarwa toyi, di dan̰ gɨyəŋdo di ban ɓal poɗɨn̰ kalaŋ nɔm.

¹² Ɗarwa di nee le gɨlnagɨŋ gɨ na na ɗa gɨye-lɔɔ gɨ bugoŋ pɨna dan̰ Kumu naŋ coŋ bɨ, tabɨlaŋdi hɨnga ga cay gɨsəŋ gaŋ kɛ coŋ bɨ. Ɗarwa di nee le gɨlnagɨŋ ana na somɨn̰ a tɨwa di haw dɨŋ kɛ kɨya solɨn̰ hɨnga ga ɗari dɨm mana kɨya lɔɔ ƴee bɨ, loon̰ gɨye gɨ dan̰ durɔ ɗɨngar bɨ, loon̰ gɨye gɨ bugoŋ pɨna dan̰ Kumu bɨ.

¹³ Naa wa wa kalɨn̰ ma, ojɨ gɨ na gama tumoy wolwa di na ba bee ɨrɨmedɨna cay nee di nee le hɨn̰ wo̰. Wɔlɛ gɨ nee gɨŋ le, gusoŋ-tɔgɛ gɨ da Kumu konagɨŋ gɨ gumu bɨ gɨ ba-poɗɨnagɨŋ bɨ, gɨ na Jesu-Kɨris le kɨya gɨle gusi doŋ.

¹⁴ Ban ɗe gusi bɨn̰ kalaŋ ƴomiige dɨɗiige ƴen̰ ban̰dɨnagɨŋ, kɨya bon̰ cayna kol ɨsɨna gɨ na ba leegɨŋ bɨ, kɨya leen̰ ɗe gɨ na na wɨyan̰ te kalaŋ kayi ga duroŋge mɨra bɨ, gɨ na na wɨyan̰ te kalaŋ ga gusɨge-hɨmbalge te gɨye-lɔɔ gɨ ɗari gɨŋ bɨ.

¹⁵ Sɨla! Hɨnga ga ojɨ gɨ ji kɨya gɨlɨn̰ kalaŋ ba kɛ: Dɨbage bandɨ kuduroyge bɨ, ji orɨn̰ dan̰ dɔnɔ cayge gɨ ni ɗalge kɨya gɨye-lɔɔdɨge bɨ. Ɗɔɔ ungo pɨna wo̰ hagɨrɨn̰ naŋ bɨ.