Magtubu di Pol wal bɨn̰ kalaŋ ga Rɔm 8 - Gabri Maja

Gɔrɛ gɨ dan̰ gɨyəŋ gɨ da Turnɔ di da Kumu

¹ Haw kɛ na, bɔyɛ kɔl tɨma pɨna wo̰ gɨ ba kɨya ƴɔmɛ cay kan ga bugoŋ pɨna dan̰ Jesu-Kɨris le, unɔ yɔd ɨni.

² Na cɨndi, dɔnɔ di da Turnɔ di da Kumu di ba bəŋ sɔmɛ-bɨra a te bugoŋ pɨna dan̰ Jesu-Kɨris le, dɔrɔŋ coŋ a te dɔnɔ di da ɨsɨna gɨŋ bɨ, tɨma dɨŋ bɨ.

³ Hɨnga ga nee le gasɨn̰-kɔl gɨ da Moyis ɓala lɔɔ naŋ bɨrɨŋ, kɨya wa gabaŋ gɨ da kuyoŋdi-gusu gɨ da ungo lee gɨ gasɨn̰-kɔl gɨ da Moyis togi say unɔ. Ama Kumu lee hɨnga ga gasɨn̰-kɔl gɨ da Moyis ɓala lɔɔ naŋ. Ban gɨygɨ dan̰ Kurondi koyi ɨrga a cay gɨsəŋ gaŋ, dan̰ kuyoŋdi-gusu gɨ woy gɨlɨn̰ dan̰ gɨ da kalaŋ ga ɨndəŋ ga ka-lɔɔ ɨsɨna wo̰, kɨya dorɨn̰ kalaŋ te ɨsɨna gɨŋ coŋ. Na dan̰ gɨyəŋ gɨ nee le ma, Kumu bon̰ kɔl a cay ɨsɨna gɨ lee gɨye a kuduroy kalaŋ ga ɨndəŋ.

⁴ Kumu lee hɨnga ga nee le, hɨn̰ wo̰ ɗe ana na ɓalɨn̰ leen̰ hɨnga ga gasɨn̰-kɔl ojɨ. Haw kɛ, na-gandi na gorgɨŋ na dan̰ gɨyəŋ gɨ da dɔnɔ di da Turnɔ di da Kumu wala, na dan̰ gɨyəŋ gɨ da dɔnɔ di da kuyoŋdi-gusu naŋ ɨni.

⁵ Na cɨndi, kalaŋ ga gorge dan̰ gɨyəŋ gɨ da dɔnɔ di da kuyoŋdi-gusu na, ɗege ɨrɨmedɨge na a cay hɨnga ga ojɨ cay kuyoŋdi-gusu. Ama kalaŋ ga gorge dan̰ gɨyəŋ gɨ da dɔnɔ di da Turnɔ di da Kumu na, ɗege ɨrɨmedɨge na a cay hɨnga ga ojɨ cay Turnɔ di da Kumu.

⁶ Ɗɔɔ ɨrɨme a cay hɨnga ga da kuyoŋdi-gusu le, kɨya wɔɔ na tɨma, ama ɗɔɔ ɨrɨme a cay hɨnga ga da Turnɔ di da Kumu le, kɨya wɔɔ na sɔmɛ-bɨra bɨ gusi-dɔbɛ bɨ.

⁷ Ɨrɨme gɨ da kuyoŋdi-gusu na ba-baa gɨ da Kumu, kɨya wa ɨrɨme gɨ da kuyoŋdi-gusu bɨga kɔl a cay gasɨn̰-kɔl gɨ da Kumu gɨŋ naŋ. Ɨrɨme gɨ da kuyoŋdi-gusu le ɓala bɔgɛ kɔl a cay gasɨn̰-kɔl gɨ da Kumu gɨŋ naŋ.

⁸ Kalaŋ ga ɨrɨme gɨ da kuyoŋdi-gusu dii-ƴaa cayge le, kɨya ɓalege ƴɔɔ cɨn̰ Kumu naŋ.

⁹ Ama kɨŋ-gandi na, kɨŋ gura na dan̰ gɨyəŋ gɨ da ɨrɨme gɨ da kuyoŋdi-gusɨgɨŋ naŋ. Kɨŋ gor na dan̰ gɨyəŋ gɨ da Turnɔ ɗe-kuduroy-bɛrɛ, kɨya wa Turnɔ di da Kumu som a kuduroygɨŋ. Hɨn̰ gɨ ungo na ɨran̰ dan̰ Turnɔ di da Kɨris naŋ na, ban na gɨ da Kɨris naŋ.

