Magtubu di Pol wal bɨn̰ kalaŋ ga Rɔm 6 - Gabri Maja

Kɨŋ bɨle gɔyɔŋ ga da ɨsɨna naŋ ɨni

¹ Hɨn̰ gɨ ɗarwa di da Kumu na tɨga guso jɨn̰ tumɔ tumɔ a boy kɨɗɨn̰ ga tumɔ ɨsɨna teen̰ gusi nee na, kɛ na kɨya lɔɔ na wa ga? Kɛ ojɨ gɨ nana sɨma a boy ɨsɨna gɨŋ coŋ ɗe ɗarwa di da Kumu na san̰ cay mɨgaa dɨŋ kol cayna ga?

² Cə, na hɨn̰ wo̰ naŋ bɨrɨŋ! Na-gandi ga na ma bɨ andaŋ a te dɔnɔ di da ɨsɨna gɨŋ coŋ bɨ le. Kɛ na mɨna ma mana kɨya sɔmɛ a boy ɨsɨna gɨŋ coŋ ga?

³ Kɨŋ sol kuɗa gɨ kan leenage batɛm na ɗe gɨ ana na bugoŋgɨŋ pɨna dan̰ Jesu-Kɨris bɨ, dan̰ gɨyəŋ gɨ da batɛm di nee le, na bugoŋgɨŋ pɨna danayi a boy tɨmaydi dɨŋ bɨ.

⁴ Kɨɗɨn̰ ga kan leenage batɛm le, na-gandi na ma dan̰ Kɨris bɨ, ɨmgɨnage danayi bɨ. Hɨn̰ gɨ Bayna Kumu ba boy Kɨris lɨbii dan̰ gɨyəŋ gɨ da dɔnɔ di da gusoŋ-tɔgɛ koyi le, na-gandi kalɨn̰ ma Kumu gey gɨ nana sɨma-bɨra dan̰ sɔmɛ-bɨra gɨ hɨrɨwa bɨ.

⁵ Hɨn̰ gɨ nana bugoŋ pɨna dan̰ Kɨris bɨ mara danayi a boy tɨmaydi dɨŋ bɨ na, leen̰ cɨndi na kɨya bugoŋ pɨna danayi a boy bɔyɛ lɨbedi gɨŋ bɨ.

⁶ Na sol gɨ haldɨna gɨ ɨlgi le ma dan̰ Kɨris pɨna a cay sɨya-gɨ-dagɨli gɨŋ ɨni, ɗe hal gɨ da ɨsɨna gɨ nee le mundoŋ coŋ, ɗe ana na won̰ gɔyɔŋ ga da ɨsɨna coŋ naŋ ɨni.

⁷ Kɨya wa ungo gɨ ma le, ɨsɨna daa-ƴaa cayi naŋ ɨni.

⁸ Hɨn̰ gɨ nana mara pɨna dan̰ Kɨris na, na sol hɨn̰ gɨ nana kɨya sɔmɛ-bɨra danayi bɨ.

⁹ Ɨni na, na sol kuɗa gɨ Kɨris gɨ boy lɨbɨ duroy kalaŋ ga mage le, kɨya mare naŋ bɨrɨŋ ɨni, kɨya wa tɨma ɨran̰ dan̰ dɔnɔ a cayna naŋ ɨni.

¹⁰ Tɨma di ban ma le, na kɨya dorɨn̰ ɨsɨna a sarnaygɨŋ bɨ, na tɨba pɨna nɛŋ ƴɔbɨ bɨ. Ama haw kɛ gɨ ban somɨn̰-bɨra le, ban lee hɨnga nɔm na kɨya cay Kumu.

¹¹ Na toy di hɨn̰ wo̰ ma, kɨŋ-gandi kalɨn̰ ma sɨlagɨŋ gɨ kɨŋ ma ɨni bɨ, kɨŋ dor gusɨgɨŋ a te dɔnɔ di da ɨsɨna gɨŋ coŋ ɨni bɨ, kɨŋ som-bɨra leen̰ hɨnga nɔm kɨya cay Kumu te bugoŋ pɨna dan̰ Jesu-Kɨris bɨ.

¹² Naa hɨn̰ wo̰ na, ɗɔɔgɨŋ ɨsɨna dɔɔ-ƴaa a cay kuyoŋdi-gusɨgɨŋ gɨ ba kɨya kardi nee mare naŋ bɨrɨŋ ɨni. Ɗɔɔ gɨ kɨŋ bɨle gusɨgɨŋ a kardi tabɨlaŋdi hɨnga ga da kuyoŋdi-gusɨgɨŋ naŋ bɨ.

¹³ Ɗɔɔ gɨ kɨŋ aye kɨway kuyoŋdi-gusɨgɨŋ leen̰ ɨsɨna, hɨn̰ gɨ kɨway gusɨgɨŋ le naa hɨnga ga ni leen̰ gɨye gɨ dan̰ durɔ ɗɨngar naŋ, wo̰ naŋ. Ama kɨŋ aya gusɨgɨŋ bɨn̰ Kumu yɔd hɨn̰ kalaŋ ga mage ma boyge lɨbɨ wo̰ bɨ, ayagɨŋ gusɨgɨŋ nɔm dɨbɨ coŋ kɨbɨ gɨye koyi gɨŋ hɨn̰ gɨ kɨŋ naa hɨnga ga ni leen̰ gɨye ga da hɨnga ga dan̰ durɔ ɗɨngar wo̰ bɨ.

