Magtubu di Pol wal bɨn̰ kalaŋ ga Rɔm 2 - Gabri Maja

Bɔyɛ kɔl gɨ da Kumu

¹ Ji gɨ ba bɔyɛ kɔl cay kalaŋ le, ko ji naa waŋ waŋ kalɨn̰ ma, ungo kɨya ɗɔ kardi kɔl le bɨn̰ naŋ. Kɨya wa ji ɨre boy kɔl a cay kalaŋ ga ka-lɔɔ hɨnga ga ɨsɨn, ama gɨye-lɔɔdɨn̰ gɨlɨn̰ na hɨn̰ koge kan wo̰ bɨ. Lee gɨ kɔl gɨ ji ɨre boy le, ji ɨre boy na cay gusɨn̰ kon̰ gɨŋ gaŋ hɨn̰ wo̰ bɨ.

² Ama na sol kuɗa gɨ kalaŋ ga ka-lɔɔ hɨnga ga hɨn̰ wo̰ le, Kumu kɨya bɔyɛ kɔl cayge dan̰ gɨyəŋ gɨ da kɔl gɨ cɨndi.

³ Ja, ji gɨ ba bɔyɛ kɔl a cay kalaŋ ga nee le bɨ, ji woy te lɔɔ hɨnga na hɨn̰ kan wo̰ bɨ le, kɛ ji ɨrɨm gɨ ji na kɨya dɔgɛ andaŋ a kɨbɨ bɔyɛ kɔl gɨ da Kumu gɨŋ ga?

⁴ Naŋ le, kɛ ji hagɨr na kuduroy-ɗarwa da Kumu di gumu bɨ, dɨbe-ɗugɔ toyi bɨ, haye-kudurɔ toyi bɨ ga? Kɛ, ji sɨla gɨ kuduroy-ɗarwa di da Kumu di ban ɨre lee le, na ɗe gɨ an̰ na bɨlɨn̰ haldɨn̰ naŋ ga?

⁵ Ama dan̰ gɨyəŋ gɨ da kuduroy-osɨwa ton̰ bɨ, mɨye-daa ton̰ bɨ le, ji hogɨ kuduroy-hɔmɛ da Kumu bee can̰ gamɨn̰ wɔlɛ bɔyɛ kɔl. Wɔlɛdi gɨ nee le Kumu kɨya bɔyɛ kɔl cay kalaŋ dan̰ gɨyəŋdi doŋ waŋ.

⁶ Wɔlɛdi gɨ nee le Kumu kɨya bɔyɛ cay kobɨ waŋ waŋ kalɨn̰ ma, ojɨn̰ na cay gɨye-lɔɔdi.

⁷ Kalaŋ ga ƴomge osu te gɨye-lɔɔ gɨ ɗari gɨŋ bɨ, woyge te male gɨ Kumu na bɨge gusoŋ-tɔgɛ bɨ, aya cayge daa bɨ, sɔmɛ-bɨra gɨ dan̰ tumoyi bɨ le, Kumu kɨya bɨge sɔmɛ-bɨra gɨ dan̰ tumoyi gɨ nee le.

⁸ Ama kalaŋ ga ka-gange kɔl kan̰ɨn̰ge kɔl gɨ cɨndi coŋ kobɨn̰ge hɨnga ga dan̰ durɔ ɗɨngar naŋ le, kuduroy-hɔmɛ da Kumu bɨ, kuduroy-ɨlwa toyi bɨ, kɨya bɔɔ cayge.

⁹ Kumu kɨya ɗɔɔ hɨnga ga ni dɔsɛ-ɗugɔ bɨ, ga osɨdəŋ osɨdəŋ bɨ, andaŋ a cay ungo gɨ ani ani gɨ ba-lɔɔ ɨsɨna. An̰ toy a cay wase cay kalaŋ ga toyge na Jubɨ pa dɨm ma kɨya andɨn̰ a cay kalaŋ ga toyge na Jubɨ naŋ ƴee.

