Magtubu di Pol wal bɨn̰ kalaŋ ga Rɔm 5 - Gabri Maja

Gusi-dɔbɛ woy duroy ka-aye kudurɔ dan̰ Kumu

¹ Ho’o, na bɨle kalaŋ ga dan̰ durɔ ɗɨngar cɨn̰ Kumu na dan̰ gɨyəŋ gɨ da aye kudurɔ kona ɨni. Lee gɨ haw kɛ na gusi-dɔbɛ woy duroyna dan̰ Kumu na dan̰ gɨyəŋ gɨ da Ba-gulondɨna Jesu-Kɨris.

² Na kol cayi ma mana wan̰ gɨyəŋ gɨ ni andɨn̰ a ɗarwa di da Kumu dɨŋ di nee le dan̰ gɨyəŋ gɨ da aye kudurɔ. A duroy ɗarwa di nee dɨŋ le na ɨre cay nee osu bɨ. Na lee gusi-mɔwa a cay gusoŋ-tɔgɛ gɨ da Kumu gɨŋ bɨ. Kɨya wa na sol gɨ wɔlɛ pɨna na kɨya andaŋ a boy gusoŋ-tɔgɛ gɨ nee gɨŋ le. Na hɨnga ga nee le ma, mana bee ɨrɨmedɨna cay nee.

³ Ɗɨn̰ gɨ nee le na, na lee gusi-mɔwa kɨya cay hɨnga ga ni dɔsɛ-ɗugɔ ga andaŋ cayna. Kɨya wa na sol gɨ hɨnga ga ni dɔsɛ-ɗugɔ ga nee le, kɨya bɨna na dɨbe-ɗugɔ.

⁴ Ɨni na, dɨbe-ɗugɔ kɨya dɔbɛ bandɨ kuduroyna. Hɨn̰ gɨ kuduroyna na waa bandɨ na, na kɨya ɨre osɨwa a cay ɨrɨmedɨna gɨŋ gɨ na bee a cay Kumu.

⁵ Ama ɨrɨmedɨna gɨ na ba bee a cay Kumu le, kɨya ɨrgan̰ dan̰ dasi cayna naŋ, kɨya wa Kumu gɨygɨn̰ dan̰ geye koyi a kuduroyna dan̰ gɨyəŋ gɨ da Turnɔ ɗe-kuduroy-bɛrɛ di ban bɨna.

⁶ Ho’o, kɨya wa a boy wɔlɛ gɨ Kumu ojɨ gɨŋ, kɨɗɨn̰ ga na-gandi na ɨran̰ dan̰ dɔnɔ di ni poɗɨn̰ gusɨna naŋ ƴee le, Kɨris ma kol cayna na-gandi ka-lɔɔ ɨsɨna.

⁷ Osu tɔgɨ ɗe ungo na ma kol cay mɨgay gɨ ɗaŋ, ko ban naa ungo gɨ dan̰ durɔ ɗɨngar. Kuɗa dɨm ma ungo kɨya geye mare kɨya cay ungo gɨ ba lɔɔ ɗarwa ƴee.

⁸ Ama sɨlagɨŋ hɨnga ga Kumu lee gɨlɨn̰ geye koyi gɨ gumu kol cayna: Na kɨɗɨn̰ ga na-gandi na baa ka-lɔɔ ɨsɨna ƴee ma Kɨris ma kol cayna.

⁹ Haw kɛ gɨ Kɨris bɨlna leen̰ kalaŋ ga dan̰ durɔ ɗɨngar a cɨndi dan̰ gɨyəŋ gɨ da kɨbardi gɨ bugoŋ dugo le, kɛ na wa ɗaŋ coŋ ba kɨya narii dorna kɨbɨ kuduroy-hɔmɛ di da Kumu dɨŋ coŋ ga?

¹⁰ Tumɔ kɨɗɨn̰ ga na ba baan̰ ka-baa ga da Kumu ƴee le, tɨma di da Kurondi beena dugo pɨna danayi. Naa hɨn̰ wo̰ na, haw kɛ gɨ na bugoŋ dugo pɨna danayi le, na sol leen̰ cɨndi gɨ ban kɨya pɔɗɨna dan̰ gɨyəŋ gɨ da sɔmɛ-bɨra gɨ da Kurondi bɨ.

¹¹ Ɗɨn̰ gɨ nee le na, haw kɛ na, na ɨre lee gusi-mɔwa kɨya cay Kumu dan̰ gɨyəŋ gɨ da Ba-gulondɨna Jesu-Kɨris, kɨya wa na ban ba hangɨna gɨyəŋ gɨ da bugoŋ pɨna dan̰ Kumu.

Adam bɨ Kɨris bɨ

¹² Ɨni na, na kol cay ungo pɨna hayi ƴɔbɨ gɨ na Adam ma ɨsɨna andaŋ a cay gɨsəŋ gaŋ bɨ, na kol cay ɨsɨna ma tɨma kalɨn̰ ma ɨrga bɨ. Na toy di hɨn̰ wo̰ ma, tɨma ƴee kɨɗɨn̰ nɔm dɨɗɨn̰ kalaŋ, kɨya wa kan nɔm leege ɨsɨna.

¹³ Ho’o, ɨsɨna woy a cay gɨsəŋ gaŋ ɨni dɨm ma Kumu bɨn̰ Moyis gasɨn̰-kɔl ƴee. Ama a kɨɗɨn̰ ga gasɨn̰-kɔl unɔ nee le, ɗɨngɨsage ɨsɨna nee naŋ.

