Magtubu di Pol wal bɨn̰ kalaŋ ga Rɔm 4 - Gabri Maja

Abɨraham na hɨnga ga ni gɨle

¹ Naa hɨn̰ wo̰ na, kɛ na koldi wa ma mani kɨya yɔ ojɨn̰ cay mon̰dɨni Abɨraham ga? Kɛ ban way na wa dan̰ cay gusi koyi ga?

² Hɨn̰ gɨ Abɨraham na bɨl ungo gɨ dan̰ durɔ ɗɨngar cɨn̰ Kumu dan̰ gɨyəŋ gɨ da gɨye-lɔɔdi na, ban orɨn̰ dan̰ gɨyəŋ gɨ ni dogɨn̰ jorgii. Ama ban ɨran̰ dan̰ gɨyəŋ gɨ ni dogɨn̰ jorgii tumoy Kumu naŋ.

³ Kɛ Magtubu di da Kumu ye na wa ga? Hɨndi ye hɨn̰: «Abɨraham bee kuduroy a cay Kumu, lee gɨ Kumu bɨlii leen̰ ungo gɨ dan̰ durɔ ɗɨngar a cɨndi kɨya cay aye kudurɔ koyi.»

⁴ Ɨrɨmgɨŋ a cay kɔl gɨ kɛ le: Hɨn̰ gɨ ungo na laa gɨye na, ban kɨya wɔɔ cay kobi, cay kobi gɨ nee le na hɨnga ga biige kalɨn̰ naŋ. Na hɨnga ga ojɨ gɨ kan kɨya bii.

⁵ Ama hɨn̰ gɨ ungo na laa gɨye kɨya wan̰ cay kobi naŋ ama na bɨga kuduroy a cay Kumu gɨ ba sɔlɛ ba-lɔɔ ɨsɨna leen̰ ungo gɨ dan̰ durɔ ɗɨngar na, ungo gɨ nee le Kumu kɨya sɔlɛ aye kudurɔ koyi bɨ, bɨlii leen̰ ungo gɨ dan̰ durɔ ɗɨngar a cɨndi bɨ.

⁶ Kɨlma Dabid kalɨn̰ ma naa ye kɔl tɔrɛ-kɨbɨ gɨ da ungo gɨ Kumu bɨlii leen̰ ungo gɨ dan̰ durɔ ɗɨngar a cɨndi dɨle sɔlɛ gɨye-lɔɔdi.

⁷ Kɔl gɨ Dabid ba ye ba kɛ: «Tumoy wolwa woy a cay kalaŋ, Ga Kumu ɗe kuduroy jal a cay ɨsɨna koge gɨŋ bɨ, Yɨde ɨsɨna koge coŋ bɨ.

⁸ Tumoy wolwa woy a cay ungo, Gɨ Ba-gulɔŋ sɨlayi laan̰ ba-lɔɔ ɨsɨna naŋ.»

⁹ Aŋ ɨngɨrgɨŋ ƴee bɨ, kɛ tɔrɛ-kɨbɨ gɨ nee le na gɨ da Jubɨn̰əŋ ga walge ban̰a dan̰ kan̰dɨge ƴɔbɨ ga? Naŋ, ban na gɨ da kalaŋ ga walage ban̰a naŋ bɨ. Tumɔ na ye gɨ naa dan̰ gɨyəŋ gɨ da aye kudurɔ ƴɔbɨ ma Kumu na solɨn̰ Abɨraham leen̰ ungo gɨ dan̰ durɔ ɗɨngar a cɨndi.

¹⁰ Kɛ Kumu solii leen̰ ungo gɨ dan̰ durɔ ɗɨngar a cɨndi na mada ga? Kɛ na kɨɗɨn̰ ga ban wal ban̰a wala baa wale ban̰a ƴee ga? Na kardi nee naŋ, ama na tumoy wale ban̰a.

¹¹ Kumu bɨn̰ Abɨraham kambe ga da wale ban̰a na kɨya gɨlɨn̰ gɨ tumɔ dɨm ma ban walɨn̰ ban̰a ƴee le, ban bɨle ungo gɨ dan̰ durɔ ɗɨngar cɨn̰ Kumu na kɨya cay aye kudurɔ koyi. Na toy di hɨn̰ wo̰ ma, Abɨraham bɨle bay kalaŋ nɔm ga Kumu bɨlge leen̰ kalaŋ ga dan̰ durɔ ɗɨngar a cɨndi, kol aye kudurɔ koge ko kan na walage ban̰a naŋ.

¹² Abɨraham bɨle na bay kalaŋ ga walge ban̰a bɨ. Ka-wale ban̰a ga nee le na kan ga ɨrge na a cay wale ban̰a di da kuyoŋdi-gusu dɨŋ ƴɔbɨ naŋ. Ama na kan ga ayge cay tɨbay mon̰dɨni Abɨraham a te aye kudurɔ koyi gɨŋ. Kɨɗɨn̰ ga ban baa wale ban̰a ƴee le.

Hɨnga ga Kumu ye gɨ ɗi na kɨya lɔɔ bɨn̰ Abɨraham

¹³ Kumu ye gɨ ɗi na kɨya bɨn̰ Abɨraham bɨ, kongɨn̰ii bɨ, cay gɨsəŋ nɔm hɨn̰ hɨnga ga ni ban̰di-gulɔŋ kage wo̰. Hɨnga ga Kumu ye gɨ ɗi na kɨya bii le, na kɨya bɨle gɨ Abɨraham bɨle gusi a kardi gasɨn̰-kɔl gaŋ naŋ. Ama na kɨya bɨle gɨ Kumu bɨlii leen̰ ungo gɨ dan̰ durɔ ɗɨngar a cɨndi, dan̰ gɨyəŋ gɨ da aye kudurɔ koyi.