¹⁴ Na cɨndi, ɨsɨna kɨya dɔɔ-ƴaa caygɨŋ naŋ ɨni, kɨya wa kɨŋ na a te dɔnɔ di da gasɨn̰-kɔl gɨ da Moyis dɨŋ naŋ ɨni, ama na ɗarwa di da Kumu ba-dɔɔ-ƴaa caygɨŋ.

Sɔmɛ dan̰ gɨye-lɔɔ gɨ dan̰ durɔ

¹⁵ Kɛ duroyi na wa ga? Hɨn̰ gɨ nana sɨma naa te dɔnɔ di da gasɨn̰-kɔl gɨ da Moyis gɨŋ naŋ, ama naa ɗarwa di da Kumu na ba daa-ƴaa cayna na, kɛ duroyi na gɨ nana wɨya naa te lɔɔ ɨsɨna ga? Cə, na hɨn̰ wo̰ naŋ bɨrɨŋ.

¹⁶ Kɨŋ sol kuɗa hɨn̰ gɨ kɨŋ na aya gusɨgɨŋ bɨn̰ ungo kɨya jon̰ kɔl koyi hɨn̰ guyɔŋ koyi wo̰ na, kɨŋ na guyɔŋ gɨ da ungo gɨ kɨŋ ba je kɔl kɨbi le ɨni. Wo̰ na hɨn̰ gɨ kɨŋ na bɨl gɔyɔŋ ga da ɨsɨna na, ɨsɨna kɨya orɨn̰ danagɨŋ boy tɨma dɨŋ, ama hɨn̰ gɨ kɨŋ na ja kɔl kɨbɨ Kumu na, ban kɨya bɨlgɨŋ leen̰ ga dan̰ durɔ ɗɨngar.

¹⁷ Kuɗa gɨ na laan̰ Kumu ho’o kɨya gɨ tumɔ kɨŋ na gɔyɔŋ ga da ɨsɨna, ama haw kɛ na kɨŋ je kɔl kɨbɨ Kumu, lee gɨ kɨŋ lee hɨnga ga kan gɨlgɨŋge le dan̰ kuduroygɨŋ ga pɨna.

¹⁸ Kɨŋ andaŋ a kobi guyɔŋdu di da ɨsɨna gɨŋ coŋ ɨni, lee gɨ kɨŋ bɨle na gɔyɔŋ ga da lɔɔ hɨnga ga dan̰ durɔ ɗɨngar.

¹⁹ Ɨrɨmedɨgɨŋ na ɨrɨme gɨ da kalaŋ ga ɨndəŋ, na toy di hɨn̰ wo̰ ma, ɨŋ ɨre yəgɨŋ kɔl dan̰ kɔl gɨ usa naŋ hɨn̰ kɔl yɔ gɨ da kalaŋ wo̰. Tumɔ kɨŋ ay kɨway kuyoŋdi-gusɨgɨŋ leen̰ guyɔŋdu di da hɨnga ga lee kɨni bɨ, ga da hɨnga ga dan̰ durɔ ɗɨngar naŋ bɨ, hɨnga ga nee le ba lɔɔ gɨ kɨŋ ja kɔl kɨbɨ Kumu naŋ. Haw kɛ na, ojɨ gɨ kɨŋ aya kɨway kuyoŋdi-gusɨgɨŋ laan̰ guyɔŋdu di da hɨnga ga woy dan̰ durɔ ɗɨngar ɗe gɨl gɨ kɨŋ na kalaŋ ga da Kumu ga woy dan̰ cɨndɨge.

²⁰ Tumɔ kɨɗɨn̰ ga kɨŋ baan̰ gɔyɔŋ ga da ɨsɨna ƴee le, kɨŋ ɓala kɔbɛ gɨye-lɔɔ gɨ dan̰ durɔ ɗɨngar naŋ.

²¹ Kɛ wɔɔdi hɨnga ga kɨŋ ba wayi a te lɔɔ ɨsɨna gɨ da hɨnga ga tumɔ kɨŋ ba lee le ba ani ga? Na hɨnga nɔm ga haw kɛ dasi dɨgɨŋ kol cayge ɨni, kɨya wa na hɨnga ga kɨya orɨn̰ dan̰ kalaŋ na tɨma dɨŋ.

²² Ama haw kɛ na, kɨŋ andaŋ a te dɔnɔ di da ɨsɨna gɨŋ coŋ bɨ kɨŋ bɨle na gɔyɔŋ ga da Kumu. Wɔɔdi hɨnga ga kɨŋ ba kɨya wɔɔ le, na gɨye-lɔɔ gɨ gɨl gɨ kɨŋ naa kalaŋ ga da Kumu ga woy dan̰ cɨndɨge gɨ gɨye-lɔɔ gɨ nee le kɨya orɨn̰ danagɨŋ a sɔmɛ-bɨra gɨ dan̰ tumoyi gɨŋ.

²³ Kɨya wa hɨnga ga ni cay kɔbɔ da ɨsɨna le na tɨma, ama hɨnga ga ni bee-kalɨn̰ ga da Kumu le, na sɔmɛ-bɨra gɨ dan̰ tumoyi te bugoŋ pɨna dan̰ Jesu-Kɨris Ba-gulondɨna.