Magtubu di Pol wal bɨn̰ kalaŋ ga Rɔm 3 - Gabri Maja

¹ Naa hɨn̰ wo̰ na, kɛ na wa ma Jubɨn̰əŋ wayge ɗɨn̰ kalaŋ ga ɗaŋ ga na Jubɨn̰əŋ naŋ le ga? Kɛ wale ban̰a le ɗarwado na wa ga?

² Ho’o, Jubɨn̰əŋ wayge hɨnga dan̰ kondiige! Cay wase na, na kan ma Kumu beege kɔl koyi kobɨge ɗe kan na gama.

³ Ama hɨn̰ gɨ kan ga pɨna na bɨlge kardɨge bɨn̰ Kumu na, kɛ na kɨya yɔ na mɨna coŋ ga? Kɛ bɨle kardɨge gɨ kan bɨle bɨn̰ Kumu le, kɨya nare Kumu ɨre a cay tɨbayi dɨŋ ga?

⁴ Cə, na hɨn̰ wo̰ naŋ bɨrɨŋ! Hɨn̰ gɨ kalaŋ nɔm naa ka-poy kalɨn̰ ma, Kumu na ba-yɔɔ kɔl gɨ cɨndi. Na hɨn̰ gɨ Magtubu di da Kumu ye wo̰: «Ay Kumu, hɨn̰ gɨ ji na ya kɔl na, Ungo sol gɨ naa kɔl gɨ cɨndi. Hɨn̰ gɨ ungo na dɨbɨ kɔl can̰ na, Kɔl wo̰ gɨ ba kɨya ƴɔmɛ can̰ unɔ.»

⁵ Ama hɨn̰ gɨ gɨye-lɔɔdɨna gɨ dan̰ durɔ ɗɨngar naŋ, na gɨl gɨ Kumu naa ungo gɨ dan̰ durɔ ɗɨngar na, kɛ na kɨya yɔ na wa coŋ ga? Kɨɗɨn̰ ga Kumu na laa kuduroy-hɔmɛ danana na, kɛ ban na ungo gɨ dan̰ durɔ ɗɨngar ga? Ɨŋ ye kɔl na hɨn̰ gɨ da kalaŋ ga ɨndəŋ wo̰ ƴɔbɨ.

⁶ Cə, na hɨn̰ wo̰ naŋ bɨrɨŋ! Hɨn̰ gɨ Kumu naa ungo gɨ dan̰ durɔ ɗɨngar naŋ na, kɛ ban kɨya ɓale bɔyɛ kɔl a cay kalaŋ ga a cay gɨsəŋ gaŋ nɔm na mɨna ga?

⁷ Gajanaŋ ungo da yɔ hɨn̰: «Hɨn̰ gɨ poy tɨnge na hanga gɨyəŋ bɨn̰ Kumu, ɗe na gɨl gɨ kɔl koyi na cɨndi cɨla coŋ bɨ, gusondi na yan̰ bɨ na, kɛ na kɨya wa ma Kumu kɨya ɗɔngɨsɔŋ dan̰ ka-lɔɔ ɨsɨna bɨ, bɔyɛ kɔl canɨ coŋ bɨ ga?»

⁸ Ɨni na, kɨya wa ma mana ya hɨn̰: «Kuɗa gɨ na laa hɨnga ga ɨsɨni ɗe hɨnga ga ɗari andɨn̰ doŋ duroy nee naŋ ga?» Kalaŋ ga pɨna yəŋge kɔl gɨ ɨsɨni gɨ ɨŋ-bandi naa ba-yɔɔ kɔl gɨ nee le. Kumu kɨya bɔyɛ kɔl a cay kalaŋ ga hɨn̰ wo̰ le bɨ, bɔyɛ kɔl koyi gɨ nee le na dan̰ gɨyəŋdi bɨ.

Ungo gɨ dan̰ durɔ ɗɨngar unɔ

⁹ Kɛ ni kɨya yɔ na mɨna coŋ ga? Kɛ ni ga ni Jubɨ le ni ɗɨn̰ te kalaŋ ga baa ga? Dḛ wo̰ naŋ bɨrɨŋ! Ɨŋ yəgɨŋ kɔl cay nee tumɔ ɨni gɨ Jubɨn̰əŋ bɨ kalaŋ ga toyge na Jubɨ naŋ bɨ, kan nɔm na a te dɔnɔ di da ɨsɨna gɨŋ.

