Magtubu di Pol wal bɨn̰ kalaŋ ga Rɔm 9 - Gabri Maja

Kɔl gɨ ojɨ cay te wɨn̰je gɨ da Ɨsɨrayɛl

¹ Na kɔl gɨ cɨndi ma maŋ yəgɨŋ kɛ le. Ɨŋ na ungo gɨ ɨŋ bugoŋ pɨna dan̰ Kɨris bɨ, ɨŋ ya poy naŋ bɨ. Turnɔ ɗe-kuduroy-bɛrɛ kalɨn̰ ma lee tɨmon̰ a kuduronɨ gɨ naa cɨndi.

² Leen̰ cɨndi na, cɨnɨ kula gɨɗaŋ bɨ, ɗugonɨ mundoŋ daa daa bɨ.

³ Ho’o, ɨŋ orɨn̰ dan̰ n̰age gɨ Kumu na ɓɨsəŋ ɨŋ-bandi bɨ, pɨyaŋ ɨŋ-bandi gusɨnɨ dan̰ Kɨris bɨ, hɨn̰ gɨ dan̰ gɨyəŋ gɨ nee le na, karmɨnɨ ga a te wɨn̰je hɨnge gɨŋ na kɨya pɔɗɛge.

⁴ Kan na te wɨn̰je gɨ da Ɨsɨrayɛl. Na kan ma na te wɔɔ gɨ Kumu torge ɗe na bɨlege karɨn̰ Kumu bɨ, na kan ma ban gɨlge gusoŋ-tɔgɛ koyi bɨ, na kan ma ban saɗɨ kɨbi pɨna danage bɨ, na kan ma ban bɨge gasɨn̰-kɔl kayi bɨ, na kan ma ban gɨlge gɨyəŋ gɨ ni n̰ɨrii bɨ, na kan ma ban yege kɔl hɨnga ga ɗi na kɨya bɨge bɨ.

⁵ Na kan ɗaŋ coŋ ma na kongɨn̰i mon̰ina Abɨraham. Kɨɗɨn̰ ga Kɨris bɨləŋ ungo gɨ ɨndi le, kan wooyge na a te wɨn̰je koge kan gaŋ. Ban som a cay hɨnga nɔm bɨ, ban na Kumu gɨ kalaŋ nɔm kɨya hɨramiige dan̰ tumoyge bɨ. Ɗa-ɗe-woy-hɨn̰-wo̰!

⁶ Kɨŋ ɗɔɔ ba se a ɨrɨmedɨgɨŋ gɨŋ gɨ hɨnga ga Kumu ba ye gɨ ɗi na kɨya lɔɔ bɨn̰ Ɨsɨrayɛl le, na bɨle naa hɨnga ga kalɨn̰ wo̰ dugo. Kɨya wa leen̰ cɨndi na, kalaŋ ga a te wɨn̰je gɨ da Ɨsɨrayɛl nɔm ma na Ɨsɨrayɛl ga leen̰ cɨndi naŋ.

⁷ Na kan ga andaŋge a te mon̰ina Abɨraham nɔm ma na kongɨn̰ii ga leen̰ cɨndi naŋ, kɨya wa tumɔ Kumu ye hɨn̰: «Na dan̰ gɨyəŋ gɨ da Isag ƴɔbɨ ma man̰ kɨya wɔɔ kongɨn̰ɨn̰ ga kan kɨya togɨge dan̰ gusondɨn̰.»

⁸ An̰ toy a cay kɔl gɨ nee le na, kalaŋ nɔm ga saygage a kuduroy Abɨraham le, kan ɗɨngɨsage nɔm karɨn̰ Kumu naŋ. Na kalaŋ ga kan wɔɔge dan̰ gɨyəŋ gɨ da kɔl gɨ Kumu ye gɨ ɗi na kɨya bii ƴɔbɨ ma kan ɗoŋsɨgege leen̰ kongɨn̰ii.

⁹ Kɨya wa na hɨnga ga Kumu ye gɨ ɗi na kɨya bɨn̰ Abɨraham ye hɨn̰: «A boy ɨlge gɨ ba kɨya ɨrga dan̰ tɨwa di ba hɨn̰ kɛ, ɨŋ kɨya ɨrga bɨ, ɨŋ kɨya wɔɔ tamdɨn̰ Sara dan̰ kɨye bara a kɔbɔ.»

¹⁰ Na kagadi naŋ ƴee, ɨrɨmgɨŋ a cay Rebega bɨ. Hɨndi ƴee kur bɨ wɔɔ mɔgɨnɛ, karɨndo le bayige na pɨna hayi, na mon̰dɨna Isag.

¹¹ Ama tumɔ pa dɨm ma gɨ kan kɨya woon̰ mɔgɨnɛ bɨ, tumɔ pa dɨm ma gɨ kan kɨya lɔɔ hɨnga ga ɗari naŋ le ga ɨsɨni na, Kumu ojɨ gɨ ni dɔrɛ a duroyge ungo pɨna ɗe kuduroy geye gɨ da Kumu na dɨɗɨ kɨbi dan̰ gɨyəŋ gɨ da dɔrɛ gɨ da ungo le.

