Magtubu di Pol wal bɨn̰ kalaŋ ga Rɔm 16 - Gabri Maja

Pol leen̰ kamdi lapɨya

¹ Ɨŋ gey yogɨŋ kɔl gɨ ojɨ cay tɨmdɨna Pebe. Hɨndi na ɗe-gɨye duroy Ka-Daye ga somge a cay gulɔŋ gɨ Saŋkɨre gɨŋ.

² Ƴɨmaagɨŋ gusɨgɨŋ dan̰ guson̰ Ba-gulɔŋ bɨ, laagɨŋ tɨrga hɨn̰ gɨ ba ojɨ gɨ ni lɔɔ dan̰ kalaŋ ga woyge dan̰ cɨndɨge wo̰ bɨ. Jɨbgɨŋ tɔɔ a bon̰ hɨnga nɔm ga hɨndi orɨn̰ dan̰ n̰agedɨge a gusɨgɨŋ, kɨya wa hɨndi kalɨn̰ ma jɨbɨ te kalaŋ dan̰ kondiige bɨ, ɨŋ-bandi kalɨn̰ ma hɨndi jɨbɨ tonɨ bɨ.

³ Laan̰gɨŋ Pɨrisil dan̰ Agilas, lapɨya bəŋ. Kan na kamnɨ ka-lɔɔ gɨye pɨna danaŋ te bugoŋ pɨna gɨŋ dan̰ Jesu-Kɨris.

⁴ Kan andaŋge duroy hɨnga ga dɨmbɨre gɨɗaŋ gaŋ kɨya pɔɗɔŋge kɨbɨ tɨma dɨŋ. Na ɨŋ-bandi kan̰nɨ ba looge ho’o naŋ, ama kalaŋ nɔm ga na Ka-Daye ga somge a duroy kalaŋ ga toyge na Jubɨ naŋ le kalɨn̰ ma, woyge te looge ho’o bɨ.

⁵ Laan̰gɨŋ Ka-Daye ga daydaŋge tage le, lapɨya bəŋ bɨ. Laan̰gɨŋ ban gɨ ɨŋ lee-toyi Epayinɛt lapɨya bəŋ bɨ. Ban na ungo gɨ cay wase cɨg cɨg gɨ ay kuduroyi bɨn̰ Jesu-Kɨris a cay gɨsəŋ ga Aji gaŋ.

⁶ Laan̰gɨŋ Mari di gɨlal gɨɗaŋ kol caygɨŋ lapɨya bəŋ bɨ.

⁷ Laan̰gɨŋ Andironikus dan̰ Junɨyas lapɨya bəŋ bɨ. Kan na kanɨ bɨ, kamnɨ ka-dangay bɨ. Kan na ka-gɨre-gɨye ga gɨmdəŋ bɨ, kan na kalaŋ ga beege kuduroyge cay Kɨris tumɔnɨ coŋ ƴee bɨ.

⁸ Laan̰gɨŋ Ampɨlɨyasɨ lapɨya bəŋ. Ban na mɨganɨ gɨ ɨŋ lee-toyi a te Ba-gulɔŋ bɨ.

⁹ Laan̰gɨŋ Urbɛ̰ lapɨya bəŋ bɨ. Ban na mɨganɨ ba-lɔɔ gɨye a te bugoŋ pɨna dan̰ Kɨris gɨŋ bɨ. Laan̰gɨŋ Sɨtakis gɨ ɨŋ lee-toyi lapɨya bɨ.

¹⁰ Laan̰gɨŋ Apɛlɛs lapɨya bəŋ. Ban lee hɨnga ga gɨl gɨ ban naa ungo gɨ bee kuduroyi a cay Kɨris. Laan̰gɨŋ kalaŋ ga a duroy ƴaa di da Arisitobul dɨŋ lapɨya bəŋ bɨ.

¹¹ Laan̰gɨŋ Ɛrɔdɨyo̰ lapɨya bəŋ. Ban na gɨlmɨnɨ. Laan̰gɨŋ kalaŋ ga a duroy ƴaa gɨ da Narsis ga beege kuduroyge a cay Ba-gulɔŋ lapɨya bəŋ bɨ.

¹² Laan̰gɨŋ Tirpɛn dan̰ Tirpojɨ lapɨya bəŋ. Kan na kandɨ ga gɨlalage a kɨbɨ gɨye gɨ da Ba-gulɔŋ gɨŋ naŋ bɨ. Laan̰gɨŋ Pɛrsidɨ lapɨya bəŋ bɨ. Hɨndi na tɨmnɨ di ɨŋ lee-tɔɔ di gɨlal tɔgɨ a kɨbɨ gɨye gɨ da Ba-gulɔŋ gɨŋ.

¹³ Laan̰gɨŋ Rupus lapɨya bəŋ. Ban na ungo gɨ Ba-gulɔŋ ba dorii. Laan̰gɨŋ ƴoyi di woy hɨn̰ ƴonɨ wo̰ bɨ kalɨn̰ ma, lapɨya bəŋ.

¹⁴ Laan̰gɨŋ Asɛ̰girit dan̰ Piligon dan̰ Ɛrmɛs dan̰ Patɨrobas dan̰ Ɛrmas dan̰ karmɨna ga ɗaŋ ga somge duroyge lapɨya bəŋ bɨ.

¹⁵ Laan̰gɨŋ Pilologɨ dan̰ Juli dan̰ Nere bɨ, tɨmdi dan̰ Olimpas dan̰ kan ga woyge dan̰ cɨndɨge nɔm ga somge danage, lapɨya bɨ.

