Magtubu di Pol wal bɨn̰ kalaŋ ga Rɔm 7 - Gabri Maja

Ba kɔbɛ Kɨris dor cayi te dɔnɔ di da gasɨn̰-kɔl gaŋ

¹ Ay karmɨnɨ ga ban̰aŋ dan̰ ga kandɨ, kɨŋ ga ɨŋ ba yəgɨŋ kɔl kɛ le, kɨŋ sol gasɨn̰-kɔl kuɗa ɨni. Kɨŋ sol leen̰ cɨndi gɨ gasɨn̰-kɔl orɨn̰ dan̰ dɔnɔ a cay ungo, na kɨɗɨn̰ ga ban somɨn̰-bɨra dan̰ cɨndi ƴee.

² Kɨradi-kɔl, tama di ƴooge le, saɗooge pɨna dan̰ kudurɔɔ dan̰ gɨyəŋ gɨ da gasɨn̰-kɔl, kɨɗɨn̰ ga ban somɨn̰-bɨra dan̰ cɨndi ƴee. Ama hɨn̰ gɨ kudurɔɔ na mara na, gasɨn̰-kɔl gɨ ba saɗoo pɨna dan̰ kudurɔɔ le, duroŋ caa coŋ ɨni.

³ Na toy di hɨn̰ wo̰ ma, hɨn̰ gɨ hɨndi na ɨra ƴɔɔ bara gɨ ɗaŋ kɨɗɨn̰ ga kudurɔɔ somɨn̰-bɨra dan̰ cɨndi ƴee na, kan kɨya yɔ gɨ hɨndi naa ɗe-lɔɔ kaya. Ama hɨn̰ gɨ kudurɔɔ na mara na, gasɨn̰-kɔl gɨ ba saɗoo pɨna dan̰ kudurɔɔ le, duroŋ caa coŋ. Lee gɨ hɨndi na ɨra ƴɔɔ bara gɨ ɗaŋ kalɨn̰ ma, gasɨn̰-kɔl kɨya yɔ gɨ hɨndi naa tama ɗe kaya naŋ.

⁴ Ay karmɨnɨ ga ban̰aŋ dan̰ ga kandɨ, kɨŋ-gandi kalɨn̰ ma kogɨŋ woy na hɨn̰ wo̰ ojɨn̰ cay gasɨn̰-kɔl bɨ. Dan̰ gɨyəŋ gɨ da bugoŋ pɨna kogɨŋ dan̰ Kɨris le, kɨŋ na kalaŋ ga kɨŋ ma ɨni bɨ, kɨŋ duroŋ a te dɔnɔ di da gasɨn̰-kɔl gɨŋ coŋ ɨni bɨ, lee gɨ kɨŋ na ga da ungo gɨ ɗaŋ. Kɨŋ na kalaŋ ga da Kɨris gɨ boy lɨbɨ duroy kalaŋ ga mage ɗe ana na leen̰ hɨnga ga ɗari ga Kumu gey.

⁵ Tumɔ kɨɗɨn̰ ga na ba baa a te lɔɔ kuduroy-geye gɨ da kuyoŋdi-gusɨna gɨŋ ƴee le, tabɨlaŋdi hɨnga ga ɨsɨni ga woy a kuduroyna le, gasɨn̰-kɔl lɨbge lee gɨ kan leege gɨye a gusɨna ɗəndəŋ. Tabɨlaŋ di hɨnga ga nee le nongɨldɨna ɗe ana na leen̰ hɨnga ga kɨya dobna kobɨ tɨma dɨŋ.

⁶ Ama haw kɛ na, nana kalaŋ ga cayna duroŋ coŋ a te dɔnɔ di da gasɨn̰-kɔl gɨŋ ɨni, kɨya wa na ma dan̰ Kɨris bɨ a cɨn̰ gasɨn̰-kɔl gɨ ƴomna dangay bɨ. Na toy di hɨn̰ wo̰ ma, na laagɨŋ gɨye bɨn̰ Kumu dan̰ lɔɔ gɨye gɨ ɨlgi dan̰ gɨyəŋ gɨ da gasɨn̰-kɔl gɨ walge a duroy Magtubu dɨŋ naŋ ɨni, ama dan̰ gɨyəŋ gɨ da dɔnɔ di da Turnɔ di da Kumu boy sɔmɛ-bɨra gɨ hɨrɨwa gɨŋ.