¹⁰ Walge duroy Magtubu di da Kumu dɨŋ yege hɨn̰: «Ungo gɨ dan̰ durɔ ɗɨngar unɔ, Pɨna nɛŋ wo̰ kalɨn̰ ma unɔ.»

¹¹ «Ungo pɨna wo̰ gɨ ba sɔlɛ-hɨnga unɔ, Ungo pɨna wo̰ gɨ ba male Kumu unɔ.

¹² Kan nɔm ɗege gɨyəŋ gɨ ɗari coŋ, Kan nɔm bɨləŋge ka-matɨr. Ungo gɨ ba lɔɔ hɨnga ga ɗari unɔ, Pɨna nɛŋ wo̰ kalɨn̰ ma unɔ.»

¹³ «Hɨnga ga andaŋ kɨbɨ ungo le, Na hɨnga ga ɨsɨni ga ɓal dɨɗe ungo.» «Kɨbɨge walɨn̰ na dan̰ kɔl gɨ ni jɨba bɨ, Kɔl yɔdɨge woy gɨlɨn̰ na hɨn̰, Sɛm di kumbulo gɨ dɨɗɨ kalaŋ wo̰ bɨ.»

¹⁴ «Kɔl yɔdɨge na ɓɨse bɨ, Kɔl gɨ ɗan̰i bɨ.»

¹⁵ «Tɨbayge hɨmbal a te ɔrɛ bɔgɛ kɨbar gɨŋ bɨ.

¹⁶ Kɨɗɨn̰ nɔm ga kan or nee le, Ɗege na mundoŋ bɨ, Gɨle-cɨn̰ bɨ a ban̰dɨge.

¹⁷ Gɨyəŋ gɨ da gusi-dɔbɛ le, Kan sɨlage naŋ.»

¹⁸ «Bɔyɛ sɨyadi Kumu, Unɔ a gusɨge.»

¹⁹ Na sol kuɗa gɨ hɨnga nɔm ga gasɨn̰-kɔl ye koldɨge le, hɨndi ye bɨn̰ na kalaŋ ga somge a te gasɨn̰-kɔl gaŋ, ɗe kɨbɨ ungo pɨna wo̰ andɨn̰ dan̰ kɔl gɨ ni dorɨn̰ kɔl cayi naŋ bɨ, ɗe kalaŋ nɔm na solɨn̰ge kardi ɨsɨna koge tumoy Kumu bɨ.

²⁰ Na toy di hɨn̰ wo̰ ma, ungo gɨ ba kɨya bɨle ungo gɨ dan̰ durɔ ɗɨngar a cɨn̰ Kumu dan̰ gɨyəŋ gɨ da gɨye-lɔɔ gɨ da gasɨn̰-kɔl unɔ. Kɨya wa gasɨn̰-kɔl gɨl na ɨsɨna gɨ da kalaŋ ɗe kan na sol ƴɔbɨ.

Gɨyəŋ gɨ Kumu bɨlɨn̰ kalaŋ leen̰ ga durɔ ɗɨngar a cɨndi

²¹ Ama haw kɛ na, Kumu wasɨn̰ gɨyəŋ gɨ ban bɨlɨn̰ kalaŋ leen̰ kalaŋ ga dan̰ durɔ ɗɨngar a cɨndi dɨle gasɨn̰-kɔl. Gɨyəŋ gɨ nee le gasɨn̰-kɔl gɨ da Moyis bɨ, magtubu da ka-yɔɔ-kɔl-gɨ-Kumu-ba-yɔɔ bɨ, naa leege tɨmon̰di.

²² Kumu bɨle kalaŋ leen̰ kalaŋ ga dan̰ durɔ ɗɨngar a cɨndi na dan̰ gɨyəŋ gɨ da kuduroyge ga kan ay bɨn̰ Jesu-Kɨris. Gɨyəŋ gɨ nee le, woy ojɨ na cay kalaŋ nɔm, ga beege kuduroyge a cay Jesu. Kɨya wa Kumu dɨra cɨn̰ ungo naŋ.