¹⁰ Ama hɨn̰ gɨ Kɨris na wɨya a ɗugoygɨŋ na, kuyoŋdi-gusɨgɨŋ na hɨnga ga da tɨma kɨya cay ɨsɨna, ama Turnɔ di da Kumu bɨgɨŋ sɔmɛ-bɨra kɨya wa kɨŋ na kalaŋ ga Kumu bɨlgɨŋ leen̰ kalaŋ ga dan̰ durɔ ɗɨngar.

¹¹ Turnoy Kumu di ba boy Jesu lɨbii duroy kalaŋ ga madɨrdaŋ le som a gusɨgɨŋ. Na toy di hɨn̰ wo̰, Kumu gɨ ba bɔyɛ Jesu-Kɨris lɨbii duroy kalaŋ ga madɨrdaŋ le kalɨn̰ ma, kɨya bɨn̰ kuyoŋdi-gusɨgɨŋ gɨ ba kɨya mare le sɔmɛ-bɨra, dan̰ gɨyəŋ gɨ da Turnoyi di ba som a gusɨgɨŋ.

¹² Na toy di hɨn̰ wo̰ ma, ay karmɨnɨ ga ban̰aŋ dan̰ ga kandɨ, ojɨ gɨ naa wa wa kalɨn̰ ma, na gura hɨn̰ gɨ Turnɔ ba gey wo̰, gɨ nee le woy na hɨn̰ tugɨla wo̰ a cayna. Ama na tugɨla di na orɨn̰ a gusi kuyoŋdi-gusu gɨŋ, kɨya kobɨn̰ ɨrɨme gɨ da kuyoŋdi-gusu naŋ.

¹³ Hɨn̰ gɨ kɨŋ na gura naa dan̰ ɨrɨme gɨ da kuyoŋdi-gusu na, kɨŋ kɨya mare. Ama hɨn̰ gɨ kɨŋ na gura naa dan̰ gɨyəŋ gɨ da dɔnɔ di da Turnɔ di da Kumu dɨɗɨn̰ ɨsɨna nɔm gɨ woy a kuyoŋdi-gusɨgɨŋ gɨŋ na, kɨŋ kɨya sɔmɛ-bɨra.

¹⁴ Kalaŋ nɔm ga Turnɔ di da Kumu ba dor tumoyge le, kan na karɨn̰ Kumu.

¹⁵ Kumu gɨsɨn Turnoyi caygɨŋ na kɨya loogɨŋ gɔyɔŋ ga ka-gɔrɛ dan̰ hundɔrɔ ɗaŋ coŋ naŋ ɨni. Ɨŋ’ɨ̰, Turnɔ di ban gɨsɨnoo caygɨŋ le, hɨndi na Turnɔ di ɗe bɨlgɨŋ karɨn̰ Kumu. Kɨya cay Turnɔ di nee le na, na-gandi nɔm na teeyi gɨŋ wɨlalɨn̰ hɨn̰: «Aba, Banɨ.»

¹⁶ Turnɔ di da Kumu dan̰ guso kalɨn̰ ma lee tɨmon̰ a ɗugoyna gɨ na naa karɨn̰ Kumu.

¹⁷ Hɨn̰ gɨ na naa karɨn̰ Kumu na, na-gandi kalɨn̰ ma na woy na hɨn̰ ka-ƴɔ hɨnga ga ni ban̰di-gulɔŋ wo̰ bɨ. Na na ka-ƴɔ hɨnga ga ni ban̰di-gulɔŋ ga da Kumu bɨ, ka-ƴɔ hɨnga ga ni ban̰di-gulɔŋ pɨna dan̰ Kɨris bɨ. Na hɨn̰ wo̰ ma, hɨn̰ gɨ na na gɨl-cɨn̰ pɨna dan̰ Kɨris na, na kɨya andaŋ danayi pɨna a boy gusoŋ-tɔgɛ koyi gɨŋ bɨ.

Gusoŋ-tɔgɛ gɨ ba kɨya ɨrga

¹⁸ Kɨɗɨn̰ ga ɨŋ ba ɨrɨm a cay gusoŋ-tɔgɛ gɨ Kumu ba kɨya wasɨn̰e cay bɨna kardi nee le, hɨnga ga ni gɨle-cɨn̰ ga a tɨwa di haw kɛ dɨŋ le, ɨŋ ɗongɨsɨge na dḛ wo̰ ƴɔbɨ gɨsɨn̰ danaa.

¹⁹ Wɔlɛ pɨna, Kumu kɨya wasɨn̰e cay gusoŋ-tɔgɛ di da karɨndi. Hɨnga se ga da Kumu nɔm woyge te game wɔlɛ gɨ nee le jɨngaa.