Gasɨn̰-kɔl bɨ ɨsɨna bɨ

⁷ Hɨn̰ gɨ nana ya gɨ gasɨn̰-kɔl naa ba lɨbe ɨsɨna gɨ lee gɨye gusɨna ɗəndəŋ daa na, kɛ a duroy kɔl gɨ nee gɨŋ le na ye na gɨ gasɨn̰-kɔl dan̰ ɨsɨna na ɓalɨn̰ge pɨna ga? Cə, na hɨn̰ wo̰ naŋ bɨrɨŋ! Tumɔ ɨŋ-bandi ɨŋ sɨla ɨsɨna naŋ, ama na gasɨn̰-kɔl ba lɔɔ gɨ ɨŋ solɨn̰ ɨsɨna. Kɨradi-kɔl, gasɨn̰-kɔl na ya hɨn̰: «Ji lɔɔ tabɨlaŋdi hɨnga ga da mɨgan̰ naŋ» tumɔ hɨn̰ gɨ gasɨn̰-kɔl na ya gɨ ji na gɨ lɔɔ cɨn̰-pɨɗɨma a cay hɨnga ga da mɨgan̰ naŋ na, ɨŋ kɨya sɔlɛ cɨn̰-pɨɗɨma leen̰ hɨnga ga ɨsɨni naŋ.

⁸ Ama ɨsɨna way gɨyəŋ dan̰ gɨyəŋ gɨ da te tumɔ bɨ, ɨrgan̰ dan̰ cɨn̰-pɨɗɨma di tɔɔ kan̰do kan̰do a canɨ. Hɨn̰ gɨ gasɨn̰-kɔl na unɔ na, dɔnɔ di da ɨsɨna kalɨn̰ ma unɔ bɨ.

⁹ Tumɔ kɨɗɨn̰ ga gasɨn̰-kɔl unɔ ƴee le, ɨŋ som-bɨra. Ama kɨɗɨn̰ ga te tumɔ ɨrga wayaŋ na, ɨsɨna jɨga som-bɨra gusɨnɨ,

¹⁰ ɨni na ɨŋ ma. Na toy di hɨn̰ wo̰ ma, te tumɔ di gey orɨn̰ danaŋ na a sɔmɛ-bɨra gɨŋ le, say orɨn̰ danaŋ na a tɨma dɨŋ.

¹¹ Ɨsɨna way gɨyəŋ dan̰ gɨyəŋ caga gɨ da te tumɔ bɨ, say narɨn̰ cɨnɨ ƴomɨn̰ te tumɔ ɗe gɨ dan̰ gɨyəŋdo na ɨŋ na wayan̰ tɨma.

¹² Lee gɨ gasɨn̰-kɔl na hɨnga ga ɨsɨni naŋ, ama na hɨnga ga woy dan̰ cɨndɨge bɨ, te tumɔ na hɨnga ga masadɨge unɔ bɨ, woy dan̰ durɔ ɗɨngar bɨ, kuɗa bɨ.

¹³ Naa hɨn̰ wo̰ na, hɨnga ga ɗari dɨɗəŋ ga? Cə, na hɨn̰ wo̰ naŋ bɨrɨŋ. Ama ɨsɨna ƴom hɨnga ga ɗari bɨlɨn̰ leen̰ te tɨman̰nɨ, ɗe ɨsɨna na gɨlɨn̰ ɨsɨnadi doŋ. Na dan̰ gɨyəŋ gɨ da te tumɔ ƴɔbɨ ma ɨsɨna gɨlɨn̰ man̰edi doŋ yɔd.

Ɨsɨna dii-ƴaa cay kalaŋ

¹⁴ Na sol gɨ gasɨn̰-kɔl sayga na gusi Kumu, ama ɨŋ-bandi na ɨŋ na ungo gɨ ɨndi ƴɔbɨ. Ɨŋ-bandi ɨŋ woy gɨlɨn̰ na hɨn̰ guyoŋ wo̰ bɨ, ɨsɨna woy gɨlɨn̰ na dan̰ ba-gulonɨ wo̰ bɨ.