¹⁴ Ama tɨma woy te dɔɔ-ƴaa a cay kalaŋ, an̰ toy na boy wɔlɛ gɨ da Adam gɨŋ bɨrɨŋ andɨn̰ a boy wɔlɛ gɨ da Moyis gɨŋ. Ko ɨsɨna gɨ da kalaŋ na wɨya gɨlɨn̰ hɨn̰ ɨsɨna gɨ da Adam wo̰ naŋ kalɨn̰ ma tɨma woy te dɔɔ-ƴaa cayge. Haw kɛ na, na ɓal gɨse Adam dan̰ ban gɨ ba kɨya ɨrga kardi gɨ na Kɨris.

¹⁵ Ama hɨnga ga ni bee ga Kumu bɨna kalɨn̰ le, wɨya gɨlɨn̰ na hɨn̰ ga da Adam wo̰ naŋ. Na kol hɨnga ga dan̰ gɨyəŋdɨge naŋ ga ungo pɨna hayi ƴɔbɨ lee le ma, kalaŋ kondɨ marɨn̰ge. Ɗarwa di da Kumu gumu ɗɨn̰ hɨnga ga dan̰ gɨyəŋdɨge naŋ ƴee coŋ. Ɗarwa le ɨrga na dan̰ gɨyəŋ gɨ da ungo pɨna hayi, Jesu-Kɨris, hɨndi lee kuduroy-ɗarwa gɨɗaŋ dan̰ kondɨwadi kalaŋ.

¹⁶ Hɨnga ga ni bee ga da Kumu le, woy gɨlɨn̰ kan̰dɨge dan̰ kandi-wɔɔ ga da ɨsɨna gɨ Adam lee. Bɔyɛ kɔl ɨrga na kardi ɨsɨna gɨ pɨna hay nɛŋ bɨ, orɨn̰ dan̰ kalaŋ nɔm tɨma dɨŋ bɨ. Ama hɨnga ga ni bee kalɨn̰ ga da Kumu le, ɨrga na kardi hɨnga ga dan̰ gɨyəŋdɨge naŋ ga kalaŋ leege bɨ, hɨndi bɨle kalaŋ leen̰ ga dan̰ durɔ ɗɨngar bɨ.

¹⁷ Na cɨndi, tɨma ɨrga na kɨya cay hɨnga ga dan̰ gɨyəŋdɨge naŋ ga ungo pɨna hayi gɨ nee lee le. Na kɨya cay ungo gɨ pɨna hayi gɨ nee le ƴɔbɨ ma tɨma din̰-ƴaa a cay kalaŋ. Ama kɛ na mɨna ma, mana kɨya dɔɔ-ƴaa a boy sɔmɛ-bɨra gɨ dan̰ tumoyi gɨŋ dan̰ gɨyəŋ gɨ da ungo gɨ pɨna hayi nɛŋ, Jesu-Kɨris le naŋ ga? Ho’o, kalaŋ ga wayge ɗarwa di gumu tɔgɨ di da Kumu bɨ bɨlege ga dan̰ durɔ ɗɨngar a cɨndi dan̰ gɨyəŋ gɨ da hɨnga ga ni bee-kalɨn̰ bɨ le, kɨya dɔɔge ƴaa danayi.

¹⁸ Na toy di hɨn̰ wo̰ ma, kol cay hɨnga ga dan̰ gɨyəŋdɨge naŋ, ga ungo pɨna hayi nɛŋ Adam lee le, kalaŋ nɔm andaŋge tɨma dɨŋ. Ama kol gɨye-lɔɔ gɨ dan̰ durɔ ɗɨngar gɨ ungo gɨ pɨna hayi nɛŋ gɨ na Kɨris lee le, kalaŋ nɔm kɨya ɓalege bɨle ga dan̰ durɔ ɗɨngar cɨn̰ Kumu bɨ, kɨya ɓalege wɔɔ sɔmɛ-bɨra gɨ dan̰ tumoyi bɨ.

¹⁹ Ɨni na, dan̰ gɨyəŋ gɨ da jɔɔ kɔl naŋ gɨ da ungo gɨ pɨna hayi nɛŋ le, kalaŋ nɔm bɨləŋge ka-lɔɔ ɨsɨna bɨ, dan̰ gɨyəŋ gɨ da jɔɔ kɔl gɨ da ungo gɨ pɨna hayi nɛŋ le, Kumu lee gɨ kalaŋ dan̰ kondiige bɨləŋge kalaŋ ga dan̰ durɔ ɗɨngar a cɨndi.

²⁰ Gasɨn̰-kɔl gɨ da Moyis andaŋ na ɗe gɨ dɔnɔ di da lɔɔ hɨnga ga dan̰ gɨyəŋdɨge naŋ na gɨlɨn̰ gusɨge jɨn̰ tumɔ tumɔ. Ama a boy kɨɗɨn̰ ga ɨsɨna teen̰ gusi nee le, ɗarwa di da Kumu kalɨn̰ ma te guso nee cɨla coŋ na hɨn̰ wo̰ bɨ.

²¹ Na toy di hɨn̰ wo̰ ma, hɨn̰ gɨ tɨma ba din̰-ƴaa cay kalaŋ kɨya cay ɨsɨna le, ɗarwa di da Kumu kalɨn̰ ma, kɨya dɔɔ-ƴaa cay kalaŋ na hɨn̰ wo̰ bɨ, bɨlge leen̰ kalaŋ ga dan̰ durɔ ɗɨngar bɨ, orɨn̰ danage a boy sɔmɛ-bɨra gɨ dan̰ tumoyi gɨŋ bɨ, dan̰ gɨyəŋ gɨ da Ba-gulondɨna Jesu-Kɨris.