Magtubu di Pol wal bɨn̰ kalaŋ ga Rɔm 14 - Gabri Maja

Bɔyɛ kɔl cay kurɨndɨn̰ naŋ

¹ Ungo gɨ ɨrɨmedi usa a te aye kudurɔ gɨŋ naŋ ƴee le, ƴɨmayigɨŋ gusɨgɨŋ dɨle bɔyɛ kɔl a cay ɨrɨmedi gɨŋ.

² Dan̰ gɨyəŋ gɨ da aye kudurɔ gɨ da kalaŋ ga pɨna na, hɨnga nɔm won̰ na ga ni dɔɔ. Ama kalaŋ ga aye kudurɔ koge usa naŋ le, dii dege na kabɨn̰ hɨnga ƴɔbɨ.

³ Hɨn̰ wo̰ na, kuɗa gɨ ban gɨ ba-dɔɔ hɨnga ga toyge kan̰dɨge kan̰dɨge le, hagɨre ban gɨ ba-dɔɔ kabɨn̰ hɨnga ƴɔbɨ le naŋ bɨ. Ban gɨ ba-dɔɔ kabɨn̰ hɨnga ƴɔbɨ le, kuɗa gɨ ban bɔyɛ kɔl a cay ban gɨ ba-dɔɔ hɨnga nɔm le naŋ bɨ. Kɨya wa kurɨndɨn̰ le kalɨn̰ ma, Kumu ƴomii gusi bɨ.

⁴ Kɛ, ji-bandi, ji na waŋ ma man̰ kɨya bɔyɛ kɔl a cay marɨna ba lɔɔ gɨye gɨ ji na ba-gulondi naŋ le ga? Hɨn̰ gɨ marɨna ba-gɨye le, na ƴɨma gusi usa kɨbɨ gɨye gɨŋ wala, na ba dugo kalɨn̰ ma, dɨlan̰ naŋ, kɨya wa na kɔl gɨ da ba-gulondi. Ama ban kɨya ƴɔmɛ gusi osɨwa kɨya wa Ba-gulɔŋ orɨn̰ dan̰ dɔnɔ di ni lɔɔ gɨ ban na ɨrɨn̰ daa kalɨn̰.

⁵ A boy ɨrɨme gɨ da kalaŋ ga pɨna na, wɔlɛn̰əŋ ga pɨna na ɗɨn̰ kamdɨge. A boy ɨrɨme gɨ da kalaŋ ga ɗaŋ na, wɔlɛn̰əŋ nɔm na ɓadɨldɨn̰ge dɛj dɛj. Kuɗa gɨ waŋ waŋ kalɨn̰ ma, ɨran̰ dan̰ ɨrɨme gɨ pɨna a cay gasɨndi ga ban ɨre cay nee.

⁶ Ban gɨ ba-dɔrɛ cɨn̰ wɔlɛ le, dor na kɨya cay Ba-gulɔŋ bɨ. Ban gɨ ba-dɔɔ hɨnga ga toyge kan̰dɨge kan̰dɨge le, dii na kɨya cay Ba-gulɔŋ bɨ, leen̰ Kumu ho’o. Ban gɨ ba-dɔɔ kabɨn̰ hɨnga ƴɔbɨ le, kan̰ dɔɔ na kɨya cay ba-gulɔŋ bɨ, leen̰ Kumu ho’o bɨ.

⁷ Na cɨndi, ungo pɨna wo̰ duroyna gɨ ba-sɔmɛ-bɨra kɨya cay gusi koyi ƴɔbɨ wala, mare kɨya cay gusi koyi ƴɔbɨ le, unɔ bɨrɨŋ.

⁸ Hɨn̰ gɨ na na sɨmagɨŋ-bɨra kalɨn̰ ma, na somgɨŋ-bɨra na kɨya cay Ba-gulɔŋ bɨ. Hɨn̰ gɨ na na mara naa mare kalɨn̰ ma, na magɨŋ na kɨya cay Ba-gulɔŋ bɨ. Na toy di hɨn̰ wo̰ ma, hɨn̰ gɨ na na sɨmagɨŋ-bɨra wala maragɨŋ kalɨn̰ ma, na na ga da Ba-gulɔŋ.

⁹ Kɨya wa Kɨris ma bɨ boy lɨbɨ bɨ, kɨya bɨlɨn̰ Ba-gulɔŋ gɨ da kalaŋ ga somge-bɨra bɨ, Ba-gulɔŋ gɨ da kalaŋ ga madɨrdaŋ bɨ.

¹⁰ Ji-bandi gɨ ba kɛ, na kɨya wa ma mɨn̰ boy kɔl a cay kurɨndɨn̰ bɨ ga, ji-bandi gɨ kɔ, na kɨya wa ma mɨn̰ hagɨr kurɨndɨn̰ bɨ ga? Waŋ waŋ kalɨn̰ ma duroyna, kɨya ɨre a tumoy kali di da Kumu dɨŋ, ɗe ban na bon̰ kɔl cayna.