²³ Kalaŋ nɔm na ka-lɔɔ ɨsɨna, na wo̰ ma kan kɨya ɓale andaŋ a duroy gusoŋ-tɔgɛ gɨ da Kumu dɨŋ naŋ.

²⁴ Ama Kumu dan̰ gɨyəŋ gɨ da ɗarwa toyi bɨle kalaŋ leen̰ ga dan̰ durɔ ɗɨngar a cɨndi kalɨn̰, na dan̰ gɨyəŋ gɨ da bugoŋ pɨna dan̰ Jesu-Kɨris gɨ ba dorge a te ɨsɨna koge gɨŋ dɨbɨge daa.

²⁵ Kumu ay Jesu bee hɨn̰ hɨnga ga ni bogɨn̰ kɨbar, ɗe kɨbardi na dor ɨsɨna gɨ da kalaŋ ga beege kuduroyge cayi. Ban lee hɨn̰ wo̰, ɗe kalaŋ na sol gɨ ban naa ungo gɨ dan̰ durɔ ɗɨngar. Ɨsɨna gɨ jɨne gɨ kalaŋ nɔm leege le, Kumu lee hɨn̰ gɨ ɗi na sɨlage naŋ wo̰,

²⁶ ban dɨbɨ ɗugoyi. Ama haw kɛ na, dan̰ gɨyəŋ gɨ da bɔgɛ kɨbar gɨ nee le, ban gɨl gɨ ɗi na lee hɨnga naa dan̰ gɨyəŋdɨge bɨ, ban gusi kalɨn̰ ma ban naa ungo gɨ dan̰ durɔ ɗɨngar bɨ, ba bɨle kalaŋ nɔm ga beege kuduroyge a cay Jesu, leen̰ kalaŋ ga dan̰ durɔ ɗɨngar a cɨndi bɨ.

²⁷ Naa hɨn̰ wo̰ na, kɛ kɨɗɨn̰ ga ungo kɨya dogɨn̰ jorgii woy nee ga? Kɨɗɨn̰di unɔ. Na kɨya wa ma kɨɗɨn̰ ga ungo kɨya ɓale dogɨn̰ jorgii nee unɔ ga? Na kɨya gɨ ban kɨya ɓale bɨle durɔ ɗɨngar dan̰ gɨyəŋ gɨ da gɨye-lɔɔdi naŋ, ama na dan̰ gɨyəŋ gɨ da aye kudurɔ.

²⁸ Ho’o ni sol kuɗa gɨ ungo kɨya bɨle ungo gɨ dan̰ durɔ ɗɨngar a cɨn̰ Kumu na dan̰ gɨyəŋ gɨ da aye kudurɔ koyi ƴɔbɨ, ama na dan̰ lɔɔ gɨ ban lee te gasɨn̰-kɔl gɨ da Moyis naŋ.

²⁹ Kɛ, kɨŋ ɨrɨm hɨn̰ gɨ Kumu naa Kumu gɨ da Jubɨn̰əŋ kan̰dɨge ga? Kɛ, te kalaŋ ga toyge na Jubɨ naŋ le, ban na Kumu koge bɨ naŋ ga? Ban na Kumu koge bɨ leen̰ cɨndi,

³⁰ kɨya wa Kumu na pɨna hayi ƴɔbɨ. Ban bɨle te kalaŋ ga na Jubɨn̰əŋ leen̰ ga dan̰ durɔ ɗɨngar a cɨndi na dan̰ gɨyəŋ gɨ da aye kudurɔ koge bɨ, bɨle te kalaŋ ga toyge na Jubɨ naŋ leen̰ ga dan̰ durɔ ɗɨngar a cɨndi na dan̰ gɨyəŋ gɨ da aye kudurɔ koge nee bɨ.

³¹ Naa hɨn̰ wo̰ na, kɛ dan̰ gɨyəŋ gɨ da aye kudurɔ le ni bɨle gasɨn̰-kɔl gɨ da Moyis leen̰ hɨnga ga kalɨn̰ wo̰ dugo ga? Cə, na hɨn̰ wo̰ naŋ bɨrɨŋ. Na nee dɨm ma, mani boo tɔgɔɔ cay mɨgaa ƴee.