¹⁵ Na cɨndi, hɨnga ga ɨŋ lee le ɨŋ sɨla duroyge naŋ, kɨya wa hɨnga ga ɨŋ gey lɔɔ le, ɨŋ laa naŋ. Ama na hɨnga ga ɨŋ geyge naŋ le, na hɨnga ga nee le ma maŋ lee.

¹⁶ Hɨn̰ gɨ ɨŋ na laa naa hɨnga ga gusɨnɨ gey lɔɔ naŋ na, ɨŋ bugoŋ pɨna na dan̰ gasɨn̰-kɔl hɨn̰ gɨ gasɨn̰-kɔl le naa hɨnga ga ɗari wo̰.

¹⁷ Hɨn̰ wo̰ na, na ɨŋ-bandi ma na ungo gɨ ba lɔɔ hɨnga ga nee le naŋ. Ama ungo gɨ ba lɔɔ hɨnga ga nee le, na ɨsɨna gɨ woy a gusɨnɨ.

¹⁸ Na cɨndi, ɨŋ sol gɨ hɨnga ga ɗari unɔ a gusɨnɨ, ɨŋ gey yɔ na a boy gɨye-lɔɔ gɨ da kuyoŋdi-gusɨnɨ gaŋ. Ɨŋ gey lɔɔ hɨnga ga ɗari hange, ama ɨŋ ɓala naŋ.

¹⁹ Hɨnga ga ɗari ga ɨŋ gey lɔɔ le, ɨŋ laa naŋ. Ama ɨsɨna gɨ ɨŋ gey lɔɔ naŋ le, na ban ma maŋ lee.

²⁰ Hɨn̰ gɨ ɨŋ na laa naa hɨnga ga ɨŋ gey lɔɔ naŋ na, ungo gɨ ba lɔɔ hɨnga ga nee le, na ɨŋ-bandi naŋ ama na ɨsɨna gɨ woy a gusɨnɨ.

²¹ Hɨnga ga ɨŋ ba sol a gusɨnɨ ba kɛ: Ɨŋ gey lɔɔ hɨnga ga ɗari hange, ama na ɨsɨna ƴɔbɨ ma maŋ ɓal lɔɔ.

²² A ɗugonɨ na gusɨnɨ mɔŋ a cay gasɨn̰-kɔl gɨ da Kumu gɨŋ hange,

²³ ama ɨŋ andaŋ a cay hɨnga ga ɗaŋ ga ɨŋ sol a gusɨnɨ ga gey dɔɔ-ƴaa canɨ bɨ wɔrɨn̰ɛ dan̰ ɨrɨmenɨ bɨ. Lee gɨ ɨŋ bɨle ba-dangay a te dɔɔ-ƴaa di da ɨsɨna gɨ woy a gusɨnɨ.

²⁴ Ay, na gɨle-cɨn̰ di mɨna ba wo̰! Kɛ na waŋ ba kɨya dɔrɔŋ a kobi kuyoŋdi-gusɨnɨ gɨ ba-orɨn̰ danaŋ tɨma dɨŋ le ga?

²⁵ Ho’o, ɨŋ hɨram Kumu kol dɔrɛ gɨ ban dɔrɔŋ kobi kuyoŋdi-gusɨnɨ gɨŋ dan̰ gɨyəŋ gɨ da Ba-gulondɨna Jesu-Kɨris. Gɨ ni dɨɗɨn̰ kɨbi na, dan̰ gɨyəŋ gɨ da ɨrɨmenɨ le ɨŋ na guyɔŋ gɨ da Kumu bɨ, ɨŋ gey kɔbɛ na gasɨn̰-kɔl kayi bɨ. Ama dan̰ gɨyəŋ gɨ da gɨye-lɔɔ gɨ da kuyoŋdi-gusɨnɨ na, ɨŋ-bandi kalɨn̰ ma ɨŋ na guyɔŋ gɨ da ɨsɨna bɨ, ɨŋ gey kɔbɛ na tabɨlaŋdi hɨnga ga gey na ɨsɨna bɨ.