¹² Ban te kalaŋ na dan̰ gɨyəŋ gɨ da kuduroy-geye koyi bɨ, gɨyəŋ gɨ da hɨnga ga kan leege bɨ. Ɨni na, ban yen̰ Rebega ye hɨn̰: «Gɨ esi kɨya lɔɔ gɨye bɨn̰ gɨ dḛ.»

¹³ Magtubu di da Kumu kalɨn̰ ma ye coŋ gɨ Kumu na ye hɨn̰: «Ɨŋ gey Jagob, ama ɨŋ kan̰ Ejawi coŋ.»

¹⁴ Kɛ, na gɨ yɔ na wa a cay kɔl gɨ nee gɨŋ le ga? Kɛ na gɨ yɔ gɨ Kumu naa ba lɔɔ hɨnga ga dan̰ durɔ ɗɨngar naŋ ga? Cə, na hɨn̰ wo̰ naŋ bɨrɨŋ!

¹⁵ Kumu yen̰ Moyis ye hɨn̰: «Ungo gɨ ɨŋ na gey lɔɔ ɗarwa danayi na, Ɨŋ kɨya lɔɔ ɗarwa danayi bɨ, Ungo gɨ ɨŋ na gey sɔlɛ cɨn̰-n̰age toyi na, Ɨŋ kɨya sɔlɛ cɨn̰-n̰age toyi bɨ.»

¹⁶ Hɨn̰ wo̰ na, kɨɗɨn̰ ga Kumu dor ungo na, ban dorii na dɔrɛ ƴɔbɨ kɨya wa ban sol cɨn̰-n̰age toyi wala, na kol kuduroy-geye gɨ da ungo naŋ bɨ, na kol gɨye-lɔɔ gɨ da ungo naŋ bɨ.

¹⁷ Na toy di hɨn̰ wo̰ ma, walge a duroy Magtubu di da Kumu dɨŋ ojɨn̰ cay Parawo̰ kɨlma gɨ Ejɨpt ye hɨn̰: «Na ɨŋ-bandi ba dorɨn̰ kɨya gɨlɨn̰ kalaŋ nɔm dɔnɔ tɨnge bɨ, ɗe gusoŋnɨ na ye ƴen̰ cay kɨɗɨn̰ kɨɗɨn̰ a cay gɨsəŋ gaŋ bɨ.»

¹⁸ Lee gɨ dan̰ kɔl gɨ nee le na, na sol gɨ ungo gɨ Kumu gey sɔlɛ cɨn̰-n̰age toyi na, ban kɨya sɔlɛ cɨn̰-n̰age toyi bɨ, ungo gɨ Kumu gey lɔɔ gɨ kuduroyi na usa na, ban kɨya lɔɔ gɨ kuduroyi na usa bɨ.

Kumu lee kuduroy-ɗarwa hɨn̰ gɨ kuduroy gey wo̰

¹⁹ Kuɗa naŋ na, ji kɨya ɨngɨrəŋ yɔ hɨn̰: «Hɨn̰ gɨ Kumu na laa hɨn̰ wo̰ na, kɛ na kɨya wa ma ban kɨya ɗale kalaŋ ga pɨna kol gɨye-lɔɔdɨge ga? Kɛ, na waŋ ba kɨya ɓale nare kuduroy-geye gɨ da Kumu ga?»

²⁰ Hay! Ungo gɨ ɨndi, kɛɛ, ji na waŋ ma man̰ kɨya gaŋge kɔl kɨbɨ Kumu ga? Hɨn̰ gɨ ba dɔsɛ hɨnga na dusa hɨnga na, kɛ hɨnga ga ban dosu le, orɨn̰ dan̰ gɨyəŋ gɨ ni yoyi hɨn̰: «Kɛ, na kɨya wa ma man̰ dɔsɔŋ gɨlɨn̰ wo̰ ga?»

²¹ Kɛ, ba-gaɗe ɨmbɨlɨn̰ ɨran̰ dan̰ dɔnɔ a cay gun̰u naŋ ga? Dan̰ te gun̰u gɨ pɨna hayi gɨ nee le na, ban gaɗɨn̰ ɨmbɨlɨn̰ gɨ ni leen̰ gɨye gɨ woy dan̰ cɨndi bɨ, ɨmbɨlɨn̰ gɨ ni leen̰ gɨye gɨ dan̰ wɔlɛ pɨna pɨna bɨ.

²² Hɨn̰ gɨ Kumu na gey lɔɔ naa hɨn̰ gɨ da ba gaɗe ɨmbɨlɨn̰ wo̰ na, kɛ ji-bandi na dolɨn̰ na wa nee ga? Ban gey gɨ kalaŋ na sɨla kuduroy-hɔmɛ toyi bɨ, dɔnɔ toyi bɨ. Ama haw kɛ na, ban ƴom kuduroyi dɨbɨn̰ ɗugoyi gɨɗaŋ, a cay kan ga kuduroyi ba homii cayge ga gamge na mundoŋ le.