²⁰ Kɨya wa hɨnga ga ni se ga da Kumu say ba a te dɔnɔ di da dɔnɔn̰əŋ ga maɗɨ wo̰, na dan̰ kuduroy-geye kɔɔ naŋ, ama na dan̰ kuduroy-geye gɨ da Kumu gɨ ba dɔbɔɔ a te dɔnɔdi nee dɨŋ le. Naa hɨn̰ wo̰ kalɨn̰ ma, hɨnga ga ɗari ga ni bɔgɛ ɨrɨme cay nee ojɨn̰ cay hɨnga se ga da Kumu le woy nee ƴee.

²¹ Wɔlɛ pɨna karɨn̰ Kumu kalɨn̰ ma kɨya andaŋge doŋ coŋ a te dɔnɔ di da guyɔŋ di ba mɔndɔɔ le. Ɨni na, hɨndi kɨya wɔɔ sɔmɛ ca-kalɨn̰ bɨ gusoŋ-tɔgɛ gɨ da karɨn̰ Kumu bɨ.

²² Na sol gɨ bɨrɨŋ gɨsɨn̰ haw kɛ, hɨnga se ga da Kumu nɔm woy te gɨle-cɨn̰ dan̰ gɨle-cɨn̰ di gɨlɨn̰ hɨn̰ wɔɔ gɨ lee tama wo̰.

²³ Ama na hɨnga se ga da Kumu ba gɨle-cɨn̰ kan̰dɨge naŋ. Na-gandi ga na orɨn̰ dan̰ Turnɔ di da Kumu di woy gɨlɨn̰ hɨn̰ hɨnga ga ni bɨn̰ Kumu ga cay wase cɨg cɨg ga Kumu bɨna le. Na-gandi kalɨn̰ ma, na ɨle gusɨna a kuyoŋdi-gusɨna gɨŋ ƴen̰, gamɨn̰ gɨ Kumu na dɨɗɨn̰ kɨbɨ gɨye koyi cayna bɨ, bɨlna laan̰ karɨndi kɨɗɨn̰ ga ban kɨya pɔɗɛ kuyoŋdi-gusɨna bɨ.

²⁴ Kumu pɔɗɨna ɨni, ama hɨnga ga pɨna a boy pɔɗɛ gɨ nee gɨŋ le, na woy te game been̰ ɨrɨmedɨna cay nee ƴee. Hɨn̰ gɨ ungo na ya gɨ ɗi na woy gam naa hɨnga, ama ban na waa ɨni na, gɨ nee le na game hɨnga naŋ ɨni. Kɛ na waŋ ba kɨya game hɨnga ga ban way ɨni ga?

²⁵ Ama hɨn̰ gɨ na na gama naa hɨnga ga baa hen̰ lam ƴee ga na ɓala wɔɔ naŋ kalɨn̰ ma, na gamge na dan̰ dɨbe-ɗugɔ.

²⁶ Na toy di hɨn̰ wo̰ ma, Turnɔ di da Kumu dan̰ guso kalɨn̰ ma kɨya jɨbe toyna nee kɨya wa na-gandi tɔgɨyna wɨye. Na sɨlagɨŋ gɨyəŋ gɨ ojɨ gɨ ni olɨn̰ Kumu naŋ, ama Turnɔ di da Kumu kɨya ɔlɛ Kumu kɨya cayna dan̰ dɔrɛ ule gɨ ungo ɓala yɔ koldi naŋ.

²⁷ Ama Kumu gɨ ba kɔbɛ te hɨnga ga woy a kuduroy kalaŋ le, ban ba sɔlɛ-hɨnga ga Turnɔ di da Kumu gey. Kɨya wa hɨnga ga Turnɔ di da Kumu ɨngɨr kɨya cay kalaŋ ga woyge dan̰ cɨndɨge le, hɨndi kɨya ɨngɨre na hɨn̰ gɨ kuduroy Kumu ba gey wo̰.

²⁸ Na sol kuɗa, gɨ kan ga geyge Kumu ga na kan ga Kumu teege dan̰ gɨyəŋ gɨ da ɔjɛ gɨ ban ba gɨse tumɔ hayi le, hɨnga nɔm ga ba leege le, Kumu kɨya lɔɔ gɨ na bɨl wɨya hɨnga ga ɗari kol cayge.