¹⁴ Hɨn̰ gɨ kan ga wayge cay gɨsəŋ hɨn̰ hɨnga ga ni ban̰di-gulɔŋ le, na waage naa kol kɔbɛ gɨ kan kobɨ kardi gasɨn̰-kɔl ƴɔbɨ na, aye kudurɔ na hɨnga ga ɗarwayge unɔ bɨ, hɨnga ga Kumu ye gɨ ɗi na kɨya bee kalɨn̰ le kalɨn̰ ma, bɨle na hɨnga ga maɗɨ wo̰ dugo bɨ.

¹⁵ Na cɨndi, gasɨn̰-kɔl ba gare kuduroy-hɔmɛ di da Kumu bɔgɛ a cay kalaŋ. Ama hɨn̰ gɨ gasɨn̰-kɔl na unɔ na, hangɨɗe cay gasɨn̰-kɔl kalɨn̰ ma unɔ bɨ.

¹⁶ Na toy di hɨn̰ wo̰ ma, hɨnga ga Kumu ye gɨ ɗi na kɨya bɨn̰ Abɨraham le, ban kɨya wɔɔ na dan̰ gɨyəŋ gɨ da aye kudurɔ ɗe na won̰ hɨnga ga ni ɗarwa ga da Kumu. Hɨnga ga Kumu ye gɨ ɗi na kɨya bii ga nee le, woy a ban̰dɨge gaŋ ojɨn̰ na cay kongɨn̰i Abɨraham nɔm. Hɨnga ga nee le wɨya uja na cay kan ga beege kɔl a cay gasɨn̰-kɔl gaŋ kan̰dɨge ƴɔbɨ naŋ. Ama woy ojɨ na cay kalaŋ nɔm ga ayge kuduroyge hɨn̰ aye kudurɔ gɨ da Abɨraham, gɨ na bayna na-gandi nɔm wo̰ bɨ.

¹⁷ Na hɨn̰ gɨ ba walge a duroy Magtubu di da Kumu dɨŋ ye hɨn̰: «Na ji-bandi ma maŋ lee gɨ ji bɨle mon̰ gɨ da te wɔɔ gɨ da kalaŋ ga dan̰ kondiige.» Ban na mon̰dɨna a cɨn̰ Kumu gɨ ban bee kuduroy cayi, gɨ ba bɨn̰ kalaŋ ga mage sɔmɛ gɨ bɨra bɨ, ba andɨn̰ dan̰ hɨnga ga unɔ bɨ.

¹⁸ Ko, hɨn̰ gɨ hɨnga ga ni bɔgɛ ɨrɨme cay nee na unɔ kalɨn̰ ma Abɨraham bee kuduroy a cay kɔl gɨ da Kumu bɨ, ɨrɨmedi gɨ ban bee a cay Kumu le woy osu bɨ. Lee gɨ ban bɨle mon̰ gɨ da te wɔɔ gɨ da kalaŋ ga dan̰ kondiige hɨn̰ gɨ tumɔ Kumu ba yeyi hɨn̰: «Kongɨn̰ɨn̰ kɨya bɨlege te kalaŋ ga dan̰ kondiige.»

¹⁹ Abɨraham sol gusi gɨ ban lee gɨ əsi bɨ, sol gɨ ban na ɨran̰ dan̰ dɔnɔ gɨ ni won̰ kɨye naŋ bɨ, kɨya wa ɨlgedi ɓal hɨn̰ ɨlge aru wo̰. Ban sol gɨ tamdi Sara kalɨn̰ ma lee di əsi bɨ ɨran̰ dan̰ dɔnɔ di ni won̰ kɨye naŋ bɨ. Ama hɨnga ga nee le, laa gɨ aye kudurɔ gɨ da Abɨraham gabaŋ naŋ.

²⁰ Abɨraham ɨrɨm kuduroy sɔɔ-sɔɔ a cay hɨnga ga Kumu ye gɨ ɗi na kɨya lɔɔ bii le naŋ bɨrɨŋ bɨ, ɗa aye kudurɔ koyi coŋ naŋ bɨ. Ama ban ɨre osu a te aye kudurɔ koyi gɨŋ dɨbɨn̰ gusoŋ-tɔgɛ a cay Kumu.

²¹ Ban sol kuɗa gɨ hɨnga ga Kumu ye gɨ ɗi na kɨya lɔɔ bii le, ban na orɨn̰ dan̰ dɔnɔ di ni leen̰ bɨ.

²² Na toy di hɨn̰ wo̰ ma, Kumu solii leen̰ ungo gɨ dan̰ durɔ ɗɨngar hɨn̰ gɨ ba walge a duroy magtubu dɨŋ.

²³ Ama walage kɔl gɨ nee le ujan̰ na cayi ban kan̰di ƴɔbɨ naŋ.

²⁴ Ama walge ojɨn̰ na cayna na-gandi bɨ. Hɨn̰ gɨ na na bɨga kuduroyna a cay Kumu gɨ ba bɔyɛ Ba-gulondɨna Jesu lɨbii duroy kalaŋ ga madɨrdaŋ gaŋ na, ban kɨya bɨlna leen̰ kalaŋ ga dan̰ durɔ ɗɨngar a cɨndi bɨ.

²⁵ Kumu dobii kobɨ tɨma dɨŋ na kol hɨnga kana ga dan̰ gɨyəŋdɨge naŋ. Kardi nee ban boyii lɨbii ɗe ana na bɨlɨn̰ kalaŋ ga dan̰ durɔ ɗɨngar a cɨndi.