²³ Kumu gey gɨle kandi-wɔɔ ga da gusoŋ-tɔgɛ koyi gɨ lee hundɔrɔ a gusi kan ga ban sol cɨn̰-n̰age toge, ga ban ƴom cay tɨbayige na jɨne hayi ɗe kan na andɨn̰ge a boy gusoŋ-tɔgɛ koyi gɨŋ le.

²⁴ Kalaŋ ga Kumu sol cɨn̰-n̰age toge le, na na-gandi ga Kumu teena. Ban tɨgana na duroy Jubɨn̰əŋ ƴɔbɨ naŋ, ama na duroy kalaŋ ga toyge na Jubɨ naŋ bɨ.

²⁵ Na kɔl gɨ nee le ma, Kumu ye a duroy magtubu di da ba-yɔɔ-kɔl-gɨ-Kumu-ba-yɔɔ Oje dɨŋ ye hɨn̰: «Kan ga naa, na te kalaŋ kange naŋ le, Ɨŋ teege te kalaŋ kange bɨ, Kan ga naa, ɨŋ laa-toyige naŋ le, Ɨŋ teege ɨŋ lee-toyige bɨ.»

²⁶ «Ɨni na, a kɨɗɨn̰ ga kan yege nee ye hɨn̰: “Kɨŋ naa te kalaŋ kange naŋ le” Na kɨɗɨn̰ ga nee gaŋ le gaŋ ma, Kan kɨya togɨgɨŋ nee yon̰ hɨn̰: “Kɨŋ naa karɨn̰ Kumu gɨ som-bɨra.”»

²⁷ Gɨ ojɨ cay te wɨn̰je gɨ da Ɨsɨrayɛl na, ba-yɔɔ-kɔl-gɨ-Kumu-ba-yɔɔ Ijay naa ye ojɨn̰ cayge wɨlalɨn̰ ye hɨn̰: «Hɨn̰ gɨ te wɨn̰je gɨ da Ɨsɨrayɛl kondɨwayge, Na wɨya naa hɨn̰ kɨlay gɨ kɨbɨ kuray, Gɨ gumu taa taa gɨŋ wo̰ kalɨn̰ ma, Kan ga Kumu ba kɨya poɗɨge le, na kɨwayge ƴɔbɨ.

²⁸ Ba-gulɔŋ Kumu kɨya lɔɔ gɨ kɔl koyi, Na ɨra kɨɗɨn̰di gaŋ a cay gɨsəŋ gaŋ hɨrɛd bɨ haw wo̰ bɨ.»

²⁹ Na kɔl gɨ nee le ma naa Ijay ye na kɨya lɔɔ gusi yen̰ hɨn̰: «Hɨn̰ gɨ naa Ba-gulɔŋ gɨ na sarɨnay dɔnɔ nɔm, Na ɗa te mon̰ bɨna naŋ na, Na naa kɨya mundoŋ gɨŋ hɨn̰ kalaŋ ga Sɔdɔm wo̰ bɨ, Na naa kɨya mundoŋ gɨŋ gudɔn̰ gudɔn̰ coŋ, Hɨn̰ kalaŋ ga Gɔmɔr wo̰ bɨ.»

Ɨsɨrayɛl bɨ Kɔl-gɨ-Ɗari bɨ

³⁰ A cay kɔl gɨ nee gɨŋ le nɔm na, kɛ na wa ma mani kɨya yɔ coŋ ga? Kalaŋ ga toyge na Jubɨ naŋ ga naa malage gɨ ni bɨle kalaŋ ga dan̰ durɔ ɗɨngar naŋ le, bɨlege kalaŋ ga dan̰ durɔ ɗɨngar ɨni. Na dan̰ gɨyəŋ gɨ da aye kudurɔ ma kan bɨləŋge kalaŋ ga dan̰ durɔ ɗɨngar.

³¹ Te wɨn̰je gɨ da Ɨsɨrayɛl le codɨge te gasɨn̰-kɔl bɨ, malge dan̰ gɨyəŋdi age na bɨlɨn̰ kalaŋ ga dan̰ durɔ ɗɨngar bɨ, ama gabaŋge.

³² Kɛ, na kɨya wa ma kan gabaŋge ga? Kɨya wa kan kɨbage gɨyəŋ gɨ da aye kudurɔ naŋ. A ɨrɨmedɨge gɨŋ na, ke na kɨya bɨle kalaŋ ga dan̰ durɔ ɗɨngar naa dan̰ gɨyəŋ gɨ da gɨye-lɔɔdɨge. Lee gɨ kan de tɨbayige a cay oru gɨ ba kɨya dorge nayge gɨŋ,

³³ hɨn̰ gɨ Magtubu di da Kumu ba ye hɨn̰: «Sɨlagɨŋ ɨŋ kɨya ɗɔɔ oru a cay ƴaa di Sin̰o dɨŋ, Na oru gɨ kɨya dɔgɛ tɨban̰ ungo bɨ, Na garma gɨ kɨya lɔɔ gɨ ungo kɨya bɔɔ bɨ. Ama waŋ waŋ gɨ na bɨga kuduroyi, A cay oru gɨ nee gɨŋ le na, dasi kɨya dooy naŋ bɨrɨŋ.»