¹⁰ Ama kalaŋ ga ka-lɔɔ hɨnga ga ɗari le, Kumu kɨya bɨge gusoŋ-tɔgɛ bɨ, aye cayge daa bɨ, gusi-dɔbɛ bɨ. An̰ toy a cay wase cay kalaŋ ga toyge na Jubɨ pa dɨm ma kɨya andɨn̰ a cay kalaŋ ga toyge na Jubɨ naŋ ƴee.

¹¹ Kɨya wa Kumu dɨra cɨn̰ ungo naŋ.

¹² Kalaŋ nɔm ga ba leege ɨsɨna dɨle sɔlɛge gasɨn̰-kɔl gɨ da Moyis le, Kumu kɨya bɔyɛ kɔl tɨma cayge, ama na dan̰ gɨyəŋ gɨ da gasɨn̰-kɔl gɨ da Moyis naŋ. Ama kalaŋ nɔm ga ba leege ɨsɨna a te gasɨn̰-kɔl gɨ da Moyis gaŋ le, kɨya bɔyɛge kɔl cayge na dan̰ gɨyəŋ gɨ da gasɨn̰-kɔl bɨ.

¹³ Kalaŋ ga woyge dan̰ durɔ ɗɨngar tumoyi Kumu le, na kan ga ka-jɔɔ gasɨn̰-kɔl ga kɛ le dan̰ sɨmayge ƴɔbɨ naŋ, ama kalaŋ ga woyge dan̰ durɔ ɗɨngar le, na kan ga ka-lɔɔ hɨnga ga gasɨn̰-kɔl ojɨ.

¹⁴ Kɨɗɨn̰ ga kalaŋ ga toyge na Jubɨ naŋ ga sɨlage gasɨn̰-kɔl gɨ da Moyis naŋ, ama sayge dan̰ kuduroy geye koge leege hɨnga ga gasɨn̰-kɔl ojɨ na, ko kan na ɨran̰ dan̰ gasɨn̰-kɔl naŋ kalɨn̰ ma, kan bɨle woy hɨn̰ gɨ kan na orɨn̰ dan̰ gasɨn̰-kɔl a kuyoŋdi-gusɨge koge gɨŋ wo̰.

¹⁵ Na hɨn̰ wo̰ ma kan gɨl gɨ gɨye-lɔɔ gɨ gasɨn̰-kɔl ba gey gɨ kan na laa le, na hɨnga ga kan walge na a kuduroyge ɨni bɨ, ɨrɨmedɨge na lee tɨmon̰di cay nee bɨge bɨ. Kɨya wa ɨrɨmedɨge gɨlge hɨnga ga ɗari bɨ, ga ɨsɨn bɨ.

¹⁶ Na hɨnga ga nee le ba kɨya wɔyɛ cɨn̰ kalaŋ pɨraŋ a boy wɔlɛ gɨ Kumu kɨya bon̰ kɔl a cay gɨye-lɔɔ gɨ da kalaŋ gɨ woy a kɨɗɨn̰ wɔsɛdi gɨŋ dan̰ gɨyəŋ gɨ da Jesu-Kɨris, hɨn̰ gɨ Kɔl-gɨ-Ɗari gɨ ɨŋ ba tee bɛrnɛdi le ba ye wo̰.

Jubɨn̰əŋ bɨ gasɨn̰-kɔl bɨ

¹⁷ Ama ja, ji gɨ gusoŋ gɨ ni Jubɨ ye can̰ le, ji ɗe togɨn̰ na a cay gasɨn̰-kɔl gɨŋ bɨ, ji de jorgɨn̰ na a cay Kumu bɨ.

¹⁸ Ji sol kuduroy geye gɨ da Kumu bɨ, gasɨn̰-kɔl gɨlɨn̰ gɨyəŋ gɨ ni dɔrɛ cɨn̰ hɨnga ga ɗari bɨ.

¹⁹ Ji ɨrɨm kuduron̰ ji naa ba gɨlɨn̰ ka-bɨbe gɨyəŋ bɨ, ji naa asɨn̰a gɨ da kan ga woyge duroy dɨlɨm dɨŋ bɨ,

²⁰ ba gɨlɨn̰ kalaŋ ga sɨlage hɨnga naŋ hɨnga bɨ, ba gɨlɨn̰ karɨn̰aŋ hɨnga bɨ, kɨya gɨ hɨnga-sɔlɛ bɨ, kɔl gɨ cɨndi bɨ le, ji orɨn̰ a boy gasɨn̰-kɔl gaŋ.