²⁹ Kɨya wa kalaŋ ga Kumu torge tumɔ ɓɨrag hage ɨni le, ban ojɨ tumɔ ɓɨrag hayi gɨ ni lɔɔ ɗe gɨ kan na gɨlɨn̰ dan̰ Kurondi Jesu wo̰, hɨn̰ wo̰ na Kurondi kɨya bɨle wɔyɛ gɨ esi dan̰ karmii ga ban̰aŋ dan̰ ga kandɨ ga dan̰ kondiige danayi.

³⁰ Kalaŋ ga Kumu ojɨ ɗe na gɨlɨn̰ge dan̰ Kurondi wo̰ le, ban teege bɨ. Kalaŋ ga ban teege le, ban bɨlge leen̰ ga dan̰ durɔ ɗɨngar bɨ. Kalaŋ ga ban bɨlge leen̰ ga dan̰ durɔ ɗɨngar le, ban bɨge gusoŋ-tɔgɛ koyi bɨ.

Geye gɨ da Kumu gumu tɔgɨ

³¹ Kardi kɔl ga nee le nɔm na, kɛ na koldi wa ma mana kɨya dɨbe cay nee ɗaŋ coŋ ga? Hɨn̰ gɨ Kumu naa danana na, kɛ na waŋ ɗaŋ coŋ ba kɨya jɨbna coŋ ga?

³² Kurondi gɨ ni kuduroyi kalɨn̰ ma, Kumu gamayi a gusi naŋ, ama ban dobii a kobɨ tɨma dɨŋ kol cayna na-gandi nɔm. Kɛ ban gɨ bɨna Kurondi le, kɨya bɨna hɨnga nɔm pɨna dan̰ Kurondi naŋ ga?

³³ Kɛ na waŋ ba kɨya se kɔl a cay kalaŋ ga Kumu torge ga? Ungo wo̰ unɔ! Kumu gusi ba bɨlge leen̰ kalaŋ ga dan̰ durɔ ɗɨngar.

³⁴ Kɛ na waŋ ba kɨya ɓale bɔyɛ kɔl sige cayge ga? Ungo wo̰ unɔ! Jesu-Kɨris gusi ba mare kol cayna. Ɗɨn̰ gɨ nee le na, ban boy lɨbɨ bɨ som a kɨway Kumu a cay kobi gɨ bara gɨŋ bɨ, woy te ɔlɛ Kumu kol cayna.

³⁵ Kɛ geye gɨ Jesu-Kɨris ba geyna le, na wa ba kɨya poyina dugo danayi ga? Kɛ na hɨnga ga ni dɔsɛ-ɗugɔ wala, hɨnga ga osɨdəŋ osɨdəŋ wala, gɨle gɨ gɨlnage-cɨn̰ wala, kurɔŋ wala, ɔrɛ toyina kalɨn̰ wala, hɨnga ga dɨmbɨrdəŋ wala, pəlɨm ba kɨya poyina dugo danayi ga? Hɨnga pɨna wo̰ ga ba kɨya poyina dugo danayi unɔ.

³⁶ Walge duroy Magtubu di da Kumu dɨŋ yege hɨn̰: «Kol can̰ ji-bandi na, Ni woy kɨbɨ tɨma dɨŋ dan̰ te kɨɗɨn̰, Bɨrɨŋ ɗɔbɛ gɨ da tɨwa bɨ. Leenige leen̰ hɨn̰ gamge ga ni dɨɗe wo̰ bɨ.»

³⁷ Ama ban gɨ ba geyna le, lee gɨ na ay banga di ɗɨn̰ kɨɗɨn̰ a duroy hɨnga ga nee gaŋ le nɔm.

³⁸ Ho’o, ɨŋ sol kuɗa gɨ na tɨma naŋ bɨ, sɔmɛ-bɨra naŋ bɨ, ka-ƴɔbɛ ga daa nii naŋ bɨ, gɨmdəŋ ga da turnɔ ga ɨsɨndəŋ naŋ bɨ, hɨnga ga a jaman di haw kɛ dɨŋ naŋ bɨ, a jaman di ba kɨya ɨrga dɨŋ naŋ bɨ, dɔnɔn̰əŋ ga a cay gɨsəŋ gaŋ kɛ naŋ bɨ,

³⁹ tɔgɨn̰əŋ ga a gɨɗɨgɨ-Kumu gaŋ naŋ bɨ, ga a cay gɨsəŋ gaŋ naŋ bɨ, hɨnga se ga da Kumu pɨna wo̰ naŋ bɨ, hɨnga pɨna wo̰ ga ba kɨya ɓale poyina dugo dan̰ geye gɨ Kumu gɨl doŋ kol cayna dan̰ gɨyəŋ gɨ da Jesu-Kɨris Ba-gulondɨna gɨ na bugoŋ pɨna danayi le, unɔ bɨrɨŋ.