¹¹ Kan walge duroy Magtubu di da Kumu dɨŋ: «Ba-gulɔŋ ye hɨn̰: “Ɨŋ-bandi ɨŋ dor gusɨnɨ dan̰ gusɨnɨ hɨnge, Gɨ kalaŋ nɔm kɨya pɔyɛge gɨbayge dugo tumonɨ bɨ, Kalaŋ nɔm kɨya yɔɔge dan̰ kɨbɨge gɨ ɨŋ naa Kumu bɨ.”»

¹² Na hɨn̰ wo̰ ma, waŋ waŋ kalɨn̰ ma duroyna kɨya dɔrɛ kardi gɨye-lɔɔdi dan̰ gusi koyi bɨn̰ Kumu.

Ɗe gɨ haldɨn̰ dɨbɨn̰ kurɨndɨn̰ sɨya naŋ

¹³ Na hɨn̰ wo̰ ma, ɗanagɨŋ bɔyɛ kɔl a cay gusɨnagɨŋ baa. Kuɗa gɨ na uja gɨ ni lɔɔ hɨnga ga kɨya dɨbɨn̰ kurɨndɨna sɨya bɨrɨŋ gɨ ban kɨya andɨn̰ a te gɨyəŋ gɨŋ coŋ naŋ.

¹⁴ Ɨŋ sol kuɗa a kuduronɨ, dan̰ gɨyəŋ gɨ da Ba-gulɔŋ Jesu, gɨ hɨnga ga ni dɔɔ nɔm won̰ ga ni dɔɔ dan̰ cay gusɨge koge. Ama hɨnga ga ni dɔɔ le, kɨya bɨle kɨni na a cɨn̰ ungo gɨ ɨrɨm kuduroy gɨ hɨnga ga ni dɔɔ le na lee kɨni.

¹⁵ Hɨn̰ gɨ hɨnga dɔɔdɨn̰ na bɨl te mɔndɛ kuduroy kurɨndɨn̰ na, ji ɨra na dan̰ gɨyəŋ gɨ da wandɨ naŋ. Ji ɗɔɔ hɨnga ga ni dɔɔdɨn̰ bɨle te mundoŋ gɨ da kurɨndɨn̰ gɨ Kɨris ma kol cayi le naŋ.

¹⁶ Kɨŋ ɗɔɔ hɨnga ga kuɗa cɨndɨgɨŋ haŋge gɨyəŋ ɗe kalaŋ yon̰ kɔl gɨ ɨsɨni kol caygɨŋ naŋ.

¹⁷ Ho’o hɨnga ga kuɗa tɔgɨ a boy dɔɔ-ƴaa gɨ da Kumu gɨŋ le, na hɨnga ga ni dɔɔ naŋ bɨ, na hɨnga ga ni sɔ naŋ bɨ, ama na lɔɔ hɨnga ga dan̰ durɔ ɗɨngar bɨ, gusi-dɔbɛ bɨ, gusi-mɔwa bɨ, kan ma na hɨnga ga Turnɔ ɗe-kuduroy-bɛrɛ bee le.

¹⁸ Ungo gɨ na kɨba Kɨris dan̰ lɔɔ gɨye gɨ hɨn̰ wo̰ na, ƴee cɨn̰ Kumu bɨ, kalaŋ nɔm gey kɔl koyi bɨ.

¹⁹ Hɨn̰ wo̰ na, kuɗa gɨ na mala na kardi hɨnga ga kɨya ɨrgan̰ dan̰ gusi-dɔbɛ a duroynagɨŋ bɨ, ɗe togɨygɨŋ na san̰ cay mɨgaa dɨŋ bɨ.

²⁰ Ji ɗɔɔ ba mɔndɛ gɨye gɨ da Kumu kɨya hɨnga ga ni dɔɔ naŋ. Na cɨndi, hɨnga ga ni dɔɔ ga toyge kan̰dɨge kan̰dɨge won̰ ga ni dɔɔ dan̰ cay gusɨge. Ama hɨn̰ gɨ hɨnga dɔɔdɨn̰ na kɨya dɨbɨn̰ kurɨndɨn̰ sɨya dorii a te gɨyəŋ gɨŋ coŋ na, uja gɨ ji jɔgɛ dɔɔ naŋ.

²¹ Hɨnga ga ɗari na, ji ɗa ba dɔɔ culɔm bɨ, sɔɔ cɛrɛ di suru bɨ, lɔɔ hɨnga ga kɨya orɨn̰ dan̰ kurɨndɨn̰ a boy ɨsɨna gɨŋ bɨ.

²² Hɨnga ga ji ba sol dan̰ gɨyəŋ gɨ da aye kudurɔ ojɨn̰ cay kɔl gɨ nee le na, ɗa ɗe woy duroygɨŋ kɨŋ-gandi dan̰ Kumu. Tumoy wolwa woy kɨya cay ungo gɨ na gey lɔɔ hɨnga ma na ɨrɨm kuduroy sɔɔ sɔɔ cay nee naŋ.

²³ Waŋ waŋ gɨ na ɨrɨm a kuduroy, kuduroy sɔɔ sɔɔ a cay hɨnga ga ban dii na, kɔl ƴom cayi ɨni, kɨya wa ban laa hɨnga ga ɨra dan̰ aye kudurɔ koyi naŋ. Hɨnga nɔm ga na laa dan̰ gɨyəŋ gɨ da aye kudurɔ naŋ na, na ɨsɨna.