²¹ Naa hɨn̰ wo̰ na, ji gɨ ba gɨlɨn̰ kamdɨn̰ hɨnga le, kɛ na kɨya wa ma ji gɨlɨn̰ gusɨn̰ hɨnga naŋ ga? Ji gɨ ba tɔgɛ bɛrnɛ gɨ kalaŋ naa hase naŋ le, kɛ na kɨya wa ma man̰ hasɨ ga?

²² Ji gɨ ba nare yɔyɛ tam mɨgan̰ wala bara gɨ da mɨgɛɛ le, kɛ na kɨya wa ma man̰ jɨga yoy tam mɨgan̰ ga? Ji gɨ kuduron̰ aya kulan̰əŋ naŋ yɔd le, kɛ na kɨya wa man̰ jɨga don hɨnga ga a duroy ƴaa gɨ da kulan̰əŋ gaŋ coŋ ga?

²³ Ji gɨ ji de jorgɨn̰ kɨya cay gasɨn̰-kɔl le na kɨya wa man̰ hangɨɗɨ cay gasɨn̰-kɔl mondɨn̰ guson̰ Kumu ga?

²⁴ Na toy di hɨn̰ wo̰ ma: «Kalaŋ ga toyge na Jubɨ naŋ yagɨdege Kumu na kol caygɨŋ kɨŋ-gandi hɨn̰ gɨ ba walge duroy Magtubu di da Kumu dɨŋ.»

²⁵ Na cɨndi, hɨn̰ gɨ ji na ɨr a cay gasɨn̰-kɔl gaŋ na, wale ban̰a na hɨnga ga ɗari. Ama hɨn̰ gɨ ji na hangɨɗa cay gasɨn̰-kɔl na, wale ban̰a ton̰ na hɨnga ga kalɨn̰ wo̰ dugo.

²⁶ Hɨn̰ gɨ ungo gɨ na walayige ban̰a naŋ na ɨr a cay gasɨn̰-kɔl gaŋ na, Kumu kɨya solii hɨn̰ ungo gɨ ba wale ban̰a ƴɔbɨ.

²⁷ Ungo gɨ walayige ban̰a a kuyoŋdi-gusi gɨŋ naŋ, ama ɨre a cay gasɨn̰-kɔl gɨŋ le, kɨya bɔyɛ kɔl can̰ ji-bandi gɨ ni Jubɨ gɨ ɨr a cay gasɨn̰-kɔl gɨŋ naŋ. Kɨya wa kan walɨn̰ge ban̰a hage bɨ, ji orɨn̰ dan̰ gasɨn̰-kɔl gɨ walge a duroy magtubu dɨŋ han̰ bɨ, ama ji hangɨɗɨ cayi.

²⁸ Leen̰ cɨndi na, ungo gɨ ni Jubɨ gɨ hɨnde le, na hɨnga ga ungo kɨya sɔlɛ a gusi doŋ ba kɨya lɔɔ gɨ ban naa Jubɨ naŋ. Bɨ wale ban̰a di leen̰ cɨndi le, na wale gɨ da kuyoŋdi-gusu naŋ bɨ.

²⁹ Ama ungo gɨ ni Jubɨ gɨ hɨnde le, ban na Jubɨ a ɗugoyi bɨ wale ban̰a toyi le na wale ban̰a di da ɗugɔ. Wale ban̰a di nee le na Turnɔ di da Kumu ba lɔɔ, wala kalaŋ ga ɨndəŋ ba lɔɔ kɨya bogɨn̰ kɔl cay gasɨn̰-kɔl gɨŋ naŋ. Ungo gɨ ni Jubɨ gɨ hɨnde gɨ hɨn̰ wo̰ le, hɨn̰ gɨ kalaŋ na hɨramayige naŋ kalɨn̰ ma, Kumu na hɨrami.