¹⁶ Laan̰gɨŋ gusɨgɨŋ lapɨya duroygɨŋ dan̰ lapɨya di da ka-karme. Ka-Daye ga da Kɨris pɨna pɨna nɔm ləgɨŋge lapɨya.

Hale gɨ ni kagadi

¹⁷ Ay karmɨnɨ ga ban̰aŋ dan̰ ga kandɨ, aŋ halgɨŋ cay hɨnga ga pɨna. Ɗagɨŋ muɗɔlɛ a cay gusɨgɨŋ gɨŋ, a cay kalaŋ ga ka-gɨlgɨŋ hɨnga ga woy kan̰dɨge dan̰ hɨnga ga ni gɨle ga kɨŋ ba je tumɔ. Kalaŋ ga nee le, na ka-pɔyɛ ka-aye kudurɔ duroy nee bɨ, ka-dɨbe sɨya tumon̰ ka-aye kudurɔ bɨ. Dɨragɨŋ gusɨgɨŋ sɛdɨ gusɨge coŋ.

¹⁸ Na cɨndi, kalaŋ ga nee le, laage gɨye bɨn̰ na Ba-gulondɨna Kɨris naŋ, ama leege gɨye bɨn̰ na kuduroyge ƴɔbɨ. Kalaŋ ga hɨnga-sɔlɛ kage baa gɨyəŋ le, kan nadɨrdɨge dan̰ kɔl ga mɔɔ bɨ, ga ni narɨn̰ cɨn̰-kɨɗɨn̰ bɨ.

¹⁹ Jɔɔ gɨ kɨŋ ba je kɔl a kɨbɨ Ba-gulɔŋ le, kalaŋ nɔm solge. Lee gɨ gusɨnɨ mɔŋ kol caygɨŋ, ama ɨŋ gey gɨ kɨŋ na wɨya naa kalaŋ ga naa cɛ̰ɛ̰ laan̰ hɨnga ga ɗari bɨ, tobɨn̰ gusɨgɨŋ duroy nee dan̰ ɨsɨna naŋ bɨ.

²⁰ Baa mɨnde gɨ Kumu gɨ ba-bee gusi-dɔbɛ kɨya rade cay Sidan a te tɨbayigɨŋ dɨŋ dugo. Kuɗa gɨ ɗarwa di da Ba-gulondɨna Jesu baa danagɨŋ.

²¹ Timote mɨganɨ ba-lɔɔ gɨye ləgɨŋ lapɨya. Kanɨ Lisɨyus bɨ, Jaso̰ bɨ, Sosipatɛr bɨ, kalɨn̰ ma ləgɨŋge lapɨya bɨ.

²² Ɨŋ-bandi Tɛrtɨyus gɨ ba wale kɔl gɨ da Pol duroy magtubu di kɛ dɨŋ le, ɨŋ ləgɨŋ lapɨya dan̰ guson̰ Ba-gulɔŋ.

²³ Gayus gɨ ba ƴɔmɔŋ ɨŋ-bandi Pol tɨrga tayi bɨ, ba ƴɔmɛ Ka-Daye nɔm bɨ, ləgɨŋ lapɨya bɨ. Erasɨ gɨ ba-game gursu di da cay ƴaa-di-gumu bɨ, kurɨndɨna Kartus bɨ, ləgɨŋge lapɨya bɨ.

²⁴ [Ɗa gɨ ɗarwa di da Ba-gulondɨna Jesu-Kɨris baa danagɨŋ nɔm. Ɗa-ɗe-woy-hɨn-wo̰.]

Pol hɨram Kumu

²⁵ Gusoŋ-tɔgɛ na gɨ da Kumu! Kɨya wa Kumu ɓal lɔɔ gɨ kɨŋ na ɨrɨn̰ usa a te aye kudurɔ gɨŋ hɨn̰ gɨ Kɔl-gɨ-Ɗari gɨ da Jesu-Kɨris gɨ ɨŋ ba tee bɛrnɛdi ba ye wo̰. Hɨnga ga ungo sɨla naŋ ga woy kɨɗɨn̰ wɔsɛdɨge gaŋ na jɨne ɓɨrag hage le, Kumu wasɨn̰ cayge lee gɨ kalaŋ solge dan̰ gɨyəŋ gɨ da Kɔl-gɨ-Ɗari gɨ kɛ le.

²⁶ Ama haw kɛ na, Kɔl-gɨ-Ɗari le woy a cɨn̰-tɨwa dɨŋ waŋ. Na toy di hɨn̰ wo̰ ma, kalaŋ nɔm ga toyge na Jubɨ naŋ le, solɨn̰ge Kɔl-gɨ-Ɗari gɨ da Kɨris dan̰ gɨyəŋ gɨ da Kɔl gɨ walge a duroy Magtubun̰əŋ di da ka-yɔɔ-kɔl-gɨ-Kumu-ba-yɔɔ gaŋ. Kumu gɨ ba-sɔmɛ dan̰ tumoyi ay te tumɔ di kɛ le hɨn̰ wo̰, ɗe kalaŋ nɔm na ayan̰ge kuduroyge bɨ, jan̰ge kɔl kɨbi bɨ.

²⁷ Gusoŋ-tɔgɛ na gɨ da Kumu, na ban pɨna hayi ƴɔbɨ ma na ba cɨn̰-muɗɔlɛ. Kuɗa gɨ kalaŋ dɨbɨ gusoŋ-tɔgɛ cayi dan̰ gɨyəŋ gɨ da Jesu-Kɨris ɨlge dan̰ ɨlge! Ɗa-ɗe-woy-hɨn̰-wo̰.